«وی ب ژیان و سترانێن خوە شۆرشەک ل دژی ستەمێ ئەنجام دا»

20 سالن کو من ئه‌حمه‌د کایا ژ دەست دایە، هێژان ئەو ئێش و ئازارێن ب رێیا سترانێن خوە وەکو کەڤالەکێ هونەری یێ بێ هەمپا وێنە کری دبینم، هێژان سترانێن وی ب عەشق و ئەڤین تێنە گوهداری کرن.

20 سالن کو من ئه‌حمه‌د کایا ژ دەست دا یە، ئه‌حمه‌د کایا کو ب سەدەما جەلتەیا دلی ل پاریسێ ل 16 نۆڤێمبه‌را 2000ان دا جانێ خوە ژ دەست دا، د گۆرستانا Peré Lachaise ئا پاریسێ دا‌ هاتە ڤەشارتن، نێزیکی 35000 کەس بەشداری مەراسیما بن ئاخ کرنا وی بوون، حەتا نها سترانێن ئه‌حمه‌د کایا زیندینە، وی ب ژیان و سترانێن خوە شۆرشەک ل دژی ستەمێ ئەنجام دا.

كایا ب سەده‌ما کورد بوونێ تووشی ستەم و نەفی کرنێ بوو

وی د ژیانا خوە یا 43 سالان دا هەر ژ ئادیامانێ حەتا پاریسێ، د ناڤا ئێش و ئازارێن گەلێ خوە دا ژیان دکر، ئەو ب سەده‌ما کورد بوونێ و هەژاریێ، تووشی ستەم و نەفی کرنێ بوو، ژبەر ڤێ یەکێ باش هاتە پێش چاڤێن گەل.

ئەو د سالا 1957ێ دا وەکو پێنجەمین زارۆیێ خێزانەکێ کو کۆچبەری مالاتیا ببوون هاتە سەر دونیایێ، بابێ وی کارکەرێ کارگەها دروستکرنا پارچەیێن سومر بانک بوو، ئەو چوو بوو دەبستانا بنەرەتی ل مالاتیا، د تەمەنێ 6 سالیێ ب رێیا تیرکێ دیاریێن بابێ خوە دگەل هونەرێ ئاشینا بوو، پشترا‌ و ل سالێن مایی ژ خوا‌ندنا خوە د تۆمارگەهەکا تۆمار کرن و فرۆشتنا کاسێتان دا دەست ب کار بوو، ل سالا 1972ێ دا مالباتا ئه‌حمه‌د کایا ژ ئەگەرا دەست کورتیێ کۆچبەری ئیستانبۆلێ بوون و ژبەر ڤێ ئەگەرێ کایا ناچار بوو دەبستانێ بجیهـ بهێلیت، وی وەکو خوه‌ندكار د باخچە و جیهێن دی یێن جودا جودا دا کار کریە، وی د ڤی دەمی دا، پسگرێکا کۆچبەر بوونێ ژ باژارەکێ بچووک ژ بۆ باژارەکێ مەزن ئەزموون کر.

كایا حەتا دوماهییا ژیانا خوه‌ ئازارا كوردبوونێ ئه‌زموون كر

ئه‌حمه‌د کایا هەر ژ دەستپێکێ حەتا دوماهی ساتێن ژیانا خوە، ئێش و ئازارێن کورد بوونێ ئەزموون کرن، د زارۆکاتیا خوە دا ئەو پیچەکێ ب زمانێ ترکی دپەیڤی.

ئه‌حمه‌د کایا کو د ژیانا خوە ئا زارۆکاتیێ دا ب زمانێ کوردی نەدکاری ب پەیڤیت، ژ بۆ درست کرنا ئەلبۆمێن کوردی و گۆتنا ئاواز و سترانێن کوردی خەم دخوارن.

یەکەمین ئەلبۆما وی ب ناڤێ «گریا زارۆیەکی» ل سالا 1985ێ دا هاتە پارڤە کرن، پاش سالەکێ ئانکو ل سالا 1986ێ وی رێڤینگیا خوە وەکو هونەرمەندەک بەرنیاس ب سترانا Şafak Türküs journey continued بەردەوام کر، حەتا سالا 1999ێ دا‌ ئه‌حمه‌د کایا 10 ئالبووم یەک ل دووڤ یەک درست کرن.

هندەک ژ کاسێتێن وی دهێنە گرتن و هندەک جاران کۆنسەرتێن وی دهێنە قەدەخەکرن، تیڤی دەست ب وەشانا خوە دکەن لی بەلی پاش دەمەکێ کورت وەشانا خوە قوت دکەت ئه‌حمه‌د کایا هێدی هێدی بەر ب کوردستانێ د مەشیت.

ئه‌حمه‌د كایا: «دخوازم سترانەکا کوردی ببێژم و کلیپ بکم، پشتراستم کەسێن ویرەک د ناڤا هەوە دا هەنە کو ڤێ کلیپێ پارڤە بکن»

ل 10 فبرایەرا سالا 1999ێ د هۆلا شاهزادە ئۆتێل دا ب ئامادەبوونا ئەنجوومەنێن رۆژنامەڤانان کو هەر سال د مەراسیمێن پێدانا خەلاتان دا ل ڤێ ئۆتێلێ ئامادە دبوون خەلاتەکێ وەردگریت و د ئاخافتنا خوە دا پاش وەرگرتنا خەلاتی دبیژیت: ئەز ڤی خەلاتی ب ناڤی رێخستنێن مافێن ئینسانان، ب ناڤێ دایکێن شەمیێ، ئەو دایکێن زارۆیێن وان نەدیار و هەموو رۆژێن شەمی ل دەبستانا گالاتاسارا گرەڤان دگرن، ب ناڤێ هەموو هونەرمەندان، ب ناڤێ هەموو گەلی ترکیێ دستینم، و من دڤێت تشتەک دی ژی بێژم ژبەرکو ئەز ب رەگەز کوردم، ئەز دخوازم د ئالبووما خوە یا نوو دا سترانەکێ ب زمانی کوردی بێژم و ڤێ سترانێ کلیپ بکم، ئەز پشت راستم کو کەسێن ویرەک د ناڤا هەوە دا‌ هەنە کو ڤێ کلیپێ پارڤە بکن، گەر پارڤە ناکەن ژی نزانم دی چ بێژن ل بەرامبەر گەلی کورد دا‌ و پێدڤی دکەت گەلێ ترکیێ حیسابێ دگەل هەوە بکەت، ئەز سپاس دکم.

پاش ڤێ ئاخافتنا ئه‌حمه‌د کایا هندەک ژ مێهڤانان کارڤەدانا خوە نیشان دان، وان ئه‌حمه‌د کایا نەفرین کر و ئالاڤێن ل بەر دەست ئاڤێتن ئه‌حمه‌د کایا، ئەڤ هندەک ژ وان ئاخافتنانە یێن کو کەسێن د مەراسیما پیدانا خەلاتێ دا ئامادە بووی ب ئه‌حمه‌د کایا گۆتی: هیچ رۆژنامەڤانەک نیە بەرسڤا ڤی کەسی بدەت؟ ڤی زەلامی دەربکەن، هیچ تشتەک ل ترکیێ نینە ب ناڤی کورد.

ئەڤ سترانبێژێن ترکیێ سەرکێشێن وان ئێریشا بوون یێن ل سەر ئه‌حمه‌د کایا هاتنە کرن: ئیبرۆ گوندەش، سەردار ئۆرتاچ و رەها موهتار.

ئه‌حمه‌د كایا: «نابیت‌ كه‌سێن سترانان دبێژن ژ ترسێ ب ترسن»

ئه‌حمه‌د كایا پاش ڤێ یەکی ب تەنێ ما د ناڤا ترکیی دا، پاش کو رۆژنامەیا Hürriyet هندەک نووچە ل سەر ناڤبری د رۆپەلێن رۆژنامەیێ دە نڤیساندی، کو بوو سەدەما ڤەکرنا دۆسیەکا یاسایی ل دادگەهێ، ب ڤی ئاوایی ئه‌حمه‌د کایا ب 3 سال و 9 مه‌هان زیندان کرنێ دهێتە حوکم کرن.

 ئه‌حمه‌د کایا ناچار دبیت کۆچبەری ئه‌ورۆپایێ ببیت، ئەو پاش دەمەک کورت ژ جەلتەیا دلی د ناڤا مالا خوە دا‌ ل پاریسێ وەغەرا داویێ دکەت و ڤێ جیهانێ ب جی دهێلیت.

ئه‌حمه‌د کایا د ئاخافتنەکا خوە دا ل ئەورۆپایێ دبێژیت: رۆژەک دێ هێت کەسەک دێ ڤێ سه‌رهاتیێ نڤیسیت کو زەلامەکێ دخوا‌ست سترانەکا کوردی بێژیت ژبەرکو ئەو کورد بوو لێ رێک ب وی نەهاتە دان، ئەو هیچ وەلاتەکێ پارچە پارچە ناکەت، و ئەو کەسێن ڤێ سه‌رهاتیێ دخوینن، دێ زانن کو ئەو کەسێن سترانان دبیژن نابیت ژ ترسێ، بترسن.