په‌كه‌كە دخوازە دەولەتا ترک کێشی سلێمانیێ بکە

په‌كه‌كە دخوازە دەولەتا ترک کێشی سلێمانیێ بکە

ژ كه‌جه‌كێ دەربارێ یه‌نه‌كێ دە داخویانییەک بالکێش

د 26 خزیرانێ دە، کۆنسەیا رێڤەبەر یا كه‌جه‌كێ، داخویانییەک بەلاڤ کر، د ڤێ داخویانیێ دە ئەو ئێریشا دەولەتا ترک كو ل سەر «کونەماسی» یا سلێمانیێ کری ھاتبوو نرخاندن.

په‌كه‌كێ د ڤێ داخویانیێ دە، ھەبوونا خوە یا ل سلێمانیێ فەرمی دکر، وەکە ھوون دزانن وەزیرێ کاروبارێ دەرڤە یێ ترکیێ مەولوود چاویشئۆغلو گۆتبوو: «په‌كه‌كه‌ داکەتییە باژارێ سلێمانیێ و ور کۆنترۆل دکە» ل په‌ی وی رە ژی سەرۆکێ پارتییا «گه‌لێ نه‌ژادپەرست» دەولەت باخچەلی ھندەک ئاخفتنێن وەکە چاویشئۆغلو کربوون، ژ ڤان ئاخفتنێن ھاتین کرن دیار دبە کو وێ سلێمانی بھێتە ئارامانج کرن.

ئەڤ ئاخفتنا په‌كه‌كێ ژبۆ ترکان وەکە بانگاوازییەکێ یە کو ببێژن: وەرن ئەز ل ڤرم

د سه‌ر ڤێ یەکێ ره‌، په‌كه‌كێ د داخویانییا خوە دە د گۆت: «بەلێ ئەم ژمێژڤە ل سلێمانییێ نە»، ڤێ بەیانەتا په‌كه‌كێ ژ گەلەک ئالیێن سیاسی ڤە ب شک نێزیکبوون ژێرە ھاتە کرن، پارتییە کی د ناڤا لیستا تەرۆرێ دە و ژ بۆ کوشتنا رێڤەبەرێن وێ پەرە ھاتین تەرخان کرن چاوا ب ڤی ئاوایی «ئەز ل سلێمانیێ مە و نکارن مە ژ ور دەربخن» دکارە باخڤە، ئەڤ ئاخفتن ژ بۆ ترکان وەکە بانگاوازییەکێ یە کو ببێژن: «وەرن ئەز ل ڤرم«.

په‌كه‌كێ د بەرچاڤ کرنا ھەساسیه‌تان دە دوو ستانداردان نیشان ددە، ب وێ ئێریشا ل سەر کونەماسیێ چێبوویی و نیشاندانا دیمەنێن برینداربوونا زارۆک و سڤیلان، ترکییە خستە د ناڤا تەنگاسییەکێ دە، لێ پشتی بوویەرێ ب دوو رۆژان، پژاکێ/په‌كه‌كێ د داخویانییەکێ دە گۆت: «ئەو سەیارا ھاتی ئارمانج گرتن یا مەیە.«

پشتی ڤێ داخویانییا پژاکێ، ئەو سیبەرا ل سەر ئێریشا دەولەتا ترکیێ ل کونەماسی یێ رابوو، لێ بەلێ بەریا چەند رۆژان ل کۆبانی گوندێ «ھالیجە» سیھایێن ترکا ھندەک سڤیل کربوون ئارمانج و د وێ ئێریشێ دە ئەنداما رێڤەبەر یا کۆنسەیا که‌ژه‌کێ «لەیلا وان» ژیانا خوە ژ دەست دا بوو.

په‌كه‌كێ ژ بۆ ئەڤ ئێریشێن ل رۆژئاڤا مەشروع نەبن ب فەرمی باس ل رێڤەبەرا خوە «لەیلا وان»، نەکربوو.

ئەو ھەساسییەتا ژ بۆ رۆژئاڤا رابەرکری ژ بۆ سلێمانیێ نیشان نەدا، ژ بەر کو ئاجیندایەکی په‌كه‌كێ ڤەشارتی ھەبوو، ڤێ ئاجیندایێ کەسێن ب ئارمانج نێزی مەسەلێ دبن د کارن ببینن.

ترک ھەرسال 15-20 کم ئاخا باشوور داگیر دکە

په‌كه‌كێ باشوورێ کوردستانێ کر قادا شەر و د بەرژەوەندیا خوە دە د بینە، په‌كه‌كه‌ ھەر سال بھارێ دبێژە: «پلانا ترکان ھەیە کو باشوور داگیر بکن، لێ ئەمێ ئیجازێ نه‌دن وان کو ئەو بکارن وەرن».

د ئێنجام دە دەولەتا ترک ھەرسال 15-20 کم ئاخا باشوور داگیر دکە، په‌كه‌كه‌ خوە شووندە ڤەدکێشە، ژ بۆ دەمۆکراتیزە کرنا ترکیێ و ھەلوەشاندنا فاشیزما ئاکه‌پێ-مه‌ھه‌پێ و ل گەل ڤێ ب ئارمانجا دامەزراندنا «براتییا گەلان» گوندێن باشوورێ کوردستانێ تێنە بۆردۆمان کرن، رەزێن گوندییان دھێنە سۆتن، مرۆڤ د مرن، کێمەک مایە کو په‌كه‌كه‌ شەری بگەھینە سینۆرێن دھۆک و ھەولێرێ.

ژ بەر چ ئەردنیگارییا کوردستانێ ب ھنجەتا تەکۆشینا دەمۆکراتیک کرنا ترکیێ دە دھێتە فەدا کرن، ژ بۆ چ جوانێن کورد تێنە کوشتن؟ بۆچی باشوورێ کوردستانێ باجا دەمۆکراتیک کرنا ترکیێ بدە.

په‌كه‌كه‌ د بن ناڤێ پەیڤا قەھرەمان، شەھید و بەرخوەدانێ دە گرسەیا خوە بێھۆش دکە، لێ بەلێ ژ بۆ خوە پۆلیتیکایەکی بەرژەوەندپەرست په‌یره‌و دکە، په‌كه‌كه‌ ژ بۆ بەرژەوەندییا خوە دکارە ھەموو کەسی، باژاری، چیا و ھەر تشتی فەدا بکە.

ل سالا 2015-2016ان نسێبین، جزیر، سلۆپی و گەڤەر فەدا کرن، نوکە ژی گه‌را باشوورێ کوردستانێ یە.

په‌كه‌كه‌ ژ بۆ بەردەوامییا ھەبوونا خوە، شەر کێشی باشوورێ کوردستانێ کر، ب ڤی ئاوایی دخوازە ل باشوور ژ بۆ خوە ده‌رفه‌تا دەستھلاداریێ ئاڤا بکە و په‌كه‌كه‌ ژ بۆ بەرژەوەندیێن خوە دکارە ھەر نرخەکێ فەدا بکە.

په‌كه‌كه‌ وه‌كه‌ «دژمنێ» خوە بوویە، ئەقلییەتا دەستھلاتبوونا په‌كه‌كێ و یێ دەولەتا ترک یه‌كه‌، چاوە کو ترک ژ بۆ «مایینا دەولەتێ» خوەدییا تێگەھا کو «ژ بۆ دەستھلاتا خوە دکارە برایێ خوە ژی بکوژە» ھەمان تێگەھ د په‌كه‌كێ دە ژی ھەیە.

په‌كه‌كه‌ و دەولەت وەکە جێمكانه‌، د ھەر ئالی دە ئه‌و وه‌ك ھەڤن، په‌كه‌كه‌ ژی دخوازە نوكه‌ ژ بۆ پێشەرۆژا خوە ھەموو باشوورێ کوردستانێ فەدا بکە.

په‌كه‌كه‌ ل باشوور کو بگەھە ئارمانجێن خوە د پێشیێ دە دخوازە ناڤبەرا وان پارتیێن سییاسی یێن کو ھەنە خه‌راب و ئالۆز بکە، بەردە ھەڤ.

په‌كه‌كه‌ ڤێ یەکێ باش دزانە کو ھەر چەند د ناڤبەرا په‌ده‌كێ و یه‌نه‌كێ نەخوەش بە ژی، لێ د گەل ھەڤ د ناڤا پێوەندییەکی ھەبوونێ دا نە، ئەڤ ھەردوو رێخستن ل سەر دیالێکتا ناکۆکی و تێکلی ھەنە، تونەبوونا ئالییەکی دھێتە واتەیا تونەبوونا ئالیێ دن ژی.

په‌كه‌كێ ئەو دیالێکتا د ناڤبەرا په‌ده‌کێ-یه‌نه‌كێ دە فەھم کرییە، دخوازە ناڤبەرا وان تێک ببە کو ھەردوو ب ھەڤرا لاواز ببن.

ئارمانجا په‌كه‌كێ لایەنگرییەکە ڤەکری ژ بۆ یه‌نه‌كێ نیشان بده‌، سیاسەتا په‌كه‌كێ یا دژی رێڤەبەرییا ھەرێما کوردستانێ وەکە یا دەولەتا ترکە «پارچە بکە، بەلاڤ بکە و ب رێڤە ببە«.

په‌كه‌كه‌ ل گەل پارتیێن باشوورێ کوردستانێ د ناڤا ترافیکەکێ ھەڤدیتنان دا یە، د ئەساس دە ئەڤ ھەڤدیتن نە ژ رێزگرتنا «یەکیتییا نەتەوەیی» یە؛ لێ به‌لێ ژ ئارەزوویا په‌كه‌كێ یا پارچه‌ كرنا رێڤەبەرییا باشوور «پارچە بکە،به‌لاڤ بکە و برێڤە ببە»، دھێت.

كه‌جه‌كێ د داخویانییا خوە دە دبێژە: «دەولەتا ترک دخوازە په‌كه‌كه‌ و یه‌نه‌كه‌ وەرن ھەمبەری ھەڤ»، گەلۆ چما كه‌جه‌كه‌ باس ل وێ یەکێ ناکە کو دەولەتا ترک په‌كه‌كێ دشینه‌ سەر رێڤەبەرییا باشوور؟

رێڤەبەرییا كه‌جه‌كێ د داخویانییا خوە دە ناڤێ «ئیبراھیم ئەھمەد و جەلال تالابانی» ل گەل ھەڤ یاد دکە و دبێژە: بنگەھێ دۆستینییا مە دگەھە ڤان ھەر دوو ئالییان.

ب ڤی شێوازی پەیاما خوە دگەھینە ھەردوو ھێزێن د ناڤا یه‌نه‌كێ دە، لێ بەلێ ژ دەسپێك، نرخاندنا په‌كه‌كێ ل دەربارێ مام جەلال و یه‌نه‌كێ دە ئاشکەرانە، په‌كه‌كێ و سەرۆکێ وێ عەبدوللا ئۆجالان ژ بۆ جەلال تالابانی دگۆت: «سیاسیێ فاحیشە» و ب توندی یه‌نه‌كه‌ رەخنەدکر، نوکە ژی ب داخویانی دخوازن ل سەر ڤان ھەموو تشتان بگرن.

ب کورتی: داخویانییا  كه‌جه‌كێ یا 26 خزیرانێ ژبلی مەشروع کرنا ئێریشا ل سەر سلێمانیێ چ ئارمانجێن دن نینن.

په‌كه‌كه‌ ژ بۆ بەرژەوەندیێن خوە باشوور فەدا دکە، په‌كه‌كه‌ ژ بۆ ھەردوو ھێزێن باشووریێن مەزن بەردە ھەڤ پیلانێن فتنە و فەسادی جێدکە، په‌كه‌كه‌ و دەولەتا ترک د ناڤا ھەڤپشکیێ دە ھەولددن کو خوە بگەھینن ئارمانجا دەولەتا ترکیا «میساقا میللی» ھەموو پیلانگێری و خەبات ژ بۆ ڤێ ئارمانجێ تێن مەشاندن.

پوستێن ھەمان بەش