لۆتکەیا چیایێ لینک دیسا هات بۆردۆمان کرن

ئێڤارا ئیرۆ رۆژا دوشەمی بالەفرێن شەر ئێن ترکیێ چار جاران ل پەی هەڤ ئاقارێ گوندێ هێتیتا کەڤن ل چیایێ لینک ل ناحیا دێرالۆک بۆردۆمان کر.

ل گۆر زانیاریێن پێگەها دارکا مازی کو ل چاڤکانیێن خوە ئێن باشوورێ کوردستانێ وەرگرتینە ئیرۆ دەمژمێر 6:45 خۆلەک چیایێ لینک ژ بال دو بالەفرێن جەنگی یێن دەولەتا ترکیێ ڤە د چارچووڤا ئۆپەراسیۆنا ل سەر پارتیا کارکەرێن کوردستانێ پەکەکێ دە، ل باشوورێ کوردستانێ هات هەدەف کرن لێ هەیا نها تو زانیاریەک ل سەر زرارێن ڤێ بۆردۆمانێ بەردەست نیە.

ئەڤ جارا سێیەمینە د دەما دو هەفتەیان دە کو هەمان جی ل چیایێ لینک تێ بۆردۆمانکرن.

ئەڤ دەما پێتر ژ مەهەکێ یە ترکیێ ب بەهانەیا هەبوونا چەکدارێن پەکەکێ د ناڤا هەرێما کوردستانێ دە، دەست ب ئۆپەراسیۆنا ئاسیمانی و بەژایی ژ بۆ سەر خاکا باشوورێ کوردستانێ کریە و ب درێژاهیا 40 هەیا 50 کیلۆمەترۆیان و کووراهیا 15 هەیا 30 کیلۆمەترۆیان هاتیە د ناڤا سینۆرێ باشوورێ کوردستانێ دە، ئەڤ یەک ژی بوویە سەدەما وێ یەکێ کو 198 گوند ل ناڤچەیا ئامێدیێ وەرن ڤالاکرن.