پێشکێشکارا تیڤی 100ێ کووبرا پار، کو شیرۆڤەیا وێ یا ل سەر سترانبێژا کورد یا ئۆپەرایێ پەروین چاکار راستی بەرتەکێن مەزن ھات، گۆت: “ئەز فێم دکم کو ئەڤ شیرۆڤەیا من هەم بوو سەدەما عاجزبوونێ و ھەم ژی ژ رێیا خوە دەرکەت. چ پێوەندیا شرۆڤەیا من ب ناسنامەیا برێز چاکار و کوردبوونا وێ تونەبوو. ئەز دخوازم ببێژم کو ئەگەر شاشفێمکرنەک وھا چێبووبە ئەز ژ دل لێبۆرینێ دخوازم”.
د دەما وەشانا خوە یا د تیڤی 100 دە، گۆتنێن پێشکێشکار کوبرا پار یێن د دەربارێ هونەرمەندا ناڤدار یا ناڤنەتەوی پەروین چاکار و سەرۆکێ گشتی یێ جەهەپێ ئۆزگور ئۆزەل دە گۆتبوو، راسەری بەرتەکێن مەزن ھاتبوو.
کووبرا پار، د دەما وەشانێ دە گۆتبوو کو وەک رۆژنامەگەرەکێ ھەول ددە کو کۆنسەرێن موزیکا کلاسیک بشۆپینە، لێ وێ قەت ناڤێ چاکار نەبھیستیە و د دەربارێ مژارێ دە ل ھونەرمەندێن سەنفۆنی و ئۆپەرا-بالەتا دەولەتێ یا ستەنبۆلێ گەریایە.
کووبرا پار گۆتبوو کو پەروین چاکار نە ھونەرمەندەکا ناسکرییە، ئەرێ ل سەرانسەری جیھانێ بەشداری ئۆپەرایا بوویە لێ سەرکەفتنەکا جیھانی ب دەست نەخستیە و تەنێ ب داخویانیێن ل سەر ناسنامەیا خوە یا کوردی دەرکەتیە پێش.
د ئەنجاما بەرتەک و شەرمەزاریان دە کووبرا پار ژ بەر شرۆڤەیا خوە و شاشفێھمکرنا وێ لێبۆرینا خوە ژ پەروین چاکار و حەژێکەرێن وێ خوەست و گۆت: “مەبەستا من نە کوردبوونا وێ و ناسنامەیا وێ یا ئەتنیکی بوو، گەر شرۆڤەیا من بووبە سەدەمێ شاشفێمکرنەک وسا، ئەز ژ دل و جان لێبۆرینێ دخوازم. ئەز وەک رۆژنامەڤانەکێ ل گۆر پرەنسیبێن راگهاندنێ دخوازم ڤێ یەکێ ببێژم. گەر ئەڤ یەک نەحەقی ھاتبە دیتن ئەز لێبۆرینا خوە دخوازم”.
