کا ئەم چ بکەین؟؟؟ و بەرێ خوە بدەینە کیژان پارتیێ…

کا ئەم چ بکەین؟؟؟ و بەرێ خوە بدەینە کیژان پارتیێ…

ئەم وەکە کوردێن باکور کەتینە رەوشەکا وەھا کو حەتا نھا قەت تشتەکێ ب ڤی رەنگی. ب ڤی ئاوایی و ب ڤێ ھەلوەستێ نەھاتیە سەرێ  کوردێن باکورێ کوردستانێ.

پارتیێن مەیێن دۆزا ئازادیا گەلێ خوە، و سەرخوەبوونا وەلاتێ خوە دکەن. لێ ژ بۆ ئازادیا وی وەلاتی تشتێن پێویست و لازم ژی پێک نائینن.

ئەم ھێشتا ژبەر هەبوونا تشتێن بچووک و گەلەک ژ وان بێ رامان ژ ھەڤدو عاجز دبین. ژ رەخنەیان زێدەتر ھەڤدو گونەھبار دکەین. ب ڤێ ژی دلێ مە ژ ھەڤدو دمینیت و ئێدی نێزیکاتیا دناڤبەرا مەدا خراب دبیت. ھەلبەت ئەڤە نە تشتەکێ باشە کو ھندەک ژ ئەندامێن پارتیان ڤێ دکەن.

کارێ پارتیان دڤێ نە ب مژوولبانا شەخسان بیت. لێ دەما کارێن ئەساسی نەکەن ئان ب ئەرکێن خوە نەرابن، ژ بۆ مژوولبوونا خوە، ب شەخسان را دبنە موخاتاب. و رەخنەیەکا بچووک ل پارتیا وان ئان ل سەرۆکێ وان بهێتە گرتن، ئاھا وی دەمی ژی دبنە ئاگر.

لێ ژ بۆ کو ئەم ھێشتا نەبوونا نەتەوەیی، لەوما ئەم ھەم تەنگین، ھەم رێخستنی نە، ئۆلی نە، حزبی نە، سۆسیالیست و نیژادپەرەستین. ھەلبەت د ھەر نەتەوەیەکێ دا ئەڤە ھەنە، لێ خەلک ژ بۆ بەرژەوەندیێن نەتەوا خوە دبنە ئێک. یێت مە ژی ب ھەڤ و ب کەسان دکەڤن.

دەما ئەم ل دیرۆکا خەلکێن ل ڤێ جیھانێ دنێرن و دبینن کو ئەو ژ بۆ دۆزا گەلێ خوە هەموو بوونە ئێک و ل سەر ئەساسێ ئازادی ئان دیمۆکراسیا وەلاتێ خوە ھەر ل گەل ھەڤن.  ژ بۆنا پاراستنا گەلێ خوە تم ب ھەڤرە نە و ئێریشێن تێنە سەر وەلاتێ وان ھەمی ل گەل ھەڤ ل دژ وێ دبنە خوەدی یەک ھەلوەست.

ژ رۆژا وەلاتێ مە پارچە کری ھێدی ھێدی مەژیێ مە، ھەبوونا مە، بیر و رایا مە ژی پارچە کرینە دا کو ئەم نەکاریبن ھەڤ قەبوول بکەین، ل سەر ئەساسێ پاراستنا بەرژەوەندیا گەلێ خوە ببینە ئێک ئان ل گەل ھەڤ، کار و خەباتێ بکەین.

ڤێ پارچەبوونێ، ڤی مەژیێ داگیرکەران یێ ب دارێ زۆرێ ب مە دایە قەبوولکرن، رۆژ ب رۆژ ئەو جھێ خوە د ناڤا جڤاتا کوردان دا دگریت و گرتیە.

چنە ئەڤە؟؟؟

نھا سەرنجا خوە بدەنێ، دەما تو رەخنەیەکێ ل پارتیەکێ دگری، ئەندامێن وێ دبن ئاگر و دخوازن تە بشەوتینن، ھەگەر نەشێت ڤی کاری بکەت، ژ تە عاجز دبیت و ئێدی مرۆڤ نەشیت سلاڤەکێ ژی ل ھەڤ بکەت. لێ ژ بیر دکەن کو نھا ژ ھەر دەمی پتر پێویستیا مە ب ھەڤدو ھەیە.

دەما تو ل گۆر خوە ھندەک تشتێن ئیسلامێ، رەخنە دکەی ئان داخوازەکێ ژ وان دکەی کو تشتێن ئەو دپارێزن، ئەو ل گۆر وان راستە. لێ دبە کو ل گۆر ھندەکێن دی نە راست بیت. تو هند دبینی ئەو ژی دبنە ئاگر و مالا مە دشەوتینن.

چ دەمێ تو چاپخانەیەکێ رەخنە دکەی، ئێدی ئەو بەرھەمێن مرۆڤ چاپ ناکەن و ژ دەستێ وان بهێت ناهێلن یێن دی ژی بەرھەمێن  مە چاپ بکەن.

تو نڤیسکارەکی ژ بەر شاشیەکا وی رەخنە دکەی، ژ خوە ئەو ژ ھەرکەسێ پتر توند دبیت، ھێرس دبیت. ژ بەر کو کەسێن وەھا د سەر خوە را چ کەسێن دی نابینن.

تو دبێژی ئاگر ب کوردستانێ کەفتیە، کا پارتیێن دۆزا ئازادی و سەرخوەبوونا کوردستانێ دکەن ل کوڤە نە، ئەندام ئانگۆ مرید دبێژن، ئەڤە ژ دەسستێ مە دهێت، کەرەم بکە تو پارتیەکێ چێکە و ھەلویستا خوە بینە جھ.

تو دبینی، ھەما ھەما رۆژێ کوردەک دهێتە کوشتن، لێ پارتیێن مە بێ ھەلویست نامینن دەرحەقێ بوویەران دا ب ترکی داخویانیێ ددەن!

تو دبێژی، گەلی پارتییا ئارمانج و ھەدەفا وە سەرخوەبوونا کوردستانێ یە، لێ ھوون نەشێن ژ بۆ بوویەرەکێ ٥ کەسان دەرخن کۆلانان. لێ ئەو دبێژن: تو هندە یێ وێرەکی وەرە تو دەرکەڤە کۆلانان…

تو دبێژی حەیران بەرێ د دەمێن مە دا ئانکو سالێن ١٩٧٠-٨٠ ل ھەمبەر بوویەرێن قرێژ ملەت، خەلک ل کۆلانان بوو، بۆچی تو ئیرۆ بێ دەنگی؟ دبێژن شەرت و مەرج ھاتنە گوھەراندن، ئەم ب بەلاڤۆکان وێ بوویەرێ شەرمەزار دکەین.

یانی وەکە مەسەلا یێ گوندی دکەن. خەلکێ ل تالانێ وی ئانکو ل گوندی خستبوون، وی دگۆت: ”من ب خەبەران (سکفان) چ تشتەک ل وان نەهێلا”.

ئاھا رەوشا پارتیێن مە ژی ئەڤەیە. تو چ دبێژی ل گۆر خوە چارەسەریەکێ بۆ پەیدا دکەن. لێ تو دبێژی قەی ئەو دخوازن ھەڕۆژ بوویەر روو بدەن. روودانا بوویەران ژی، ب وێنەیێ ئالا پارتیا خوە یا مەزن ل سەر ئنتەرنەتێ و ب داخویانیێن ب زمانێ داگیرکەران شەرمەزار دکەن.

ل ھەمبەر بوویەرەکێ، ب ترکی وێ پرۆتەستۆ دکەن و پێ پەسنا خوە ژی دکەن. یانی ھەما تە سینگەک ل دیواری دا، جەھەرێ وان حازرە و پێدا دارڤە دکەن.

د وەلاتێن داگیرکری دا دەما تو نەشیای پارتیەکا سیاسی یا داخوازا سەرخەبوونا وەلاتێ خوە نەکەت، رەخنە بکەی، تو بزانە ل وی وەلاتی سیاسەت مرییە.

ل وەلاتەکی داگیرکری وەکو کوردستانێ، ھەگەر  پارتیێن سیاسی نەشێن بوویەر و کریارێن داگیرکەران د کۆلان و مەیدانێن وەلاتێ خوە دا پرۆتەستۆ بکەن، تو بزانە ل وێرێ پارتی ئێدی نەمانە.

ل وەلاتەکێ دەما ھەر پارتیەک ژ چەند کەسان پێک هاتبیت هەبیت و ژ بۆ بەرژەوەندیا گەلێ خوە نەشێن، د بن سەیوانەکا نەتەوەیی دا ب ھەڤرا کار بکەن، ئان ژی ببنە یەک، تو بزانە ئێدی ئەو پارتی نە ژ بۆ وەلاتی بەلکو ژ بۆ شەخسانە.

پوستێن ھەمان بەش