ئەنەکەسە هۆشداریێ ددەتە پەیەدێ

ئەنەکەسە هوشداریێ ددەتە پەیەدێ

 دەستەیا سەرۆکاتیا ئەنجوومەنا نشتمانییا کورد ل سووریێ (ئەنەکەسێ) دەربارێ سەردانا شاندا ئەنەکەسێ یا بۆ ترکیێ و ھەڤدیتنا د گەل وەزیرێ دەرڤەیێ وی وەلاتی مەولود چاڤوشۆغلو دا، بەرسڤا داخویانیا پارتیا یەکیتیا دەمۆکراتیک (پەیەدێ) دا و راگهاند، تۆمەتێن پەیەدێ بێ بنگەھن و دەستنیشان کر، پێویستە پەیەدە ژ بۆ ئێکخستنا ھەلویستا کوردی د ڤێ رەوشا ھەستیار و گرینگ دا، دەست ژ وان گۆتار و رەفتارێن خوە یێن نە ھێژا بەردەت و دەست ب دەستپێشخەریەکا ئاڤاکەر بکەت.

وەکی دیار شاندەکێ ئەنجوومەنا نشتیمانییا کوردی ل سووریێ رۆژا ١٩ێ شباتێ سەردانا ترکیێ کربوو و ل ئەنقەرێ د گەل وەزیرێ دەرڤەیێ وی وەلاتی مەولۆد چاڤوشۆغلو جڤیابوو، ل سەر وێ ھەڤدیتنێ، پارتیا یەکیتیا دەمۆکراتیک (پەیەدێ) داخویانیەک بەلاڤ کربوو و راگھاندبوو، “ئارمانجا ژ ھەڤدیتنا ئەنەکەسێ و چاڤوشۆغلو تێکبرنا ئینسیاتیفا ئێکەتیا نشتیمانی یە” و “کارتێکرنەکا نەرێنی” ل دەستپێشخەریا فەرماندارێ ھێزێن سووریەیا دەمۆکراتیک دکەت.

دەستەیا سەرۆکاتیا ئەنەکەسێ د بەرسڤا پەیەدێ دە راگھاند، جڤینا وانا ل گەل وەزیرێ دەرڤەیێ ترکیێ مەولۆد چاڤوشۆغلو “د چارچۆڤەیا ھەولێن وانێن ژبۆ چارەسەرکرنا پرسا کورد و کێمکرنا ئێش و ئازارێن گەلێ کورد ل ئەفرین، گرێ سپی و سەرێ کانیێ دا” بوویە.

ئەنەکەسە د بەرسڤا پەیەدێ دا دبێژیت، “ئەنەکەسە ب ریا پەیوەندیێن خوە یێن ل گەل ھێزێن جودا یێن ئۆپۆزسیۆنێ و وەلاتێن کاریگەر د پرسا سووریێ دا، د ناڤا وان دا ژی ل گەل ترکیێ کو کارتێکرنا وێ ل سووریێ ھەیە، وان ھەڤدیتنان ئەنجام ددەن و د وێ چارچۆڤەیێ دا ژی وان سەرەدانا ئەنقەرەیێ کر و ل گەل وەزیرێ دەرڤەیێ ترکیێ مەولۆد چاڤۆشوغلو کۆمبوونە.”

ئەنەکەسە دبێژیت، ل شوونا پشتەڤانیکرنا ھەول و پاراستنا یەکرێزیا ھەلوێستا کوردی و چارەسەرکرنا ناکۆکیان، “پەیەدێ تۆمەتێن بێ بنگەھ ئاراستەیی ئەنجوومەنا نشتیمانییا کورد دکەت” و ئاخافتنێن نە گونجایی د دەرھەقێ وێ دا دبێژیت.

ئەنەکەسە ئاماژە ب وێ یەکێ ددەت، کو ئەو “زمانێ گەفکرنێ و تێکدانا چارەنڤیسا گەلێ کورد” رەد دکەن و تەکەزێ دکەت، کو “دێ بەردەوام مافێن کوردان پارێزیت و ھەولا ڤەگەراندنا پەنابەر و کۆچبەران ژ بۆ ناڤچەیێن وان دەت، ھەروەھا دێ کار ل سەر راوەستاندنا بنپێکاریان ل ئەفرین، گرێ سپی و سەرێ کانیێ کەت.”

ئەنجوومەنا نشتیمانییا کوردی ل سووریێ دەستنیشان دکەت، ئەو ب ھەموو ئاوایی “گوھەرتنا دەمۆگرافیک” ل رۆژاڤایێ کوردستانێ رەد دکن و داخواز دکە، کو “پەیەدە دەست ژ وان گۆتار و رەفتارێن نە ھێژا بەردەت، و دەست ب دەستپێشخەریەکا ئاڤاکەر بکەت ژ بۆ یەکخستنا ھەلوێستا کوردی د ڤێ رەوشا ھەستیار و گرینگ دا.”