بۆچی ئۆجالانی داخوازا لێبۆرین كر؟ بەشا دوویەمین

ئۆجالان ژ به‌ر چ لێبۆرین خواست؟ – بەشا دوویەمین

ئۆجالان ژ به‌ر چ لێبۆرین خواست؟ – بەشا دوویەمین

Posted by ‎داركا مازى – كوردى‎ on Monday, February 24, 2020

بەشێ دوێ:

دەستەسەر کرنا ئۆجالانی ل 15ی شوباتا 1999ێ و ھەموو راستیێن روودانێن پشتی گرتنا وی کانێ چەند ژ لایێ پەکەکێ و ئۆجالانی ب خوە ڤە ھاتینە پەردەپۆش کرن، وەها ژ لایێ دەولەتا تورک ژی ڤە ھاتینە پەردەپۆش کرن.

کەس نزانیت کانێ گەنگەشەیێن پشت پەردەی و لێکنێزیکبوونا روودانان ب چ ئاوایی نە، ھندەک زانیاری و داخویانیێن ل سەر روودانێ ھاتینە بەلاڤ کرن د ماوەیێ پشتی گرتنا وی دا بووینە ژێده‌ره‌كێ بچووک یێ ئیلھام وەرگرتنێ ژ راستیا دەستەسەر کرنا ئۆجالانی، ئەو ب خوە ژی د راستیێ دا داخویانیێن ئۆجالانی د ماوەیێ دادگەھا وی دا و ھەموو ئەو گۆتار و پرتۆكێن ئۆجالانی یێن پشتی گرتنا وی ھاتینە بەلاڤ کرن، تێرا وێ چەندێ ھەنە مرۆڤ بزانیت ھەتا رادەیەکی روودان ب چ ئاوایی بووینە.

یه‌كه‌م گۆتنا ئۆجالان پشتی ده‌سته‌سه‌ر كرنێ ئه‌ڤه‌ بوو:  «دایکا من ژی تورکە، هه‌گه‌ر ھەوە خزمەته‌ك ھەبیت و تشتەک بکەڤیتە سەر ملێن من، ئەز یێ ئامادەمە»

ب گۆرەی گۆتنێن ئەندامێن ھێزا تایبەت ئەوا عەبدوللا ئۆجالان گرتی، ل رۆژا 15 شوباتێ ل پایتەختا کینیا (نایرۆبی) پشتی ئۆجالان دھێتە سوار كرن بۆ فرۆکه‌یێ، ئەو د 60 چرکەیان دا هاته‌ كۆنترۆل كرن و بێ باندۆر ما، به‌لكو ئۆجالانی چ بەرخودانێن فیزیکی ژی نه‌كرن.

پشتی فرۆکە رادبیتە ئاسمانان و ئەندامێن ھێزا تایبەت لسقێ ژ چاڤێن ئۆجالانی ڤەدکەن، سەرپەرشتێ گرۆپێ وێ ھێزا تایبەت یا د فرۆکه‌یێ دا دبێژیتە ئۆجالانی: «تو بخێر ھاتی بۆ وەلاتێ خوە»، دیسان بەردەوامیێ د دەتە ئاخفتنا خوە و دبێژیتە وی: «تو مێھڤانێ مەیی»!

ب راستی ژی جھێ دلگرانیێ و دیمەنەکێ جەرگ برە کو کەسەک د ناڤ دەست و لەپێن لەشکرێ تورکیا دا و ل بن ئالایێ کۆمارا تورکیا ب ڤی دیمەنی بھێتە دیتن کو ئێخسیرێ دەولەتێ یە، ھەتا ئەگەر ئەڤ کەسە نە سیاسەتمەداره‌كێ کورد ژی بیت، خو ئەو کەسەکێ نۆرمال ژی بیت یان ژی کوردەک بیت کو زیان ژی گەھاندبیتە کوردان، لێ یا ژ ھەموویان نەخۆشتر بەرسڤا ئۆجالانی بوو ل وێرێ کو ب راستی ژی بوویە ئەگەرێ بنبڕکرنا ھیڤیێن هه‌ر كه‌سه‌كی، بگرە ژ ئالیگر و دەوروبەرێن وی ژی.

 بەرسڤا ئۆجالانی ژ بۆ ئەندامێن ھێزا تایبەت یا ترك ئه‌ڤه‌ بوو: «ئەو ب خوە د بنەرەت دا دایکا من ژی تورکە، هه‌گه‌ر ھەوە خزمەته‌ك ھەبیت و تشتەک بکەڤیتە سەر ملێن من، ئەز یێ ئامادەمە».

ئەندامێ ھێزا تایبەت: «ھەما بەرسڤدانا پرسیارێن مە خزمەتکرنا مەیە».

ئۆجالان: «ئەز ژ دل دبێژم، ئەز گەلەک حەز ژ تورکیا دکەم، حەز ژ نەتەوه‌یا تورک ژی دکەم، حەز ژ گه‌لێ كورد ژی دکەم، هه‌گه‌ر مومکن بیت و رێک بمن بھێتە دان، دێ زانم خزمەتێ بکەم».

ئەو بەرسڤێن ئۆجالانی ل 15ی شوباتێ داین، ھەتا ئەڤرۆ ژی د مەشیایی نە و دھێنە پەیرەو کرن، ئۆجالان ب چ رێکان دەست ژ خزمەتکرنا دەولەتێ بەرنه‌داینە.

ل بن گۆتنا ئۆجالانی د چرکەیا ئێکێ یا دەستەسەرکرنا وی دا کو دێ خزمەتا دەولەتێ کەت، دبیتە نیشانەکا روهن و ئاشکرا ل سەر وێ چەندێ کو ھەر ژ دەستپێکێ ئەو تایەکێ دەولەتێ بوویە و دگەل وێ کار کرییە، لێ ل ڤێرە ئێدی نە وەک لقەک ژ جێبەجێکرنا ئەجندایێن دەولەتێ کار د کەت، بەلکو ئێدی ب ئاوایه‌كی تەریب و راستەراست کەتییە د ناڤ پەیرەو کرنا پلانێن سیاسەتا دەولەتێ.

لایه‌نگرێن عەبدوللا ئۆجالانی ھەر ژ 15ی شوباتێ و رۆژا دەستەسەر کرنا وی پۆستەر و وێنەیێن وی مل ب ملێ وێنەیێن «قازی محەمەدی و شێخ سەعید ئەفەندی و گەلەک سەرۆک و سەرکردەیێن دی یێن کوردان» بلند کرن و د ناڤ وان سەرکردەیان دا ئه‌و وه‌ها وەسف دکر کو پیلانگیری ل سەر ھاتییە کرن، لێ یا راست جوداھییەکا گەلەک مەزن د ناڤبەرا ھەلوه‌ستێ ئۆجالانی و ھەموو سەرۆک و سەرکردەیێن دی دا ھەیە.

دەمێ شێخ سەعید برییە بەر دارێ سێدارێ ئەو ل سەر ملێ خوە دزڤریت و دبێژیتە والیێ ئامەدێ: «دێ ل مەحشەرێ خوە ژ ئێک سافی کەین».

 نڤێسەرێ ئنگلیزی لۆرد کنرۆز ب پشت گەرمی ل سەر گۆتنا ئەتاتورکی دبێژیت: «دەما شێخ سەعید بەر ب سێدارێ ڤە بری، چ ترس و دودلی ل دەڤ پەیدا نەبوو و ھەتا ھاتییە سێدارەدان ژی، سەرێ وی یێ بلند بوو و وی ب چ ره‌نگان خوه‌ نه‌چه‌ماند».

ھەلوه‌ستێ قازی محەمەدی ل بەرانبەر دەولەتا ئیرانێ و چاوانییا رەفتارێن وی د بەلگەنامە و ئەرشیفێن رووسیا دا ب ڤی شێوەیی ھاتینە تۆمار کرن:

«قازی د ھەموو گەرێن خوە یێن دادگەھـ کرنێ دا بێی ترس و ب وێرەکیەکا سەیر سەرێ خوە بلند کرییە و راست ل دادوەری د نێری و گەنگەشەیا خوە دکر، وی ب چ ئاوایان لێبۆرین نەخواست و قەت سەرێ خوە نه‌چه‌ماند، وی ھەموو ئیدعایێن دادگەھا لەشکری یا ئیرانی رەت و ئینکار کرن و وی گۆت: «دەمێ دەستوورێ دەولەتا ئیرانێ ھەبوونا کوردان بنپێکری، ل وی ده‌می من کورد ب چەککرینە و بزاڤێن بەرھەنگاریێ ل دژی دەولەتێ كرینه‌»، وی ب تۆرەیی ڤە ل دادگەھێ ئەو ھەموو گۆتگۆتکە رەت کرن ئه‌وێن دبێژن ئەو ژ لایێ دەولەتێ و دەستێن دەرەکی ڤە ھاتییە پالپشتی و پشتەڤانی کرن و شۆرشا خوە کرییە، جەلادەت بەدرخانی ژی دگۆت: «کورد چ جاران سەرێ خوە ناچەمینن».

لێ د ئێکەم گەرا دادگەھکرنا ئۆجالانی دا ل 31ی گولانێ و دەما بۆ جارا ئێکێ ئۆجالان ل بەرانبەر دادوەری ئاخفتی گۆتنا وی یا دەسپێکێ ئەڤە بوو: «من دڤێت وێ چەندێ ب روهن و ئاشکرایی ل بەرانبەری ھەوە بێژم کو ھەتا ئەڤرۆ من چ سڤکاتی كرن ژ لایێ ده‌وله‌تێ ڤه‌ نه‌دیتیە، هه‌روه‌ها چ ئه‌شکەنجەیەک، ل سەر بنیاتێ دیمۆکراسیەتێ ئەز ل سەر خزمەتکرنا دەولەتێ بۆ ئاشتی و براتیێ ئاماده‌مه‌، ئەز پێشوازییا کۆمارا تورکیا ل سەر ڤێ چەندێ ب سوپاسی و رێزڤە رادگەھینم». 

من دڤێت گۆتنەکا کورت ل بەرانبەری ھەموو خێزانێن بەرێز یێن شەھیدان بێژم و ئۆجالان وه‌ها ل به‌رانبه‌ر وان ئاخڤی: «ئەز وێ دلئێشییا گران و نەخۆشییا هه‌وه‌، د دلێ خوە ژی دا پارڤه‌ دكه‌م، ئەز ھەڤپشکێ خەما خێزانێن شەھیدانم، ھەر دیسان یێ دلگرانم، له‌ورا ل سەر پێگەھێ بەرپرسیارەتییا من ل سەر ڤی بابەتی، ئەز سۆزێ ددەم ب کریار کار ل سەر وێ چەندێ بكه‌م کو ھەر تشتەکێ ژ دەستێن من بھێت بکەم ژ پێخەمەت دەستەبەرکرنا ئاشتی و برایەتیێ، ژ بۆ راوەستاندنا وێ خوینا دھێتە رێشتن کو ژ ھندەک برینێن جڤاكی هاتییه‌، دگەل رێز و سوپاسیێن من، بەرێزێ من».

ده‌وله‌تا توركیا و داوه‌رییا وێ ل جه‌م عه‌بدوللا ئۆجالان جهێ رێز وسوپاسیێن بێ دوماهی نه‌

هه‌لوه‌ستێ ئۆجالانی و داخویانیێن وی ل دادگەھا تورکیا کاریگەرییەکا گەلەک مەزن ئافراند، ب تایبەتی ژی وی چ بێرێزی نەکرن د دادگەھێ ڤە و ب روهن و ئاشکرایی دا دیار کرن بۆ ھەموو رایا گشتی کو دەولەتا تورکیا و دادوەرییا وێ جھێ رێز و سوپاسیێن بێ دوماھی نە، خواستنا لێبۆرینێ ژ ھەموو خێزانێن وان تورکێن د شەری دا گیانێن خوە ژ دەست داین و ل ده‌مه‌كی ناڤ نه‌ئینانا نەتەوه‌یا کورد و بەحس نەکرنا شه‌هیدێن گه‌لێ كورد د گۆتنێن وی دا وەها ھاتە دیار کرن کو چ کەس و لایەنەک د شەری دا نینن د حەق یان نەحەق و ھەردو لایەن وەها دانانە پێش چاڤ کو د مافدار و یەکسانن، ئاخ و وەلاتێ داگیرکری، کوشتنا ب ھزاران کەسان ل دێرسمێ و گه‌لیێ زیلا و ئاسمیلاسیۆنێ و سیاسەتا ده‌وله‌تێ برێڤەدبری، هه‌روه‌ها ئەو کەلەخێن ل سەر ئاخێ ھاتینە خشاندن و ب ھزاران فایلیێن بەرزە یێن کوشتن و رەڤاندنا کوردان، ئاپۆی ئه‌ڤ هه‌موویه‌ دگەل کوشتنا وان لەشکرێن ھاتین خاكا کوردان داگیر بکەن، یه‌كسان كرن.

ئۆجالانی ل دادگه‌هێ روویێ توركان سپی كر و گه‌لێ كورد ب زولملێكری نه‌دیت

واتە د وی شەری دا شاشییا کورد و تورکان ھاتە رێزا ئێک و ب هه‌لوه‌ستێ ئۆجالانی د دادگەھێ ڤە رویێ تورکان ھاتە سپی کرن، ھەتا ئەڤرۆ ژی هه‌لوه‌ستێ ئۆجالانی یێ دادگەھێ وەکو ستوونەکا گرنگ ھاتییە دیار کرن د ناساندنا تورکیا دا د ھەستیارییا ب دیمۆکرات بوونا کۆمارێ دا.

راستییا گۆتنێن ئۆجالان یێن دادگەھێ ل دەسپێکێ ژ بۆ کوردێن باکور و پاش ژ بۆ ھەموو کوردێن پارچه‌یێن دی وه‌سا دیار دبیت کو رۆحیەتا بنەجھکرنا خەونا تورکیا ل سەر جێبەجێکرنا «میساقا مللی» ب رێکخستیانە دھێتە برێڤەبرن.

ھەر ژ بەر ڤێ چەندێ ل ڤێرە تێگەهـ ئانكۆ زاراڤەکێ دی پەیدا دبیت کو ئەو ژی «تورک بوون» و رازیبوون ل سەر پاراستنا ئێکپارچەییا خاكا کۆمارا تورکیا، ئەڤە ژی ب رامانا رازیبوونێ یە ل سەر شێوەیێ داگیر کرنا کوردستانێ و پەسەند کرنا وێ، ژ بەر کو تورکیا ئەو سیستەمێ جوگرافی و کارگێری یە یێ ناڤێ نەتەوەیەکی دانایە ل سەر خوە، ئەو نشتیمانێ تورکایە، نشتیمانێ کوردان ژی کوردستانە. تورکایەتی گەلەک سروشتی دھێتە دیتن وەکو تێرم یان زاراڤەکێ نۆرمال وەک یێ ئاشتی و براتیێ.

 ئەم بەرێ خوە بدەینە بەری 20 سالان نەبەحسێ تورکاتیێ بکەین بەلکو دەمێ بەحس ل هه‌ر نێزیكبوونه‌كا ل گه‌ل تورکیا دھاتە کرن، ئەو کەس یان لایەن ب خیانەتکارێ دۆزا کوردستانێ دھاتە دیتن، لێ نوکە ئەڤ زاراڤە وەها دھێتە دیتن کو سیمبۆلا ئازادی بوون و مۆدێرنیەتێ یە.

بنیاتێ ڤێ چەندێ ژی ھەموو ئەو دانوستاندنن یێن د ناڤبەرا دەولەتێ و عەبدوللا ئۆجالانی دا دھێنە برێڤەبرن ل سەر گەشەپێدان و پێشئێخستنا تورکیاتیێ، ھەلوه‌ستێ ئۆجالانی د دادگەھێ ڤە رێک ل بەر ڤێ پێشڤەچوونا ڤێ چەندێ و بەردەوامبوونا دانوستاندنان ڤەکرییە، ئۆجالان دخوازیت ھەموو خیانەتا خوە ب سەرپێھاتی و چیرۆکێن میسۆلوژی ڤە پەردەپۆش بکەت و ڤەشێریت.

 ژ لایەکێ ڤە ئەو خوە ب «پرۆمیسۆسێ» یۆنانی دزانیت د ناڤ کەڤرێن ئیمرالیێ دا و ژلایەکێ دی ڤە دبێژیت ئەز دەروێشێ عەدولێ مە، ژ لایەکێ دی ڤە ئۆجالانی ل ئیمرالیێ ب نڤیسینا 8 پرتۆکان رۆژانە تێرم و زاراڤێن تیۆری یێن نوو بکاردئینیت و دئێخیتە د ناڤ مێشکێ کوردان دا وەک: «کۆنفیدرالیزم، کۆمارا دیمۆکراتی، مودێرنیتا دیمۆکراتیک، نەتەوه‌یا دیمۆکرات…ھتد».

ئەو ب ھەموو ڤان گۆتن و زاراڤێن تیۆری، میسۆلۆژی، داستان، فەلسەفە و ھۆزانان دخوازیت راستییا روودانێن ل ئیمرالیێ ب ڤەشێریت.

ب روژەکێ پشتی ئۆجالانی دئیننە تورکیا ئانکو ل 16ی شوباتێ وی ڤەدگۆھێزنە گرتیخانه‌یا ئیمرالیێ یا ل بن چاڤدێری و پاراستنا بلند یا دەولەتێ، ب بەردەوامی زانیاری د ھاتنە دان بۆ راگەھاندنێ سەبارەت ب وان گۆتوبێژێن د ناڤ دادگەھێ دا دھاتن و دچوون کو پشتی گرتنا ئۆجالانی ب ماوەیه‌کێ کورت لێپرسینا وی دەستپێکر.

ل وان رۆژان د رۆژنامەیان دا مانشێت‌ ب بەردەوامی ل دۆر گۆتنێن ئۆجالان یێن دادگەھێ هه‌بوون كو ئۆجالان گۆتییه‌: «وی چەک ژ یۆنانستانێ وەرگرتییە، ئۆجالان ناڤێن ھەموو کادر و به‌رپرسێن بلند یێن پەکەکێ ئاشکرا کرینە، ئۆجالان دیسان دبێژیت ئۆلۆڤ پالم سەروک وەزیرێ بەرێ یێ سوێدێ ژ لایێ هه‌ڤژینا خوه‌ڤه‌ هاتییه‌ كوشتن»، بەلاڤبوونا ڤان دەنگوباسان د راگەھاندنێ دا بوونە ئەگەرێ وێ چەندێ کو گەلێ کورد د دل و دەرۆن دا بھێنە بریندار کرن.

دەولەتێ ژی ژ بۆ وێ چەندێ کو رێزا و كاریگه‌رییا ئۆجالانی ل دەڤ کوردان لاواز نەبیت ئەڤ شێوێ دەنگوباسان راوەستاندن، ئێدی روژنامەیان سیاسه‌تا خوه‌ گوهارت و وان بەلاڤکر کو ئۆجالانێ تیرۆریست یێ گەفان ل دەولەتێ دکەت و مانشێتێن وەک «ئۆجالانی دا دیار کرن کو ئەو دێ شەری کەن».

ده‌وله‌تێ ژ ئه‌ڤێ چه‌ندێ دڤییا ئۆجالان وەکو قه‌هره‌مانه‌كێ مەزلووم یێ دەستەسەر کری و جەنگاوەرەک ژ بۆ گه‌لێ كورد بده‌ته‌ دیار كرن.

دادگەھا ئۆجالانی كو ل 31ی گولانێ دەسپێکربوو ل 29ی خزیرانێ و ب ئەنجامێ بریارا سێدارەدانێ ب دوماھی هات، ل وی ده‌می دەنگێن نه‌رازیبوونێ ل سەر وێ چەندێ هه‌بوون ئەوا ل دادگەھێ روودایی و هه‌لوه‌ستێ ئۆجالانی ب نەلایەقی کورداتیێ و مێژوویا کوردان هاته‌ دیتن، د ناڤ لایەنگر ھەتا ل سەر ئاستێ کادرێن مه‌زن یێن پەکەکێ ژی دوور كه‌تن چێبوو، لێ ل بەرانبەر ڤی هه‌لوه‌ستی ژی په‌كه‌كێ بەرسڤێن ئامادە کری ھەبوون و ب ڤی شێوەیی: «ئەرێ ما ھوون ل ھیڤییا وێ چه‌ندێ بوون كو رێبه‌رێ مه‌ به‌ره‌ڤانییه‌كا كلاسیك ژ خوه‌ بكه‌ت»، سەرۆکاتی ب هه‌لوه‌ستێ پیلانگیریێ ھاتە دۆراندن، ئۆجالان ب خوە ژی وان ھەموو پارێزەران ب سیخۆر د دەتە دیار کرن ئه‌وێن داخواز دکرن کو ئۆجالان ب رژدی بەرەڤانیێ ژ خوە و دۆزا خوە بكه‌ت»، ئۆجالان نەتاوانبارە بەلکو بەرەڤانیکرنا کلاسیکی تاوانبارە.

 لێ یا راست چ بەرەڤانیکرنێن کلاسیک و مودێرن نینن، یان دێ بەرەڤانیێ ژ خوە کەی، یان ژی دێ دەستان داهێلی و بزاڤێ كه‌ی خوە نێزیکی دەولەتێ بكه‌ی.

ئۆجالانی ھەم ل بەرانبەر نەتەوه‌یا کورد و ل دژی کوردان، ھەم ژی ل دژی ھێزێن دی یێن نێڤدەولەتی کەتە ناڤ برێڤەبرنا پەیوەندیێن خوە نێزیکرنێ دا دگەل دەولەتێ، پرسا پیلانگیریێ د بنەرەت دا دبێژنێ (کۆمپلۆ) لێ ل سەر ئاستێ نێڤدەولەتی، ئەڤ چەندە ژی دێ بیتە ئەگەرێ ساریاتییا روویێ ئیسرائیل، ئەمریکا و بەریتانیایێ ل دەڤ کوردان، ھەتا وی رادەی کو نزانین کەنگی ئەڤ گۆتنە ژی ھاتییە گۆتن، ئەجەویتی گۆتنەک ھەیه‌ کو دبێژیت: «ئەرێ ژ راستا بۆچی ئەمریکا ئۆجالان رادەستی مە کر»! ئۆجالان و پارتییا وی ب بەردەوامی ڤێ گۆتنێ د ناڤ داخویانێن خوە دا ب کار دئینن، ئارمانجا ڤێ چەندێ ژی ئەوە کو پێگەھێ تورکیا و رۆلێ وێ د دەستەسەرکرنا ئۆجالانی دا پەردەپۆش بکەن.

ل جه‌م ئۆجالان ئیسرائیل، ئه‌مه‌ریكا و بریتانیا تاوانبار‌ن نه‌ توركیا

ئەڤە ژی بۆ وێ چەندێ یە کو ئۆجالان بێ ئەگەر کوردان بکەتە دوژمنێن جوهی و ئەمریکییان و وێ ھزرێ د سەرێ کوردان بچینیت کو وان چ رێک ژ بلی تورکیا نینن.

تورکیا ژ بۆ وێ چەندێ کو ئۆجالان ژ ئیتالیا ب دەرکەڤیت، ماوەیەکی بایکوتا ئیتالیا كر، ھەروەها ل بەرانبەری ڤێ چەندێ ژی رووسیا قەرەبوویا خوە یا ئابووری ژ تورکیا وەرگریت، ل ڤێرە ئەرێ بۆچی تاوانبار ئیسرائیل و ئەمریکا نە، ئەڤە ژی بۆ وێ چەندێ یە کو ئۆجالان بێ ئەگەر کوردان بکەتە دوژمنێن جوهی و ئەمریکییان و وێ ھزرێ د سەرێ کوردان بچینیت کو وان چ رێک ژ بلی تورکیا نینن.

سێدارەدانا ئۆجالانی د نوکە دا رۆژەڤە، رۆژانە تورکیا ل وان رێکان دگەریت کو سێدارەدانا ئۆجالانی و رەواتییا وێ ب گەلێ تورکیا بدەتە قەبوول کرن، ھەموو راگەھاندن تەکەزێ د داننە سەر وێ چەندێ کو ئەگەر ھات و ئۆجالان ھاتە سێدارەدان ئەو دێ بیتە قه‌هره‌مانه‌كێ نەمر و دێ شەرێ کورد – تورکان ده‌ستپێكه‌ت و پرۆباگندەیان دكه‌ت کو ئێکەتییا ئەورۆپا و ئەمریکا ناھێلن ئەم وی سێدارە بدەین.

ئۆجالان د ماوەیێ برێڤەچوونا گەرێن دادگەھا خوە دا نیازا خوە یا پاک بۆ دەولەتێ د دەتە دیار کرن

 ئۆجالان ژی ب بەردەوامی دبێژیت: «ھەر چنە بیت، پێدڤی یە ژ پێخەمەتی دەستەبەرکرنا ئاشتیێ ئەز یێ ساخ بم» و ئەو لێبۆرینا خوە ژ لایێ دەولەتێ ڤە دکەتە رۆژەڤ.

ئۆجالان د ماوەیێ برێڤەچوونا گەرێن دادگەھا خوە دا نیازا خوە یا پاک و پاقژ ب دەولەتێ ددەتە دیار کرن و بۆ ڤێ چەندێ ژی ئاگربەستان ژ پەکەکێ داخواز دکەت.

ل 29ێ خزیرانێ دۆسییا ئۆجالانی دھێتە گرتن و دادگەهـ بدوماھی دھێت ب ئەنجامێ دەرکرنا سزایێ سێدارەدانێ ژ بۆ ئۆجالانی، ئۆجالان ژی ب گۆتنێن مانێ دەیکا من ژی تورکە، ئەز داخوازا لێبۆرینێ ژ ھەوە دکەم، دکەڤیتە لاڤەیان، لێ دەولەت سەرەرایی ڤێ چەندێ ھەموویێ وی سزا ددەت ب سزایێ سێدارەدانێ، لێ د ماوەیێ دەرکرنا ڤی سزایی دا، «داوه‌ر پێنۆسی ناشكێنن» كو ئەڤە ژی نیشانێن وێ چەندێ نە ئەڤ سزایە جێبەجێ نابیت.

کورد دلگران و پەریشان بوون ل بەرانبەر دەرچوونا ڤی سزایی ژ بۆ سەروکێ وان، لێ سەرۆک ب بەردەوامی دەست ل دلێ دەولەتێ ددەت، سێدارەدانا وی نەبابەتێ ل سەر راوەستیان و جێبەجێ کرنێ یە ژ لایێ دەولەتێ ڤە، ژ بەر کو ئەو کوردێن ئەڤە سەرێ چەندین سالانە دەولەت لێ دگەریت کو ب رێیه‌كێ وان برێڤە ببەت، نوکە سەرۆکەک دیتییە کو د دەستێ وان دایە و یێ کوردان برێڤە دبەت.

دەولەت د ناڤخوەیی یا خوە دا و ب بەرده‌وامی د ناڤ دانوستاندن و ھەڤدیتنان دا یە دگەل ئۆجالانی، ب تایبەت ژی دەزگایێ ھەوالگیرییا نشتیمانی (میت) بۆ وێ چەندێ سێدارەدانا ئۆجالانی بەربەست بکەت حەز کرییە بەرەیەکێ نێڤدەولەتێ ل دژی ڤێ چەندێ دروست بکەت، ئەو بوو و ل دوماھیێ ل 3ی تەباخا 2002ێ تورکیا سزایێ سێدارەدانێ ل سەر وی راکر.

ئەرێ پا ئۆجالانی چ قەرەبوو ل بەرانبەر ڤێ چەندێ دا! د ڤەکۆلین و لێپرسینێ دا چ ھاتە روودان و گەریلا ژی بۆچی پاشڤە زڤرین؟ دێ د بەشێ سێیێ دا، ئه‌مێ ئەڤێ چەندێ هه‌موویێ روهن کەین.