• ڕیبوار کەرکووکی

سەدەما ڤێ یەکێ کو د ناڤا نەتەوە و تەخێن ژێردەست دا کلتوورەک دروست دبیت کو خیانەت کرن ل جەم وان نۆرمال دبیت و پڕ ب لەز خیانەتا خیانەتکاران ژ بیر دکەن و ل دووڤ وان دکەڤن، ژ بۆ کلتوورەک مەزنتر ڤەدگەریت کو پسپۆرێن جڤاکناسیێ ناڤێ :کلتوورێ کۆلەتیێ” ل سەر دانایە.

هەرچەندە کو “کۆلەتی” گەلەک بەربەلاڤە، لێ بەلێ جەوهەرێ سەرەکی یێ واتەیا وێ دبیت ئەڤە بیت کو “دبێژنە کەسەکێ کۆلە کو ژ لایێ کەسەکێ یان گرووپەکێ سەردەست ڤە دهێتە بندەستکرن، بەرهەمێ هزر و زەڤلەکێن وی د بیاڤێ بەرژەوەندیێن سەردەستی دا دهێتە بکارئانین و هەڤدەم حاشا ل هەبوون و شووناسا وی دهێتە کرن”.

بێ گومان کۆلەتی دەستپێکێ ب زۆلم و زۆرێ دەست پێ دکەت لێ بەلێ پشتی دەمەکێ هندەک ژ کۆلەیان دکەڤنە بن کارتێکرنا ئایدۆلۆژی یا لایەنێ سەردەست و ب حەزا خوە بەردەوامیێ ب کۆلەتیێ ددەن و هندەک جاران ژی شانازیێ ب کۆلەتیا خوە دکەن. ل ڤێرە یە کو کلتوورێ کۆلەتیێ سەرهلددەت. کلتوورەک کو د رێیا ئایدۆلۆژیا ئارمانجدارا نەتەوە و تەخا سەردەست دهێتە وێنەکرن و ب سەدەما پرۆپاگاندا و ئالاڤێن نەرم یێن داگیرکەران د ناڤا کۆلەیان دا بەرەڤ پێش دبەن.

کۆلەتی دو جورێن سەرەکی نە، یا ئێکی داگیرکرنا ئاخ و نیشتیمانێ نەتەوەیەکێ یە ب رێیا تۆپ و تانک و ئالاڤێن دی یێن شەری کو ب داگیرکاریا ب رێیا “هێزا رەق” (Hard power) دهێتە ناسکرن و یا دویەمین کو ب نێرینا من یا ژ هەمیان مەترسیدار ترە، کۆلەتیا هزر و بیرێن کەسانە ب رێیا “هێزا نەرم” (Soft Power) کو وە دکەت بۆ میناک تاکەکی کورد خوە ژ ترک و عەرەب و فارسەکێ کێمتر ببینیت و هەول بدەت وەکو ئالا تالەبانی و ئۆجەلان، درەوەکێ دروست بکەت داکو خوە ب نەتەوەیەک داگیرکەر و سەردەست ڤە گرێ بدەت.

دەما ئاخافتن ب ترکی د ناڤا ریزێن پەکەکێ دا وەکە نیشانەیا پێشکەفتنێ دهێتە حەسابکرن و ئاخافتنا ب زمانی کوردی دبیتە نیشانەیا نەخوێندەواری و پاشڤەروویی یێ ئەڤە سەرکەفتنا ترکیێ د داگیرکرنا هزرا کەسێن د ناڤا ڤێ رێخستنێ دا نیشان ددەت.

د وارێ سۆفت پاوەر نەتەوەیا سەردەست و داگیرکەر ب رەشکرنا دیرۆک، بوها و ب گشتی شووناسا نەتەوا بندەست هەول ددەت “هوشمەندیەک سەختە” ژ بۆ وان دروست بکەت و مێشکێ وان داگیر بکەت. ب ئاوایەکی کو تاکێ نەتەوەیا بن دەست، گەل و نیشتیمانێ خوە ب چاڤەکی سڤک و بێ بوها دبینیت و وەکە ژێدەرێ شەرمێ دزانیت. هەڤدەم شانازیێ ب نەتەوەیا سەردەست و داگیرکەر دکەت و هەول ددەت خوە ب بەشەکی ژ وان بدەتە نیشاندان.

دەما کو خوەش خزمەتی یێن ئالا تالەبانی ژ بۆ عەرەبان دگهیتە ئاستەکێ کو حاشاتیێ ل باب و باپیرێن خوە دکەت و دخوازیت رەچەلەکا خوە بدەتە پال عەشیرەتەک عەرەبی یا بیابان نشین، ڤێ یەکێ پەیوەندی ب ڤێ کۆلەتیێ ڤە هەیە. دەما کو عەبدولا ئۆجەلان د ناڤا بالەفرا ترکا دا ب شانازی ڤە باس ل ڤێ یەکێ دکەت کو دایکا وی ترکە، یان ل سووریێ خوە ب عەلەوی و هەڤ نفشێ بنەمالەیا ئەسەد دزانیت، وێ ژی پەیوەندی ب ڤی کلتوورێ کۆلەتیێ ڤە هەیە. دەما ئاخافتن ب ترکی د ناڤا ریزێن پەکەکێ دا وەکە نیشانەیا پێشکەفتنێ دهێتە حەسابکرن و ئاخافتنا ب زمانی کوردی دبیتە نیشانەیا نەخوێندەواری و پاشڤەروویی یێ ئەڤە سەرکەفتنا ترکیێ د داگیرکرنا هزرا کەسێن د ناڤا ڤێ رێخستنێ دا نیشان ددەت. دەما کو لایەنگرێن لاهۆر جەنگی و کۆلکە بازرگانەکێ دز یێ وەکو شاسوار عەبدولواحید باس ل ڤەگەرینا باشوورێ کوردستانێ ژ بۆ سەر حکوومەتا عیراقێ دکەن سەدەما وێ ئەو کۆلەبوونا هزری یە. ئەڤە ژی کو حەتا نها د کوردستانێ دا نەهاتینە دادگەهکرن و سزادان نیشانەیا ڤێ یەکێ یە کو بەشەک ژ تاکێن کورد ل باشوورێ کوردستانێ و ب تایبەت ناڤچەیا سلێمانیێ هێشتا هزر و بیرێن وان بن دەستێ داگیرکەرانە و ئازاد نەبووینە.

یێن کو کەرکووک و ناڤچەیێن دی ژ کوردستانێ ستاندی و خستیە هەمبێزا حەشدا شەعبی و داگیرکەران، هێزا رەقا ئیراقیان نەبوو بەلکو “کۆلەتیا هزری” یا هندەک کوردێن لاواز بوو

کۆلەتیا هزر و بیران گەلەک مەترسیدار ترە ژبەرکو هزرا مرۆڤێ ئازاد بوویی دوماهیێ دشێت هێزا رەق یا داگیرکەران تێک بشکێنیت و کۆچکا داگیرکاران ژناڤ ببەت. لێ بەلێ گەر کەسەک ژ لایێ هزری ڤە ژ کۆلەتیێ نەهاتبیتە رزگارکرن ل ڤی دەمی گەر ب هەر سەدەمەکێ ژی دەستهلاتا رەقا داگیرکەران ژی ل سەر نامابیت دیسان ئەو ب خوە دێ ولاتێ خوە ئێخیتە بن دەستێ داگیرکەران. ئەم دشێین بوویەرێن 16ێ ئۆکتۆبەرێ ل کەرکووک د ڤی بیاڤی دا ببینین.

کەرکووک و ناڤچەیێن کوردستانی یێن دی کو دکەڤنە دەرڤەی ئیدارەیا حکوومەتا هەرێما کوردستانێ، هاتبوون ئازادکرن و پێشمەرگە تێدا بجیهـ ببوون. هێزا رەقا داگیرکەران کاریگەریا خوە نەمابوو. کوردان ب ئازادی و کەلەجان بەشداری د رەفەراندۆما سەرخوەبوونا کوردستانێ دا کر ب هەڤبەرکرن دگەل ناڤچەیێن دی، بلندترین رێژەیێن بەشداری کرنێ و بلندترین رێژەیێن دەنگێن “بەلێ” ژ بۆ سەرخوەبوونا کوردستانێ خستنە ناڤا سندۆقان و ل بەندا رزگاریا یەکجاری بوون.

یێن کو کەرکووک و ناڤچەیێن دی ژ کوردستانێ ستاندی و خستیە هەمبێزا حەشدا شەعبی و داگیرکەران، هێزا رەقا ئیراقیان نەبوو بەلکو “کۆلەتیا هزری” یا هندەک کوردێن لاواز بوو کو جیهێ داخێ یە هندە مەژیکێ وان هاتیە داگیرکرن کو خەرابترین و لاوزترین کەسێن نەتەوەیا سەردەست ژ بهێزترین و ب روومەت ترین کەسێن نەتەوەیا خوە پێ بهیزترە. یێن کو کەرکووک ئێخستیە بن دەستێ ئیراقێ تانکێن ئابراهامز یێن ئەمەریکی و هێزا لەشکری یا حەشدا شەعبی و سوپایێ پاسدارێن ئیرانی نەبوون بەلکو ئەو تێهزرینا کۆلە و داگیرکارانە بوو کو بەردەوام جڤین دگۆتنە رێبەرێن کوردستانێ، یاری ب جانفیدایی و دیرۆکا نەتەوەیا خوە دکرن و ل مەژیکێ خوە یێ بچووک و داگیرکری دا جیهەک ژ بۆ دەستهلاتداریا کوردی نەهێلای و نەشیای باوەر بکەن کو ژیار و شارستانیەتا کوردان سەد جاران پێتری یا ترک و فارس و عەرەبێن داگیرکەر دەولەمەندتر و مرۆڤ دوست ترە و کورد دشین هەر وەک د دیرۆکێ دا ئەنجام دایی، بناغەیا دەستهلاتداریەکێ بدانن کو هەموو جیهان ژ بۆ ریزگرتن ژ وان کولاڤێن خوە دانن.

پێویستە خوە شاش نەکین و ڤێ راستیێ قەبوول بکین کو حەتا هزر و بیر و تێفکرینا خوە ژ کۆلەتیێ رزگار نەکین، ناگهین رزگاریا یەکجاری

کلتوورێ قبوولکرنا خیانەتێ بەشەک ژ پێشهاتێن کلتوورێ کۆلەتیێ و ئەتۆمیزەبوونا کەسێن نەتەوەیا بن دەستن و حەتا دەما کو هندەک کەس هەبن کو هێشتا هزر و بیر و مەژیکێ وان د بن کۆنترۆلا داگیرکاران دا بیت، کەسێن خیانەتکار ژ بۆ بەرژەوەندیا خوە بکار تینن و ئەڤ ژی پرۆسەیا رزگاریا نەتەوی ب زەحمەت تر و پڕ تێچوو تر دکەت. دەما ڤێ یەکێ هاتیە کو ئەو کوردێن ب ناڤێ پارتایەتیێ ل دووڤ لاهوور و گرووپا وی کەتی، زنجیرەیا کۆلەتیێ ژ مەژیکێ خوە بپرچینن و بێژنە خیانەتکارێن 16ێ ئۆکتۆبەرێ ئێدی رێ نادەین ئەو دەستکەفتێن کو کوردان ب خوینا هەزاران زارۆیێن خوە و ب هەزاران دەربەدەری ب دەست ئینای، هوون ل همبەر هەزاران دۆلاران دا و د شەڤەکی دا ژناڤ ببەن. دەما ڤێ یەکێ هاتیە کو لایەنگرێن پەکەکێ فام بکەن کو کار کرن ژ بۆ ترکیایا دەمۆکراتیک و بهێزتر ل ب ناڤێ “براتیا گەلان”دا، ژ بلی بەدبەختیا زیدەتر ژ بۆ کوردان چ بەرهەمەکێ دی نابیت و رێ نەدەن هزرا ترکی رێخستنا وان داگیر بکەت و ئاخافتن و نڤێسین ب ترکی وەکو نیشانەیا پێشکەفتنێ بهێتە دیتن و یێن ب کوردی ژی دئاخڤن وەکو کەسێن نەخویندەوار بهێنە دیتن.

پێویستە خوە شاش نەکین و ڤێ راستیێ قەبوول بکین کو حەتا هزر و بیر و تێفکرینا خوە ژ کۆلەتیێ رزگار نەکین، ناگهین رزگاریا یەکجاری و هەڤدەم بەردەوام رێ ژ بۆ خیانەت و پیلانێن دوژمنان خوەش دبیت. ب وێ هێڤیێ کو کوردستان بگەهیتە رزگاریا یەکجاری و ب چاڤێن خوە دادگەهکرنا خیانەتکارێن 16ێ ئۆکتۆبەرێ و هەموو خیانەتکارێن دی یێن دۆزا کورد ببینم و ب چاڤێن خوە ببینم ئەو کەسە دهێنە سزادان کو ب خیانەتا خوە دەما سێ سالانە سەقایەک ب ئێش و ئازار د هەست و نەستا هەموو کوردێن ولاتپارێز دا دروست کریە.

ل دوماهیێ بەژنا خوە ل همبەر وان شەهیدان دچەمینم کو ل 16ێ ئۆکتۆبەرێ و پاشان ل پردێ و سحێلا و مەحموودیێ ب خینا گەشا خوە رێ نەدای پیلانێن خائینان و دوژمنێن گەلێ کور ژ بۆ داگیرکرنا هەموو ستاتۆیا هەرێما باشوورێ کوردستانێ سەر بکەڤیت.

کوردایەتی و کورد بوون شانازیە و پشتراستم رۆژەک دێ هێت کوردستان ب سەر دوژمن و داگیرکار و خائینان دا سەرکەڤیت و دێ گەهیتە رزگاریا یەکجاری.