ئیراق دخوازیت ژ فرانسایێ چەکان بکریت

ئیراق دخوازیت ژ فرانسایێ چەکان بکریت

وەزیرێ دەرڤەیێ ئیراقێ فوئاد حوسێن ئاشکرا کر کو بریارە مەھا بێت، سەرۆکوەزیرێ ئیراقێ مستەفا کازمی سەردانا پاریسێ بکەت و ل گەل رایەدارێن فرانسایێ بھێزکرنا پەیوەندیێن ھەر دو وەلاتان گۆتووبێژ بکەت.

فواد حوسێن د داخویانیەکا چاپەمەنیێ دا راگەھاند کو کرینا چەکێن فرانسی ل گۆر داخوازا ئارتێشا ئیراقێ، دێ بیتە مژارا سەرەکی یا کۆمبوونان.

حوسێن دیار کر؛ ئێک ژ ئارمانجێن سەردانا شاندا ئیراقێ ب سەرۆکاتیا سەرۆکوەزیرێ ئیراقێ مستەفا کازمی بۆ وەلاتێن ئەورۆپایێ دێ داخوازا چاڤدێریا ئەورۆپی بکەت ژ بۆ ھەلبژارتنێن مەھا خزیرانا ٢٠٢١ێ. ھەروھا ژ وەلاتێن ئەورۆپایێ ژی داخواز بکەت کو ناڤێ ئیراقێ ژ لیستەیا وەلاتێن تەمویلکەرێن تیرۆرێ دەربێخن.

وەزیرێ دەرڤەیێ ئیراقێ راگەھاند کو خواستەکا بەغدایێ ئەوە کو پەیوەندیێن خوەیێن ل گەل فرانسایێ بھێز بکەت، چەندین پرۆژەیێن ئابۆری ژی دێ هێنە گۆتووبێژکرن، ب جوورەکێ کو کۆمپانیێن فرانسی ب مەبەستا هاریکارییا ئیراقێ پرۆژەیان ئەنجام بدەن، کو ژ پرۆژەیێن ژێرخانا ئابۆری و خزمەتگوزاری و سێکتەرا ئەنەرژی و پەترۆلێ پێک دهێت، ھەروھا د وارێن ئاساییش و سەربازی دا ژی.

ل سەر چێکرنا وێستگەھەکا ئەتۆمی ژی ب مەبەستا ئاشتیێ، فواد حوسێن ئاشکرا کر کو ئەڤ مژار ژ لایێ مستەفا کازمی ڤە ھاتیە پێشوازیکرن کو ئارمانجا وێ بەرھەمانینا کارەبێ یە ب پشتەڤانیا فرانسایێ، لێ ئەڤ مژارە کارڤەدانێن ناڤدەولەتی ل دووڤ خوە تینە و مژارەکا ئاسان نینە، ھەروھا رەوشا دارایی ژی گونجاو نینە ژ بۆ ڤێ پێنگاڤێ، کو ژ بۆ چێکرنا وێ، ١٠ ملیار دۆلار پێویستن.