عەباس مۆسەوی، بەردەڤکێ وەزارەتا دەرڤە یا ئیرانێ هشیاری دا کو “لڤینێن سەربازی یێن ئامەریکایێ د ناڤا خاکا ئیراقێ دە دکارە ناڤچەیێ بەر ب نەئارامی و رەوشەکە خەراب ببە”.
مۆسەوی، ئەڤ لڤینە “بەرەڤاژی خواستەکا فەرمی و راگهاندی یا حکوومەتا ئیراقێ، پەرلەمان و گەلێ ئیراقێ دا ناساندن”.
ئەڤ یەک د دەمەکی دە یە کو پێش دو رۆژان ئامەریکایێ راگهاند ژ بوو پاراستنا هێزێن خوە ل دژی ئێریشێن ژ نیشکەکێ ڤە یێن ئیرانێ و هەڤالبەندێن وێ، ل هنەک پێگەهێن خوە ل ئیراقێ وێ سیستەما مووشەکی یا پاتریۆت بنەجی کن.
پێگەها نووچەیان ئا فرانسا دبێژە کو یەک ژ ڤان سیستەمێن بەرەڤانیا ئاسیمانی ل پێگەهەکێ ل هەولێرا پایتەختا هەرێما کوردستانێ هاتیە دانین و بریارە دو یێن دن ل کوێتێ بهێنە هنارتن ژ بوو ئیراقێ.
ل سەر ڤێ یەکێ بەردەڤکێ وەزارەتا دەرڤە یا ئیرانێ داخواز ژ هێزێن ئامەریکایێ کریە کو “رێزێ ل داخوازیێن گەل و حکوومەتا ئیراقێ بگرن سەبارە دەرکەتن ژ ڤی ولاتی و چ دی رەوشێ ل ناڤچەیێ ئالۆز تر نەکن”.
تێ زانین کو د دەما دو مەهێن دەرباس بوویی دە هنەک پەڤچوون دناڤبەرا هێزێن ئامەریکایێ و ملیسێن شیعی یێن سەر ب ئیرانێ ڤە وەکە ملیسێن حیزبالله روو دابوون.
