“گەر ل ئاسیمانان بارانا ئازادیێ ببارە، هنەک کۆلە وێ سەیوانان هلگرن”
د دەمەکێ دە کو داگیرکارێن کوردستانێ ب هەموو جوداهی و ههڤدژییا بەرژەوەندیێن وان دگەل هەڤ، ل همبەر کوردستانێ و دۆزا سەروەرییا کوردان هەڤگرتی، «سیاسەتا نەرم» (Soft power) و «سیاسەتا رەق» (Hard Power) یا خوە بۆ ژ ناڤ برنا ستاتۆیا سیاسی یا کوردان پێش تێخن، بەشەک ژ جڤاکا کوردی بێ هەست کرن ب ئاستا خەتەرەییا پێلانا داگیرکاران، ب هنەک بابەتێن نە سەرەکە ڤە هاتینە مژوول کرن و ل همبهر ڤێ ژی هنەک کەس ژی دەهۆلا خیانەتێ لێددن و ب ئەشکەرە داخوازا هەلوەشاندنا ستاتۆیا سیاسی یا کوردان دکن.
باشوورێ کوردستانێ، پشتی چەندین سالان ژ شەرێ تەرۆرێ و پرسگرێکێن ئابووری و دربا خیانهتێ و دەهان پرسگرێکێن دن یێن ناڤخوەیی و دهرهكی، دەست ئاڤێتبوو چاکسازییان و دەم هاتبوو جارەکە دن بکەڤە سەر رێیا پێشکەتن و ئاڤەدان کرنێ، لێ بەلێ داگیرکارێن کوردستانێ جارەکە دن ب هنەک پیلانێن نوو دەست ئاڤێت تەنگ کرنا هەناسەیا کوردستانێ، ژ ئەنجاما سیاسەتا رەق یا داگیرکاران هەر وەکە ئەم دبینن بەشەک ژ خاکا باشوورێ کوردستانێ ژ ئالیێ داگیرکارێن ئەنقەرە و تەهرانێ ڤە هاتییە داگیر کرن، هەر وەک وەزارەتا پێشمەرگە راگهاندی ترکیێ پێتر ژ 20 کیلۆمەتران و ئیران ژی 10 کیلۆمەتران هاتینە د ناڤا سینۆرێن باشوورێ کوردستانێ دە.
دبە داگیركاران ژ بۆ شکاندنا کوردان مفا ژ ئامرازێن رەق وەرگرتبە، لێ بەلێ ژ بۆ جێگیرکرنا وان دهستكهفتێن خوه وان پێویست ب سیاسەتا نەرم ههبوو
لێ بەلێ یاکو ئەڤ جارە خەتەرییا وێ ل سەر بزاڤا رزگاریخوازا کورد زێدەتر کرییە، ئەو نەرمە سیاسەتن یێن کو داگیرکارێن کوردستانێ و ب تایبەتی ئیران بکار تینه، گەر ل دیرۆکا کوردان مێزە بکین وێ ب زەلالی ژ مە رە خوەیا بە كو بجیکرنا پیلانا داگیرکاران و ئەو دەستکەفتێن د وارێ سەربازی دە ب دەست خوە خستی بێ سوود وەرگرتن ژ «سیاسەتا نەرم» یا سەرکەفتی نەبوویە، ب واتایەکە دن دبە ژ بۆ داگیرکرن و شکاندنا کوردان سوود ژ ئامرازێن رەق وەرگرتبە، لێ بەلێ ژ بۆ جێگیرکرنا وان دەستکەفتێن کو ب رێکا ئامرازێن رەق ب دەست خوە خستی وان پێویست ب سیاسەتا نەرم هەیە.
بۆ میناک درستە کو کەرکووک ب هێزا «تانک و تۆپ و هێزا بەژایی» ڤە هات داگیر کرن، لێ بەلێ یاکو هەیا نها ئەڤ داگیرکاری ب جی کری، ئەو دووراتی بوو کو د ناڤبەرا هیزێن کوردی دە دروست کربوو، جیێ داخێ یە کو ب خیانهتەکە قرێژ کەرکووک و بەشەکە دن ژ خاکا کوردستانێ جارەکە دن هاتن داگیر کرن، ههموهخت خیانهتکاران بانگەشە ژ بۆ داگیرکاران دکر و دگۆت بلا گەلێ کورد جارەکە دن ڤەگەرە کەرکووکێ، ب درەو دکر قێری ژیان ل کەرکووکێ نۆرمالە و وێ کوردەکی بکین پارێزگهر و ئەم ب خوە دێ ب سەربەستی روونن و دۆمینایێ کین!!
بەرخوەدانا کورد و پێشمەرگەیێن قههرهمان ل همبەر تەرۆریستێن داعشێ و دەنگڤەدانا قارەمانییا پێشمەرگەیان ل ئەنیێن شەر وەها کر کو دەولەتێن رۆژئاڤا زێدەتر بال بکشینن سەر کوردستانێ و ژ بۆ وان ئەشکەرە بوو کو ل رۆژهلاتا ناڤین یا پڕ پرسگرێک و کریز دە، د ڤێ رۆژهلاتا ناڤین یا دیکتاتۆر دروستکەر و ئازادی کوژ دە، چاندەک ئازادی خواز، مرۆڤێن ئاشتیخواز ب تەنا سەرێ خوە مانە و ژ بلی چیایێن ولاتێ خوە چ دوستەک دن نینە، بێ گۆمان ناسینەک زێدەتر یا دەولەتێن رۆژئاڤا ل سەر چاند و هزرا پێشکەفتنخواز یا کوردان، سەقایەک گونجای ژ بۆ بزاڤا رزگاریخوازا کوردان خولقاند، رایا گشتی یا رۆژئاڤا هەڤدەم دگەل بەرژەوەندیێن گشتی یێن ولاتێن رۆژئاڤایی وها کر کو دەستهلاتێن دەولەتێن زلهێز ب گرینگیەکە زێدەتر ل رۆل و پێگەها کوردان و چاندا وان یا پێشکەفتی هەر وها جەنگاوەرێن ئازادیخوازێن وێ بنێرن.
بێ گومان گرینگی پێدانا دەولەتێن رۆژئاڤا ب کوردان و پهیوەندیێن وان یێن ب هێز دگەل حکوومەتا هەرێما کوردستانێ «وەکە تاکە ستاتۆیا سیاسی کو نوونەراتییا نەتەوهیا کورد دکە»، دوژمنێن کوردان و داگیرکارێن کوردستانێ زێدەتر هۆڤ کرن.
داگیرکارێن کوردستانێ ژ بۆ درب لێدانا کوردان و بزاڤا وان یا نەتەوهیی و هەر وها تێکشکاندنا ئیرادەیا رزگاریخواز یا گەلێ کورد کو ل ژێر سێبەرا سەرکەفتنێن پێشمەرگەیان ل سەر تەرۆریستێن داعشێ دە پێشڤەچوونەک بەرچاڤ ب خوە ڤە دیتبوو و ب ئەنجام دایینا رەفەراندۆمێ گهیشتبوو ئاستا خوە یا هەری ژۆر، ب دارێشتنا پیلانەکە خەتەر خوەست ڤان دەستکەفتیێن کوردان هەموویان ژناڤ ببن.
د ڤێ پیلانا خوە یا قرێژ دا، یەکەم جار ئێریشی کەرکووکا دلێ کوردستانێ کر و ب هەڤکارییا هەژمارەک کرێگرتی و کۆلەیێن خوە یێن د ناڤا باشوورێ کوردستانێ دە، بەشەک مەزن ژ خاکا باشوور داگیر کر و گەر بەرخوەدانا پێشمەرگەیان نەبایە وان بریار دابوو کو داویێ ب حکوومەتا هەرێما کوردستانێ و ستاتۆیا وێ یا سیاسی و ئیداری بینن، ههموهخت د بەشەکە دن یا پیلانا وان یا داگیرکاریێ دە، د دو قۆناغان دە، ئێریشی عەفرینێ و ناڤچەیێن دن یێن رۆژئاڤا کوردستانێ دا و بەشەکە مەزن ژ خاکا رۆژئاڤا داگیر کر.
نها ئەم دبینین د قۆناغەکە دن دا جەندرمەیێن ترکیێ و پاسدارێن ئیرانێ ب هێنجەتێن جودا دخوازن جارەکە دن خوینێ ل باشوورێ کوردستانێ برێژن، وها دیارە کو تو جاران ئەو ب خوینا کوردان تێر نابن، داگیرکارێن کوردستانێ نکارن کوردستانەکە سەرکەفتی و ئارام و خوەدی ئاساییش و ئاڤەدانی ببینن، نۆرمالە، ژ بەر کو ئەو باش فێم دکن كو بهێز بوونا کوردستانێ ل هەر بەشەکێ کوردستانێ به وێ کێنجەک ئەرینی ل سەر پارچەیێن دن یێن کوردستانێ ژی بکە و هەستا رزگاریخواز یا کوردان بەر ب پێش دبە و هێڤی و ئیرادەیا دەرباسبوون ژ کۆلەیی و بن دەستیێ ل جەم نەتەوهیا ژیردەست یا کورد و کوردستانا داگیرکری زێدە دکە.
گەر ل ئاسیمانان بارانا ئازادیێ ببارە، هنەک کۆلە وێ سەیوانان هلگرن
پر زەحمەتترین کار ئەڤ بوو کو بکاری کۆلەیەکی تێبگهینی تو کۆلە نینی و مافێ تەیە ب ئازادی بژی
لێ جیێ داخێ یە یاکو دەرد و کۆڤانا وێ سەد جاران پێترە ژ ئێریشا داگیرکاران و باجا وێ ژی دێ پێتر بە، ئەڤە کو هنەک کەس کو ل ناڤا جڤاکا کوردی دە داخوازا هەلوەشاندنا ستاتۆیا هەرێما باشوورێ کوردستانێ بکن و ژ بۆ لاواز کرنا کوردستانێ خەباتێ دکن.
ئەفلاتۆن چەند رند گۆت: «گەر ل ئاسیمانان بارانا ئازادیێ ببارە، هنەک کۆلە وێ سەیوانان هلگرن»، بێ گۆمان ژ بۆ گهیشتن ب ئازادیێ و دەرباسبوون ل کۆلەتیێ یەکەم جار پێویستە هزرا خوە ژ کۆلەیی و ژێر دەستیێ رزگار بکین، قانوون ب تەنێ نکارە کەسەکێ بگهینە ئازادیێ، گەر ئەو کەس ب خوە نەخوازە ئازاد ببە، هزرا کۆلەتی، چاندا کۆلەتیێ د ئافرینە و باوەر ب خوە نەبوون و خوە ب کێم زانین و خوە ب بچووک زانین ل ئاستا نەتەوهیا سەردەست و دەستهلاتا داگیرکاران، بەشەک ژ ڤەرێژا ڤێ چاندێ نە.
مرۆڤەک کو کاریبە زیهنیەتا خوە ژ کۆلەتیێ رزگار بکە، دێ باوەری ب شیانا نەتەوهیا خوە و بسپۆر و شارەزا و رێبەرێن نەتەوهیا خوە هەبە و دێ بزانبە وێ بکارن ب هەڤرە رەوشێن ژ وێ دژوارتر دەرباس بکن.
لێ کەسەک کو ئامادەیە ژ بەر بەرژەوەندیێن خوە یێن شەخسی راستەراست هزر د ژناڤبرنا سەروەری و سیاسەتا نەتەوهیا خوە ده بکە و باسی ژ ناڤ برنا وێ بکە، بێ گۆمان پەروەردەیا داگیرکاران ب ئاوایەک وەها کێنج ل سەر دروست کرییە کو هێژان نکاریە هزر و زیهنیەتا خوە رزگار بکە.
«هریت تابمێن» ژنەکە رەش پیست ئا ئامەریکی بوو کو د سەردەما کۆلەتیێ دە، گرۆپەک نهێنی ئاڤاکربوو و ئالیکارییا کۆلەیان دکر داکو باز بدەن و برەڤن، پاشان پرس ژ هریت تابمەن هات کرن گەلۆ دژوارترین کارێ تە د وێ قۆناغێ دە چ بوو؟ پشتی تێهزرینەک کوور، هەناسەیەک هەلکێشا و گۆت: «دژوارترین کار ئەڤ بوو کو کۆلەیەکی تێبگهینی ئەو نە کۆلەیە و مافێ وی یە ب ئازادی ژیان بکت».
کەس نکارە بێژە کو ستاتۆیا سیاسی- ئیداری یا هەرێما کوردستانا باشوور بێ کێماسیە و برێڤەبەرێن سیاسی و ئیداری یێن مەزن یێن ڤێ پارچەیا کوردستانێ ب خوە ژی دبێژن کێماسی هەنە و پرۆژەیێن جۆر ب جۆر ژ بۆ چارەسەر کرنا وان کێماسییان پێشنیاز کرنە و ل ژێر ناڤێ «پرۆژەیا چاکسازیێ» پارلامانتۆیا کوردستانێ ئەڤ پرۆژەیە پەژراندییە، د ڤان رۆژان دە وێ بکەڤە وارێ جی ب جی کرنێ دە، لێ کەسەکی کو عەقلێ وی هندک بە ژی وێ پڕ ب هێسانی وێ راستیێ بزانبە کو شانسێ چارەسەر کرنا ڤان کێماسییان د ناڤا باشوورێ کوردستانێ دە پڕ زیدەترە ژ وێ یەکێ کو ئەڤ کێماسی ژ ئالیێ دەستهلاتا گەندەل و دژە کورد یا ئیراقێ ڤە وەرن چارەسەر کرن، ئانکو هینجەتا نەهێلانا گەندەلیێ درەوەک ب شاخ زێدەتر تشتەک دن نینە.
راستییەک هەیە کو پێویستە ئالیێن سیاسی و کەساتیێن سیاسی ل باشوورێ کوردستانێ باش فێم بکن کو ستاتۆیا سیاسی یا هەرێما کوردستانێ مولکێ وان ب تەنێ نینە کو هەر دەما خوەست و پێ خوەش بوو بکارن ژناڤ ببن یان ژی بازارەک سیاسی ل سەر بکن.
نابە تو ئالییەک ژ بەر کو نکارە دەنگێ پرانییا گەل ب دەست بخە و نەگهیتە دەستهلاتێ ئێدی ژ بۆدژاتیکرنا ئالیێ سەرکەفتی هەموو سەروەرییا سیاسی یا باشوورێ کوردستانێ هەدەف بکت.!! مژارا سەروەرییا سیاسی یا هەر نەتەوەیهکی پهیوەندی ب چارەنڤیسا هەموو تاکێن نەتەوەیێ ڤە هەیە و سەروەرییا سیاسی یا هەرێما باشوورێ کوردستانێ ژی پهیوەندی ب هەموو کوردان ڤە هەیە و ب لاواز بوون و ژ ناڤ چوونا باشوور وێ ئاساییشا نەتەوهیی یا کوردان بکەڤە خەتەرەیەک مەزن و وێ ژناڤ بچە و کارەساتەکە مەزن ژ بۆ کوردان ل پەی خوە بینە کو پاشان ب چەندین سالێن دن ئەڤ یەک نایێ بەدەل ڤەکرن.
قەوارهیا سیاسی یا هەرێما باشوورێ کوردستانێ، پشتی کۆمارا کوردستانێ ل مەهابادێ، دوویەم سهمبولا سەروەرییا سیاسی و نەتەوهیی یا کوردانە ل کوردستانێ، بێ گۆمان پێکهاتەیێن سیاسی – ئیداری یێن هەرێما باشوورێ کوردستانێ پرشەنگدارترین و گرینگترین و ب بهاترین دەستکهفتیێن کوردانە د دیرۆکا هەڤچەرخ یا کوردان دە و بەرهەمێ خوین و خەبات و بەرخوەدانا گەلێ کوردە و هەر وەک چاوا هەبوونا وێ بوویە سەدەما هەلکێشان و بەرەڤ پێش چوونا مژارا کوردان د ئاستا ناڤدەولەتی دە و ههموهخت هێڤی و ئیرادەیا رزگاریخواز یا کوردان ل هەر چار پهرچەیێن کوردستانێ دە بەرەڤ پێش برییە، هەر ژ بەر ڤێ یەکێ ژ ناڤ چوونا وێ ژی وێ ببە سەدەما تێکچوون و وێرانبوونا ئاساییشا نەتەوهیی یا کوردان، هەموو هێڤی و ئارەزۆیێن رزگاریخواز یێن کوردان ژی وێ ژ ناڤ بچن و دێ ئیرادەیا نەتەوهیی ژ بۆ رزگار بوون ژ کۆلەتیێ بینە نزمترین ئاست.
ئەز ل باکورێ کوردستانێ ژیان دکم و هەست دکم ل بن دەستێ داگیرکاران ژیان کرن پیتر ژ مرنێ ب ئازارە، گەر ستاتۆیا باشوور نەمینە، نەتەنێ گەندەلی ب داوی نابە بەلکو وێ چەندین جاران پێتر ببە و دەردێ ژێر دەستییا داگیرکاران ژی وێ ل سەر زێدە بە
هێڤیدارم هەموو کوردێن رزگاریخواز یێن هەر چار پهرچەیێن کوردستانێ، رێخستنێن سیاسی و مەدەنی یێن کورد و هەموو ئەوێن هەستا نیشتیمانی و ئازادی و ئاڤەدانییا کوردستانێ هەی، ب هەڤرە ب رۆحەکە نەتەوهیی و ل سەر ئەساسا بەرژەوەندیێن نەتەوهیی یێن کورد و کوردستانێ ب هەڤگرتی و زانابوون ڤێ پیلانا خەتەر یا داگیرکاران ژناڤ ببن و رێ نەدن هنەک کەسێن خۆرۆجی ب فکارێن خوە یێن کۆلە کری، ب فیتا دوژمنان و داگیرکارێن کوردستانێ و ب هینجەتێن پۆپۆلیستی ب گەف ل سەر ستاتۆیا سیاسی یا هەرێما باشوورێ کوردستانێ، مان و هەبوونا مە یا نەتەوهیی و سەروەرییا نەتەوهیا مە ژێر پێ بکن.
هێڤیدارم ئەم هەموو ب هەڤرە ل همبەر وێ گەندەلیێ بسەکنین کو دوژمن د وارێ چاند و سیاسی و جڤاکی دە ل کوردستانێ بەرەڤ پێش دبن و ل ژێر ڤێ گەندەلییا کولتووری دە درەو و پرۆپاگندهیان و دزی و تەرۆر و ئۆپۆزیسیۆن و هەموو تشتەکی تەڤلی هەڤ دکن و مە بەر ب ئانارشیزمێ دبە.
وەرن تەکۆشینێ بکین پیرۆزیێن خوە یێن نەتەوهیی تێکلداری هەڤرکییا پارتایەتیێ نەکین، هەر کەسەکی رێز ل ئالا کوردستانێ نەگرت، هەر کەسەکی فکار د فرۆشتنا خاکا کوردستانێ دە کر، هەر کەسەکی بێ حورمەتی ل همبهر خوینا شەهیدان کر، و هەر کەسەکی باس ل نەمانا ستاتۆیا سیاسی یا هەرێما کوردستانێ کر، بێ کو هزر بکین ئەو د کیژان پارتیێ دە یە دارزێنین و وها ل وی بکین کو شەرمەزار ببە و ئێدی تو جارێن دن کەس نەوێرە باس ل پیرۆزیێن مە یێن نەتەوهیی بکە.
ئەم خوە رێزگرتنێ ل بهایێن خوە یێن نەتەوهیی نەگرین تو کەس ریز و حورمەتێ لێ ناگرە، حورمەتا ئینسانان گرێدایی یە ب شوناس و کەساتییا وی ئینسانی، کەسەک کو شوناسا خوە یا نەتەوهیی ژ دەست بدە یا راست وەکە ژیندارەکی زیدە یە د ناڤا جڤاکی دە و تو بهایێ خوە نینە.
دبە مە گازندە ژ حکوومەتا هەرێمێ، هەبن لێ بەلێ نابە ئەڤ ببە سەدەم سەروەرییا سیاسی یا نەتەوهیا خوە هەدەف بکین و خەتەرەیا ژ ناڤ برنا شوناسا کەسێن د ناڤا جڤاکا خوە دە دروست بکین، هەگەر سەروەرییا خوە یا سیاسی ژ دەست بدین ل وێ دەمێ تو تشتەک مە نامینە، مە وەکە ئینسان تو کەرامەت نامینە و وەکە چالاکییەک سیاسی ژی ئەڤ دەستهەلاتە وێ ژ ناڤ بچە و ل وێ دەمێ تو واتەیا ئۆپۆزیسیۆنێ ژی نامینە.
بلا ژناڤچوونا کۆمارا مهاباد بکین میناک ژ خوە رە و بزانین نەمانا وێ کۆمارێ کو ب تەنێ 11 مەهان دەستهلاتداری کر، شۆرشا رزگاریخواز یا کوردان تووشی چ زرار و کارەساتەکی بوویە، بێ گۆمان ئەو کارەساتا کو وێ ژ ئەنجاما تێکچوونا ستاتۆیا سیاسی یا هەرێما کوردستانێ ب قەومە وێ زۆر زۆر زێدەتر و مەزنتر بە ژ رەوشا پاش ژ ناڤ چوونا کۆمارا مەهابادێ.
ئەز ل باکورێ کوردستانێ ژیان دکم و هەست دکم ل بن دەستێ داگیرکاران ژیان کرن پیتر ژ مرنێ ب ئازارە، ب دروست کرنا گەف و خەتەرەیێ ل سەر تاکو قەوارەیا سیاسی یا کوردان، هێڤی و ئۆمێدێن مە ژی ل پارچەیێن دن یێن کوردستانێ ژناڤ نەبن، گەر ستاتۆیا سیاسی یا باشوورێ کوردستانێ نەمینە نە ب تەنێ گەندەلی ب داوی نابە بەلکو وێ چەندین جاران پێتر ببە و دەردێ بن دەستییا داگیرکاران ژی وێ ل سەر زێدە بە.
کوردستان ئاڤەدان بە
