پەکەکە و دۆزا کوردستانێ!

پەکەکە و دۆزا کوردستانێ!

شێخموس ئۆزەنگین

چیرۆکا زوحاکێ زالم ھەر کورد دزانن. زوحاکێ زالم ھەر سەرێ جوانێن کورد دخوازە. کاوەیێ ئاسنگەر ژی دوماهیێ ل ڤێ زلمێ تینیت!

رامان ئەوە کو؛  کوردان، د دیرۆکا خوە دا چ جاران زلم و زۆرداری قەبوول نەکرییە. دەرفەتا ھێزا کوردان یا پێشیلێگرتنا زلمێ بدەست نەکەتبیت ژی، چ جاران سەرێ خوە ژ بۆ زلمێ نەچەماندیە و زالم قابوول نەکرینە. د ڤی واری دا ل سەرانسەرێ کوردستانێ دیرۆک شاھدێ ڤێ ھەلوەستا ملەتێ کوردە.

ژ بۆ کو ئەز مژارێ د واتەیەکا بەرپرسییار دا شرۆڤە بکەم، ئەز دێ دەستپێکێ ناڤێ چەند نڤیسکارێن کو ئاگرێ پەکەکێ و ئێریشکارییا وێ د مەدییا پەکەکێ دا خوەدی دکەن بینم زمان و ل دووڤ دا دەرباسی بوویەر و شرۆڤەیێ ببم.

ھوون ئەڤ دەمەک درێژە کەسێن کو د مەدیا پەکەکێ دا دنڤیسن و داخویانییان ددەن، وەک فەردا چەتین، مەرال چیچەک، سەلاحەدین ئەردەم، وەیسی سارسوزەن، سارا ئاکتاش، ئەحمەد قەهرەمان، سالم فرات، جەمیل بایک، دوران کالکان، بەسێ ھۆزات و موستافا کاراسو دشۆپینن؛ چ پێ نەڤێت هوون تێگھشتینە کو پەکەکە دخوازیت زارۆکێن کوردان، جارەکا دی ب ھەڤدو بدەتە قرکرن و سەرکێشێن پەکەکێ بگەهنە ئارمانجا خوە. ڤان سەرکێشێن پەکەکێ رۆلێ زوحاک وەرگرتیە سەر خوە!

ژ رۆژا کو ئارتێشا ترکان ئێریش ئانییە سەر باشوورێ کوردستانێ و ئاخا ئازاد داگیر دکەت، پەکەکە ژی حکوومەتا باشوورێ کوردستانێ تۆمەتبار دکەت و ئێریشی گوند، سازی و کارمەندێن کوردستانێ دکەت. دەولەتا ترکییێ، ب مەبەستا پەکەکێ ل سەر ئاخا ھەرێما کوردستانێ 38 بنکە ئاڤا کرینە. پەکەکە، ژ دەولەتا ترکیێ ئاخا کو گرتییە دەستێ خوە قەدەغە ناکەت، لێ ژ پێشمەرگێن کوردستانێ را وێ ئاخێ قەدەغە دکەت.

ئەز دێ دەستپێکی ڤان ئێریشان رێز کەم پاش ڤەگەرم ئارمانجا پەکەکێ:

“پەکەکێ، بۆرییا نەفتا کوردستانێ تەقاند. حکوومەتا باشوورێ کوردستانێ، رۆژانە ١٠ ملییۆن دینار زیان دیتن.”

“پەکەکێ ل دوھۆکێ پارێزەرەک کوشت.”

“پەکەکێ ل شنگالێ کەچ و خۆرتێن کوردێن ئێزیدی درەڤنە و کوردێن ئێزدی ل ھەنبەر پکک تەپکییا خوە دان نیشان!”

“ژ بۆ ئاڤاکرنا شنگال و بجیھبوونا نشتەجیھێن کوردێن ئێزدی، د ناڤبەرا حکوومەتا ئیراقێ و حکوومەتا ھەرێما کوردستانێ دا ھەڤپەیمانەک ھات ئیمزەکرن. پەکەکێ داخوویانی دا کو؛ ‘ئەو ڤێ پەیمانێ قەبوول ناکەن و ئەم ناھێلن بهێتە جێبەجێکرن”

“پەکەکێ، ل سەر رێکا سڤیلان و پێشمەرگان دو بۆمبە دانان و کەمین دانابوون. ب ھاتنا ھێزێن پێشمەرگە بۆمبە تەقییان و پەکەکێ ب ئارپێجییان ئێریش کرە سەر پێشمەرگان. د ئەنجاما ئێریشێ دا پێشمەرگەیەک جانگۆری بوو و 5 پێشمەرگە ژی بریندار بوون!” پێشمەرگە ب پێنج سەیاران دەرباسبوونە و ئەڤ سەیارە ھەموو ب دەوسا گوللـە و بەرکێن ئارپێجییان وەک سەرادێ لێهاتینە. ئارمانج دوژمنانە بوو.

“پەکەکێ، دو پۆلیسێن نەفت و گازێ ل ناڤچەیا چەمانکێ ب گوللـەیان بریندار کرن!”

ئەڤ ھێزا خوەدییێ ڤان کارەساتێن خراب، ھەر د داخوویانی یێن خوە دا ژی بەحسا “یەکتییا کوردان و شەرێ براکوژی” دکەت. مخابن ئەڤ بوویەرە، یەک ب یەک ئاشکەرا دکەن کو، پەکەکە ھێزەک توندرەو و خوەدی ھەلوەستەک دوژمنانە، زالمانەیە ل ھەمبەر کوردان.

ب سییاسەتا خوە، ب چالاکییێن خوە، ب زمانێ خوەیێ ئاسیمیلاسیۆنیست ل باکورێ کوردستانێ ھەموو دینامیکێن بەرخوەدانێ ژناڤ برن، نەهێلان. دەولەتا ترکییا، ئاسیمیلاسیۆن، دەژەنەراسیۆن و ئەنتەگرەکرنا کوردان گەهاندە ئاستەک مەترسیدار. بالانسا جڤاتا کورد ل باکورێ کوردستانێ ھەلوەشییا. نھا بەرێ خوە دایە ئاخا ئازاد. حکوومەتا ھەرێما کوردستانێ و ستاتوویا ھەرێما کوردستانێ ژ بۆ خوە کرییە ئارمانج! پەکەکە بوویە تەھدیت ل سەر ئاخا حکوومەتا ھەرێما کوردستانێ.

پەکەکە کوردان دکوژیت، ئێریشان تینیتە سەر سازی و بنکەیێن کوردستانێ. ئاخا کوردان ژ کوردان قەدەغە دکەت. ستاتوویا ھێرێمێ، ئاساییشا ھەرێمێ تێخیتە بن باندۆرا رەوشەکا مەترسیدار. پرسگرێکێن مەزن ژ بۆ کوردان ھوور ھوور ب ھەستەکێ دوژمنانە ڤەدهینیت.

پەکەکە ل باشوور چ دکەت؟

ئاخا باشوورێ کوردستانێ؛ ب چییا، دەشت، نەوال و شکەفتێن خوە، شاھدێ خوینا شەرێ ئازادییا ھەرێما کوردستانێ یا 100 سالی و ھەلوەستا پێشمەرگێن قاھرەمانە. ئەڤ ھەرێمە، بوھوست ب بوھوست ب خوینا پێشمەرگێن کوردستانێ ھاتییە رزگار کرن. پەکەکە ئەڤ 38 سالە، ب سایا سەرێ ڤان جانگۆری و ڤان خەباتێن دیرۆکی ل وان ناڤچەیێن رزگارکری دمینیت.

ئاخا کوردان ژ کوردان قەدەغە کرییە. پەکەکێ ئەو ئاخ، بێی ئیرادەیا سەروەرییا حکوومەتا ھەرێما کوردستانێ داگیرکرییە و ئەو ئاخ ل کوردان کرییە ژەھر. وەلاتێ کوردان ل وان کرییە ژەھر. پەکەکە، مینا زوحاکەکێ نوو ل سەر ئاخا کوردستانێ بوویە جەلادێ سەرێ کوردان.

پەکەکە، بێ رازی بوونا پەرلەمانێ ھەرێما کوردستانێ، بێ رازی بوونا وەزارەتا پێشمەرگە و ئاساییشا ھەرێما کوردستانێ، ل سەر وێ ئاخا ئازاد دمینیت. ریزێ، ژ ئازادی و سەروەرییا ئاخا کوردستانێ ناگریت. ستاتوویا کوردستانێ قەبوول ناکەت.

د ڤی واری دا ئەنجوومەنا وەزیرێن کوردستانێ د دەربارێ ئێریشێن پەکەکێ د دوماهی داخویانیا خوە دا دایە ئاشکەرا کرن کو!:

“ھەرێما کوردستانێ، ستاتوویا سیاسی و رەوایا خەلکێ کوردستانێ یە، ھێزا پێشمەرگە ژی پارێزەرێن ئاخ و خەلکێ کوردستانێ یە، لەورا ھەر ئێریشەکا وەھا، ئێریشە بۆ سەر ھەموو ئاخا کوردستانێ.”

ئەڤ ئێریشێن پەکەکێ وەک “کارەکێ دوژمنانە” دییار دکەن و ئەڤ ئێریشێن ب ڤی رەنگی، “وەک دەستدرێژیا سەر سەروەرییا ھەرێما کوردستانێ و سازیێن وێ یێن رەوا تێن دیتن و ئاشکەرا دکەت کو ناهێتە قەبوول کرن.”

باشوورێ کوردستانێ، ستاتوویا سییاسی یا ھەرێما کوردستانێ، ئاشتی و ئەولەکارییا ھەرێما کوردستانێ، رەوشا ھەرێما کوردستانێ یا ناڤنەتەوی ژ بۆ ھەر کوردەکی دلسۆز جیھێ ریزێ و پشتگرییێ یە. ئەڤ ھەرێمە، ھێڤییا ملەتێ کورد و کوردستانێ، خەونا ملەتێ کورد و کوردستانێ زیندی دھێلیت. ھەر دەستێ کو درێژی ڤێ ھێڤییا ملەتێ کورد ببیت، ئەو دەست د خزمەتا دوژمنێن کوردستانێ دایە. ناهێتە قەبوول کرن.