شارەدارێ سان پەدرۆ ھوامەلولا یێ مەکسیکا، ڤیکتۆر ھوگۆ سۆسا گارجا، ژ بۆ کو شانس و سوودێ ژ بۆی گەل بینە، لگەل تیمساحەکێ زەوجی. د شاھییا زەواجێ دە خەملا بووکێ ل تیمساحی کرن، لگەل تیمساحی گۆڤەند گرتن و ھەری داوی ژ بۆ داوەتێ ئانین ئاڤاھییا شارەدارییێ.
ڤیکتۆر ھوگۆ سۆسا گارجا، شارەدارێ سان پەدرۆ ھوامەلولا، کو ل ئەیالەتا ئۆاخاجا یا مەکسیکایێ یە، ژ بۆ کو ژ گەلێ خوە رە بەختەواری، بەرەکەت و زێدەبوونێ بینە، لگەل تیمساح “ئالجا ئادرانا” زەوجی. خەلکێ باژێری حەزەکا مەزن نیشانی داوەتا کو ب موزیک و دیلانێ ھات لدارخستن، دا. بەری داوەتێ، جلێن بووکێ ل تیمساح “ئالجا ئادرانا”، کرن و پشتی کو ژ بۆ ئەولەھییێ دەڤ لێ ھات گرێدان، ئەو ل کۆلانێن سان پەدرۆ ھوامەلولا گەراندن.
تیمساحا کو لگەل شێنیێن باژێری ھات گۆڤەند گرت، ھەری داوی ژ بۆ داوەتێ ئانین ئاڤاھییا شارەداریێ. ل ور مەھرا د ناڤبەرا تیمساح و شارەدار گارجا دە ژ ھێلا رێبەرێ ئۆلی یێ باژێر ڤە ھات برین. “ئەم ژ ھەڤ حەز دکن” ل سەر پرسا گەلۆ ئەو رازی یە کو د داوەتێ دە لگەل تیمساحێ بزەوجە یان نە، شارەدار گارجا وھا بەرسڤاند: “ئەز بەرپرسیارییێ قەبوول دکم ژ بەر کو ئەم ژ ھەڤ حەز دکن، یا گرینگ ئەڤە. بێ حەزکرن زەواج چێنابە. ئەم ژ ھەڤ حەز دکن و ئەز دخوازم لگەل پرەنسەسا خوە بزەوجم.”
کەڤنەشۆپ خوە دسپێرە سالا 1789
کەڤنەشۆپییا کو ژ سالا 1789 و ڤر ڤە ل باژارێ سان پەدرۆ ھوامەلولا بەردەوام دکە، لھەڤھاتنا دو جڤاکێن کو وێ دەمێ دژمن بوون، سەمبۆلیزە دکە. ھێڤی دکن کو ئەڤ زەواجا نوونەری یا کو ھەر سال تێ لدارخستن، ژ بۆ خەلکێ باژێری ببە سەدەما بەختەوەری، ئارامی و پێکڤەژیانێ.
