کۆلبەرەک کورد د ئەنجاما تەقەیا راستەراست یا ھێزێن لەشکەری یێن ئیرانێ ل دەڤەرێن سینۆری یێن باژارێ بانە ل پارێزگەھا کوردستانێ دە جانێ خوە ژ دەست دا.
ل گۆر زانیاریێن رێکخستنا هەنگاو ژ بۆ مافێن مرۆڤان ل رۆژهلاتێ کوردستانێ، رۆژا پێنجشەمێ، ١٣ێ تەباخا ٢٠٢٠ان، هێزێن زیرەڤانێن سینۆری یێن سەر ب سوپایێ پاسدارێن ئیرانێ ڤە ل سینۆرێ ناڤچەیا «هەنگەژال»ێ یا باژارێ بانە ب ئاوایەک راستە راست گولە بەردانە کۆمەک ژ کۆلبەرێن کورد و ب ڤێ یەکێ کۆلبەرەک ب ناڤێ «هادی خدری» یێ 22 سالی خەلکێ گوندێ «کەریم ئاوا» جانێ خوە ژ دەست دایە.
ل گۆری زانیاریێن هەنگاوێ، ئەڤ ھەموەلاتی ژ ھێلا ھێزێن لەشکەری ڤە بێی ھشیاریا پێشین و ل سەر گومانبارییا هەلگرتنا مادەیێن قاچاخ ھاتیە گولەبارانکرن. جەسەدێ ڤی کۆلبەرێ کورد ل جیێ ژ دایک بوونا وی ھاتە دەفنکرن.
کۆلبەری کارەک پڕ دژوارە کو مرۆڤێن ل دەڤەرێن سینۆری ژیان دکن ژ بەر تونەبوونا دەرفەتێن کار ڤی کاری ئەنجام ددن، و ھەر سال ب دەھان کەس ژ بەر خەتەرەیێن خوەزایی یان ژی گولەیێن راستەراست ژ ئالیێ پاسدارێن ئیرانی ڤە تێنە کوشتن ئان ژی بریندار دبن.
