پشتی پێنج سالان هەولێن دۆمدار ژ ھێلا کەس و کۆمێن مافێن حەیوانان ڤە، فیلێ ب ناڤێ «کاڤان»، کو بەرێ وەکی “فیلێ دین” دهات ناڤکرن، پشتی ٣٥ سالان د زندانێ دە ژ باخچەیێ حەیوانان ل پاکستانێ ھاتە دەرخستن و دێ د دەمەک کورت دە ژ بۆ ناڤچەیا پاراستی یا «کامبۆجێ» هێت ڤەگوھەستن.
ڤی فیلی پرانیا ژیانا خوە ل باخچەیێ حەیوانان ئێ ب ناڤی “مرغزار” ل ئیسلام ئابادا پاکستانێ دەرباس کریە، و ژ بەر رەفتارێن خراب ئێن دگەل وی هاتی ئەنجامدان، نیشانێن نەخوەشیا دەرۆنی ل وی پەیدا ببوون و پاشناڤێ “فیلێ دین” وەرگرتبوو. مژارەک کو بەرتەکێن بەرفرەھ ژ پارێزڤانێن مافێن حەیوانان رە ل پەی خوە ئانین و ژ بۆ بەردانا وی کامپانیایەک بەرفرەھ دمەشاند.
فیلەکە دن کو گەلەک سالان ب کاڤان رە ژیایە، د سالا ٢٠١٢-ئان جانێ خوە ژ دەست دایە، ژبەر ڤێ یەکێ ژیانا ڤی فیلێ بالا کۆمێن پارێزڤانێن حەیوانان ژ بۆ خوە کشاند. نەھەقی و رەفتارێن خراب ئێن دەرحەق ڤی فیلی هاتیە ئەنجامدان بەرتەکێن جیھانی ل پەی خوە ئانین و گەلەک کەسایەتیێن ناڤدارێن جیھانێ بەشداری کامپانیایێ بوون. ل سەر ئینتەرنێتێ پێتری 400 هەزار کەسان ئیمزا ژ بۆ سەربەست بەردانا ڤی فیلی کربوون.
حکوومەتا پاکستانی ژی ب ئەرێنی بەرسڤا ڤان داخوازان دا و بریار دا کو کاڤان بشینە جیەکە پاراستی ل «کامبۆجێ» دا کو ژیانا خوە یا مایی ب ئازادی د خوەزایێ دە دەرباس بکە. ئەمین ئیسلام یەک ژ وەزیرێن حکوومەتا پاکستانێ ژ مەدیاکاران رە راگهاند: “ئەم ب دلسۆزی ڤی فیلی سەربەست دکن و ھەول ددین ژیانەک باش ژ بۆ وێ پەیدا بکن،”.
