مزگینی و ئاگەهداری
دەمەکە درێژە کو ئەز ل سەر رۆمانا خوە یا دویێ یا ل سەر رەوشا زیندانا دیاربەکرێ کار دکم. من د ڤێ رۆمانێ دە خوەست ئەز رەوشا کەسێن دھاتن یان دچوون سەرەدانا زارۆکێن خوە، خوشک و برایێن خوە، باب و مامێن خوە، خالەت و مەتێن خوە، بنڤیسینم. ئەز زانم دەرەنگ ژی مامە. لێ ھەتا چ تو کەسان ل سەر ڤێ رەوشێ نەنڤیسین. لێ وەھا خویایە کو ئەڤ ژی بوو پارا من.
رۆمانا من “زێرەڤان” کو ھەتا نھا ب چەند زمانان دەرکەتیە، رەوشا گرتیان و تشتێن ل ڤر دئانین سەرێ مە ب دەڤێ زێرەڤانەکێ وێ زیندانێ ھاتبوو نڤیسێن.
لێ من دیت کو ئەم وەکە گرتیێن وێ زیندانێ کێماسیەک ھشت یان ژی ژ بیر کرییە کو مە رەوشا کەسێن دھاتن زیارەتا مە، نەنڤیسیە. دەما من بریارا نڤیساندنا ڤێ رۆمانێ دا، من خوەست کو ئەڤە ژی وەکە رۆمانا “زیرەڤان” ل سەر ئەساسێ راستیێ بهێت نڤیسین. لۆما ل گۆر ئیمکانێن من ھەبوون. من ل سەر ئینتەرنێتێ لگەل مالباتێن کو ل وێ زیندانێ دبوون رێوی ھەڤپەیڤین ئامادە کرن.
دوڤرا من نێزیکی مەھەکێ ژی ب کەچا خالێ خوە یا ب ھەردو لنگێن خوە سەقەت، لێ ئەو ژی وەکە گەلەکان ھەر رۆژ ل بەر دەریێ وێ زیندانێ بوو، ھەڤپەیڤین ئامادە کرن کو رۆمانێ بنڤیسینم. لۆما وێ دگۆت و من ژی دنڤیسی. ب راستی وەحشەت و تشتەکی وەھا دەرکەت کو نە باوەرم ل ڤێ جیھانێ ھاتبە سەرێ چ مللەتان و ژنێن وی مللەتی. لۆما ئەڤ رۆمانە دێ بیتە رۆمانەکا دەنگێ ژنێن کورد، گازی و ھاوارا وان یا ل بەر وی دەریێ. ھەر ھاتنەکا وان یا ور روو ب روویێ چ دبوون د ڤێ رۆمانێ دە زەلال دبە.
ئەڤ رۆمانە نە رەوشا گرتیێن د وێ زیندانا دیاربەکرێ یا ب ناڤێ 5 نۆلییێ یە، ئەڤ رۆمانە دێ ئێش و ئازارێن دایک و خوشکێن مە، باب و برایێن مە دیتین، ئێشا دەستگرتیان و یێن نوو زەوجیبوون ل بەر وی دەریێ چ دھات و ھاتبوو سەرێ وان زەلال بکە. سەدەما گەلەک خوەکوشتنێن کەچ، قیز و ژنێن کورد د ڤێ رۆمانێ دە زەلال دبە.
من ھەڤپەیڤینێن ل گەل مالباتێن گرتیان ب داوی ئانینە نھا دنڤیسینم… ئەڤ رۆمانە دێ د نەورۆزا سالا 2024 دە بگهیژە خوەندەڤانێن کورد. تشتێن کو ھوون دێ د ڤردە بخوینن، ھەتا نها ژ بەر بێژەیا شەرمێ نەھاتنە گۆتن. لێ ب سایا کەچا خالێ خوە یا ب ھەردو لنگێن خوە سەقەت، ئەز دێ د ڤێ رۆمانێ دە ھەر تشتەکی کو د تاریێ دە مانە دەرخم رۆناھیێ.
ب نڤیساندنا ڤێ رۆمانێ گەلەکی ئێشیام. ب ڤی حالێ خوە یێ نەخوەش ئەز دیسا لێ وێ زیندانێ بوومە مێڤان. دیسا د خەونێن خوە دە لێدان و ئێشکەنجە ددیت. لێ نە خەمە، دڤێت هێژ ئەڤ مژارە بهێت نڤیساندن، ئەڤە بوو قسمەتێ من و ھێڤیدارم ھوون ب خوەندنا وێ، وەکە من بچن وان رۆژێن وێ دۆژەھێ.
ل بەندێ بن…
سلاڤ و رێز
