د سەر وەفاتا بلبلێ موزیکا کوردی ئارام تیگران رە 14 سال دەرباس بوون. ئارامێ تیگران ژیانا خوە بەخشی زمان و موزیکا کوردی کر و د پێشکەتن و پاراستنا چاند و موزیکا کوردی دە خزمەتەک مەزن کر.
ئارامێ تیگران، کو ب کۆکا خوە ئەرمەنی یە، د ئاخاڤتنەکا خوە دە دگۆت، “ھەگەر ئەز جارەک دن بێم دنیایێ، ئەزێ ھەموو تانک، تفەنگ و چەکێن خوە بحەلینم و ژ وان ساز، قامیش و کلارنەتێ چێکم”. تیگرانێ کو ل کۆچبەرییێ ژ دایک بوو و ل کۆچبەرییێ ژیانا خوە ژ دەست دا، د ناڤ رووپەلێن دیرۆکا چاند و موزیکا کوردی دە ناڤێ خوە ب تیپێن زێرین نڤیساند و ب خزمەتا خوە بوو پارچەیەک ژ ئێش و ئازار، ژ بەرخوەدان و تەکۆشینا ئازادییا مللەتێ کورد.
مالباتا ئارامێ تیگران د دەما کۆمکوژییا ئەرمەنییان دە ژ گوندێ باندا یێ ناڤچەیا ساسۆنێ یا ئێلھێ کۆچی بنخەتێ (رۆژئاڤا)باژارێ قامشلۆ کرن. تیگران د سالا 1934 دە ل ور ژ دایک بوو. تیگران ل سەر گۆتن و شیرەتا بابێ خوە د 9 سالییا خوە دە ب پەروەردەیا ئوودێ یا 6 مەھان دەست ب کارێ موزیک و ھونەرمەندییێ کر. پشترە دەست ب ئاموورا جومبوشێ کر. ژ بەر کو مالباتا تیگران ب ئالیکارییا مەزن و ئاغایێن کوردان ژ کۆمکوژییا ئەرمەنییان خلاس ببوو، بابێ وی وەسیەت لێ کربوو کو ب کوردی بسترە و ژ کوردان رە خزمەت و وەفادارییێ بکە. ئارامێ تیگران وەسیەتا بابێ خوە ئانی جیھ و ھەتا داوییا ژیانا خوە خزمەتا زمان و موزیکا کوردی کر.
تیگران د سالا 1966 دە ل پایتەختا ئەرمەنیستانێ یێرێڤانێ ب جیھ بوو و 18 سالان د رادیۆیا ئێریڤانێ دە خەبتی. پشتی سالا 1995 تیگران چوو یەونانیستانێ و ل ئاتینایێ ب جیھ بوو.
تیگران د ھەموو ژیانا خوە دە جارنا ب زمانێ سوریانی، عەرەبی، ترکی و یوونانی، جارنا ب زاراڤەیێ کوردی دملکی لێ ب پرانی ب کورمانجی ستران گۆتنە. تیگرانێ کو د دلێ کوردان دە جیھ گرتیە، 230 ستران ب کوردی، 150 ب عەرەبی، 10 ب سوریانی و 8 ژی ب یوونانی گۆتنە.
تیگران د 8 تەباخا 2009 دە ل نەخوەشخانەیا کو لێ دھات دەرمانکرن ژیانا خوە ژ دەست دا. تیگران ل گۆرستانا ئەرمەنییان یا بروکسەلێ ھات ب ئاخێ سپارتن.
بلا روحا وی شاد و گۆرا وی بھەشت بە.
