میدیایا پهكهكێ ئهڤە دهما چهند رۆژانه دهست ئاڤێتییه چێکرنا هندهك نووچه و ئاگاهییان ل دهربارا رۆژهلاتا كوردستانێ و ئیرانێ و سووریێ، ههگهر چ ئهڤ ئاگاهی وهها خوهیا دكن كو ل دژی ئیرانێ نه، لێ بهلێ د گهوههرێ خوه دا هندهك واتایێن دی ههنه، پهكهكه دخوازیت ئێدی وها ببێژیت كو تێكلییا مه ب رهژیما ئیرانێ ڤە نینە.
كهنالا ستێرك یا پهكهكێ دهست ئاڤێتییه چێكرنا هندهك نووچه و ئاگاهیێن مینا ههدهف كرنا كۆلبهران ب دهستێ سوپایێ پاسداران، دوباره رێخستنا شانهیێن داعشێ و كۆمێن چهكدارێن گرێدای ئیرانێ ل دێرازوورێ، ههموهخت بهرز كرنا ئالا پهكهكێ ل ناڤچهیێن سلێمانیێ ب تایبهت ل كهلارێ، گهلۆ پهكهكه دخوازیت ب ڤان ئاگاهی و نووچهیان چ ببێژیت؟ یا راست ئهڤ یێك د سێ خالێن سهرهكی دا دهێتە شرۆڤە كرن:
یێك: سێرڤس كرنا نووچهیان د مهدیایا پهكهكێ دال دژی رهژیما ئیرانێ دهێته وێ واتایێ كو پهكهكه دخوازیت ببێژیت ناكۆكیێن مه ل گهل رهژیما ئیرانێ چێبوونه و ئێدی د مهسهلهیا پهیمانا شهنگالێ دا، میلیشیا حهشدا شهعبی پشتگریێ نادهتە مه، ژ بهر كو د مهسهلهیا شهنگالێ دا مهدیایا ئیرانێ تهنێ گۆتبوو كو میحوهرێ مقاوهمێ ل شهنگالێ كهتییه د خهتهریێ دا، مهبهستا ئیرانێ ژ میحوهرێ مقاوهمێ حهشدا شهعبی و پهكهكه یه.
دو: پهكهكه دخوازیت ب ڤان نووچهیێن ل دژی ئیرانێ، وهكو ههردەم رۆژهڤێ ب گوههریت و گهلێ كورد ب خاپینیت، ئهو دخوازیت پهیوهندیێن خوه یێن ژێر ب ژێر ل گهل ئیرانێ بپهچنیت.
سێ: یان پهكهكه ل ڤێرە دخوازیت پهیامهكا نهئاشكهرا بدهتر رهژیما ئیرانێ كو ئهڤ تێكلیێن رێخستنا مه ل گهل ههوه كهتنه د قوناغهكا نوو دا.
پهیوهندیێن پارتییا كاركهرێن كوردستانێ ل گهل رهژیما ئیرانێ ژێر ب ژێر نهمانه ، بهلكو نها ههر كوردهك دزانیت پهكهكێ و ئیرانێ پهیوهندیێن ستراتهجیك ههنه، پهكهكێ بارهگههـ ل رۆژهلاتا كوردستانێ ب ئاوایهكی ئاشكهرا ههنه، بریندارێن وێ ل نهخوهشخانهیێن ئورمیێ تێنە تهداوی كرن، دهما ئیران ب ئاشكهرا دبێژیت كو میحوهرێ مقاوهمێ كهتییه د خهتهرێ دا ژ خوه مهبهستا ئیرانێ پهكهكه و حهشدا شهعبی یه، پهكهكه ژ بۆ ئیرانێ وهكو شركهتهكا سیكیۆرتیێ یه، چهكدارێن كرێ گرتی نه، ژ بۆ لێدانا بهرژهوهندیێن گهلێ كورد ل باشوورێ كوردستانێ.
هەڤنیاسینا پەکەکێ و ئیرانێ بۆ سالا 1982ێ ڤەدگەریت
پەکەکە و رژێما ئیرانێ پهیوهندییەک دیرۆکی هەیە و دەستپێکا دروستبوونا ڤان پهیوهندییان بۆ سالا 1981-1982ێ ڤەدگەریت، رژێما سووریێ ئەو ئالی بوو کو رژێما ئیرانێ و پەکەکە ب هەڤدو ناساندین، دهما كو پاش کۆدەتایا سالا 1980ێ ل ترکیێ، پەکەکێ هێزێن خوە ل سووریێ و لبنانێ جیگیر کرین و بوو بەشەک ژ ئالیێ دژبەرێ ئیمپریالیزمێ.
پشترا ئیرانێ ب لێزانی پهكهكه بكار ئینا، ل سالا 1986ێ پهیمانهك ل گهل ئیمزا کر و ل گۆر وێ پهیمانێ ئیرانێ ئیمتیاز ب پهكهكێ بهخشین، ل بهرانبهر ڤێ پهكهكه كهته د میحوهرێ مقاوهمێ دا و ئێدی ژ بۆ بهرژهوهندییا ئیرانێ تهڤ گهرییا، ڤێ پهیمانێ هەرچەند كو هندەک گوهەرین تێدا هاتینە ئەنجام دان، لی بەلێ د نها دا ژی ئەساسێ پەیوەندیێن ئیران و پەکەکێ ل سەر ڤێ پهیمانێ نه.