پەکەکە بۆ کوردان گ…ە و بۆ خەلکێ گۆ…کە!

پەکەکە بۆ کوردان گ...ە و بۆ خەلکێ گ...کە!

رۆژ نینە کو پەکەکە و ھەڤالبەندێن وێ ئێریشی پارتی و بارزانی نەکەن و وان د رێزێن دوژمنی دا نەبینن. چ ل باکور بیت، چ ل رۆژئاڤا بیت، چ ل رۆژھەلات و چ ژی ل قەندیلێ بیت، ھەما بێژن ھەر رۆژ د چاپەمەنییا خوە و چاپەمەنییا خوە یا سیبەر دا وەکو “تەڤدا پرێس” ئێریشی پارتی و بارزانی دکەن و بارزانی وەک ھەڤالبەند و شریکێ ئاکەپێ وێنە دکەن و وەک خیانەتکارێ گەلێ کورد ددەنە ناسکرن. ئەڤ سیاسەتە نە سیاسەتا ئەڤرۆ یە، سیاسەتا بەری 30-40 سالایە و ئەڤرۆ ژی د بن ناڤێن جودا دا ھەمان ئێریش دهێتە کرن، ھەمان دوژمناتی دهێتە کرن، هەمان سیاسەتا قرێژی هەر رۆژ ل بن ناڤەکی دهێتە مەشاندن و ب سەدان دەرەو و سیناریۆ یێن ساختە دهێنە دروست کرن، پەکەکە ب رادەیەکێ د ڤێ یەکێ دا پێشکەفتیە کو نها د وارێ چێکرنا درەو و سیناریۆیان دا رکابەرییا دەرهێنەر، ئەکتەر و سیناریۆدانەرێن بۆلیوودا هندوستانێ ژ بۆ چێکرنا فیلمان دکەت. هندەک جاران پەکەکە ژ وان ژی دەرباس دکەت و دەرهێنەر و سیناریۆدانەرێن هۆلیوودێ ل بەرامبەر یێن پەکەکێ حەیری دمینن و نەشێن وەکو وان سیناریۆ و درەوان ل دووڤ هەڤ رێز بکەن و ژ بۆ خەلکێ بەرچاڤ بکەن! هەر درەوەک ژی گەلەک گران ل سەر پەکەکێ نا راوەستیت ب تەنێ 800-900 دۆلار تێچوونێن هەر درەوەکێ نە! نە گەلەک گرانە ژ بەرکو ئەو پارە ژ بەریکا وان ناهێتە دەر بەلکو ژ بەریکا جۆتکار و خەلکێ هەژار یێ دەڤەرێن سنۆری و باجا نە یاسایی و بازرگانیکرنا ب مادەیێن هوشبەر دەست وان دکەڤیت.

پەکەکە هندەک جارا ل بن ناڤێ خیانەتا پارتی و بارزانی ب کوردستانا مەزن (هەرچەند کو هەر کەس باش دزانیت، نها نە کوردستانا مەزن بەلکو خوە ناڤێ کوردستانێ ژی د مەژیکێ رێڤەبەرێن پەکەکێ دا نینە و هیچ واتەیا خوە نینە، تاکە تشتێ د مەژیکێ وان دا ب تەنێ براتیا گەلانە)، براتیا گەلان لێ ب تاما فارسی، ترکی و عەرەبی کو هەر دبیتە خولامینی و کۆلەتییا کوردان ژ بۆ ڤان نەتەوەیان. هندەک جاران ژی پەکەکە، پارتی ب ڤێ یەکێ سووچبار دکەت کو دخوازیت بچیتە ناڤ “هەرێمێن گەریلایان”! ڤێ چەندێ ب رەنگەکێ د چاپەمەنیا خوە دا رۆژانە باس دکەت کو کەسەک نە شەهرەزا بیت دێ وسا هزر کەت پارتی خواستییە دەرباسی ئامەدێ، مێردینێ، جۆلەمێرگێ، وانێ هتد… ببیت و ژ دەستێن پەکەکێ بینیتە دەر! ڤێ چەندێ ب رادەیەکێ زێدە ب لێڤ دکەت کو شییایە ئالیگرێن خوە قانع بکەت پارتی ئێریشی وان دکەت و ناهێلیت ئەو ئارام روونن!

پەکەکە نها وەکو گایێن ئیسپانی سەرەدەریێ دکەت

پشتی رێکەفتنا د ناڤبەرا هەولێر و بەغدایێ ل سەر ئاسایی کرنا شەنگالێ، پەکەکە ئەو لایەن بوو کو پێتر ژ حەشدا شەعبی و هەموو دوژمنێن کوردستانێ دژاتیا خوە ژ بۆ ڤێ یەکێ راگەهاند، هەر زوو دەست ب گەفا، مەش و خوەپێشاندانێن گرسەیی، سلۆگانێن مەزن، و خوە دەرخستنێ کر، پەکەکێ گەف ل باشوور و هێزێن پێشمەرگە کرن کو هەگەر بهێت و پێشمەرگە بچنە ناڤ شنگالێ دا، دێ شەرڤانێن وان ئێریشی سەر پێشمەرگەیان کەن، د ڤێ دەربارێ دا پەکەکێ چەندین جاران ئەڤ یەک دوبارە کر و چەندین جاران د چاپەمەنیا خوە دا باس کر، هندەک جاران رێڤەبەرێن قەندیلێ، ب رادەیەکێ گەرم دبوون کو باس ل شەرەکی ب خوین دکر، لێ ل بەرامبەر لەشکەرێ ئیراقێ ئەو گەلەک بێدەنگ مان، هەما بێژە ل بەرامبەری لەشکەرێ ئیراقێ پەکەکە ل شنگالێ کەرر و لال بوویە، ب تەنێ ئەو ل دژی پێشمەرگەیان داخویانیان ددەن و گەفان دکەن، هیچ کێشەیەک دگەل لەشکەرێ ئیراقێ نینە.

پەکەکە نها وەکو گایێن ئیسپانی سەرەدەریێ دکەت ل هەر جیهەکێ باس ل پێشمەرگە، کوردستانێ و بارزانی بهێتە کرن هەر راستەراست ئێریشێ دکەت، وەکو چاوا گایێن ئیسپانی دەما دەستمالا سۆر دبینن ئێریشێ دکەن، پەکەکە ژ بۆ هەموو کوردستانێ بوویە ئەڤ گایە.

“ب جان ب خوین ئەم ب تەرە نە ئەی ئاساییش”

 سێ ژ دوماهیک کارێن کو پەکەکێ ل دژی باشوور ئەنجامدای ئەڤەنە، یا یەکەم 8ێ چریێ غازی سالح ئالیخان، رێڤەبەرێ ئاساییشا گشتی یا سەرزێرێ تیرۆر کر. یا دویەمین، 28ێ چرییێ بۆریا نەفتا باشوورێ کوردستانێ تەقاند. یا سیێ ژی ئەو بوو کو د 4ێ چرییا دویەمین دا ل سەر رێکا ھێزێن پێشمەرگە ل چەمانکێ مینەک دانا و ب چەکێن گران ئێریشی کاروانێ پێشمەرگەیان کرن و پێشمەرگەیەک شەھید کر، ئەڤ کارە و چەندین کارێن دن ب تەنێ ل دژی پێشمەرگە و حکوومەتا هەرێمێ کرن داکو رێگریێ ل جێبەجێکرنا رێکەفتنا شنگالێ بکەن، لێ ل شنگالێ و ل بەرامبەر لەشکەرێ ئیراقێ نە ئاخافتنا وان هەیە نە ژی کارێ وان، گەلەک ب عاقلی بارەگەهێن خوە ژ بۆ لەشکەرێن ئیراقێ ڤالا دکەن و پاشڤە ڤەدکێشن، ب تەنێ چەند کەسان کۆم دکەن و سلۆگانێن “بژی، بژی”، “ب جان ب خوین ئەم ب تەرە نە ئەی ئاساییش” بلند دکەت!

پەکەکێ ل چەمانکێ ب بەهانەیا ڤێ یەکێ کو پەشمەرگە دخوازن دەرباسی “هەرێمێن گەریلایا ببن” مین ل سەر رێکا پێشمەرگەیێن ژینگەهێ دانا و ب چەکێ گران ئێریشی سەر پێشمەرگەیان کر، پێشمەرگەیەک شەهید کر و هندەک پێشمەرگەیێن دی ژی ب دژواری بریندار کرن، لێ ل شنگالێ نە ئەو سووک و نە ئەو بازار! هیچ تشتەک ل گۆرێ نینە، کی دخوازیت بهێت یان بچیت، گەلەک نۆرمالە ب تەنێ خوەدیێن سەرەکی یێن وێ ئاخێ واتە پێشمەرگە نەبن!

جەمیل بایک ل دەما رابووری داخویانیەک دا و راگەهاند کو ل هەر جیهەکێ خوینا گەریلا لێ رژابیت، ئەو جیهـ هەرێما گەریلا یە، ل گۆر ڤێ داخویانیا مام جەمیل بیت، یان پەکەکێ ل شەنگالێ خوین نەرێشتیە و هەموو ئاخاڤتنێن وان کو رۆژانە د چاپەمەنییا خوە دا دوبارە دکەن درەون، یان ژی پەکەکە دخوازیت ڤێ گۆتنا مەزنا ب راست دیار بکەت کو دبێژیت “فلان کەس ژ بۆ مە گ….یە و ژ بۆ خەلکی گۆ…..کە”! یانی نەوێریتە کەسێ لێ ژ بۆ مە قۆچان دئاڤێژیت! ئەڤە ژی ڤێ یەکێ باش خویا دکەت کو پەکەکە ب تەنێ ل دژی پێشمەرگە، کورد، ئالایێ رەنگینێ کوردستانێ و حکوومەتا باشوورێ کوردستانێ یە و هیچ کێشەیەک دگەل دەولەتێن داگرکەرێن کوردستانێ و لەشکەر و ئالایێ وان نینە.

ئەڤ کار و داخویانیێن پەکەکێ باشترین بەلگەنە کو پەکەکە ژ بۆ کو رێگریێ ل دروستبوونا دەولەتا کوردی بکەت و کوردستان سەربخوە نەبیت، ل ھەر چار پارچەیێن کوردستانێ بوویە ئاستەنگەک مەزن، ئاستەنگەک وسا مەزن کو ژ ئاستەنگێن دەولەتێن داگیرکەر مەزنترە. پەکەکە و رێخستنێن سەر ب وێ ڤە ل هەر چار پارچەیێن کوردستانێ ل سەر ناڤێ کوردان دژبەرییا خەتا نەتەوی دکەن و دخوازن کوردان د ناڤ سینۆرێن ھەر چار دەولەتێن داگیرکەر دا بخەندقینن، ب ناڤێ دیمۆکراسی و براتییێ کوردان ب وان دەولەتێن داگیرکەر ڤە گرێ بدەت و وان ژ مەژییێ نەتەوپەروەرییێ دوور بکەت. ئەڤ ھەلوەست ئێدی ئاشکەرا و راستەراست دەرکەتیە ھۆلێ، کەسەک ژی ناڤەشێریت.

بۆچێ پەکەکێ 42 سالە ل باکورێ کوردستانێ سیخور و ئاژانەک نەکوشتیە، شارەدارەک، وەکیلەک، والییەک نەکوشتیە؟!

پەکەکێ د دەستپێکا دامەزراندنا خوە دا خوە ب پێشەنگا ئاڤاکرنا دەولەتا کوردی دیارکر، پەکەکە ل دەستپێکێ ب رەنگەکێ تەڤ دگەرییا کو هەر کەسەکێ دگۆتە پەکەکەییان “سەرخوەبوونخواز”! د ناڤا کوردان دا زارۆکێن ب ناڤێ سەرخوەبوون زێدە بوون، باهرا پێتر یا شەرڤانان ئەو ناسناڤ ل خوە دکر، لێ بەلێ وەکو دیار ئەڤرۆ ئەو ناڤ قەدەغەیە، و نابیت هیچ کەسەک وی ناڤی ل خوە بکەت، گەر ل خوە بکەت ژی دڤێت باس ل سەرخوەبوونێ نەکەت، ب تەنێ دڤێت باس ل براتییا گەلان ئانکو (خولامینی و کۆلەتییا کوردان ژ بۆ ترک و عەرەب و فارسان) بکەت ئاخر گەر ب ڤی رەنگی نەبیت دێ جەنابێ ئاپۆ د ئیمرالیێ دا عاجز بیت، ئەڤ چەندە ژی وەکو کۆفریەکا مەزن دهێتە زانین! ژبەرکو سەرخوەبوون ل تێزێن ئیمرالیێ، ئانکو ل “پارێزنامەیا ئۆجالان”، “کۆمارا دەمۆکراتیک”، “خوەسەریا دەمۆکراتیک” ویێن دی ناهێت، وان پووچ دیار دکەت. ژ بەر وێ یەکێ پەکەکە ل دژی دامەزراندنا دەولەتا کورد رادوەستیت، و ژ بۆ ڤێ یەکێ هەر تشتێ ژ دەست وێ دهێت دکەت و دبێژیت. مافێ هیچ کەسەکێ ژی نینە بەرەڤاژی ڤێ بکەت، هەر کەس و لایەنەک بەرەڤاژی ڤێ یەکێ بکەت دێ پەکەکە د چاپەمەنییا خوە دا وەکو ئاژان، سیخور، کرێ گرتی، هەڤالبەندێ میتێ و ئاکپارتیێ و بێ نامۆس بدنە ناسکرن.

پەکەکێ 42 سالە ل باکورێ کوردستانێ سیخور و ئاژانەک نەکوشتیە، شارەدارەک نەکوشتیە، بۆچێ؟ پەکەکێ وەکیلەک، والییەک نەکوشتیە. لێ 42 سالن ڤی شەری د ناڤا گەلێ کورد دا دکەت و ب بەهانەیا “ئاژانتی و خیانەتێ“ تەنێ کوردا دکۆژیت، پەکەکە ل باکور و ل دژی ڤان کەسان بێ دەنگە لێ ل باشوور ب بەهانەیا سیخۆرییێ رێڤەبەرێ ئاساییشا سەرزێرێ کو یەک ژ پێشمەرگەیێن دێرین و کوردپەرەوەرەک کێم میناک بوو و ل هەر دو ئالیێن سینۆر ئانکو ل باکور و باشوورێ کوردستانێ گەلێ کورد گەلەک حەز ژ وی دکر و ئەو گەلەک باش ناس دکر ل پێش چاڤێن زارۆکێن وی شەهید دکەت و د رەڤیت. باشە، د ناڤا 42 سالان دەا پەکەکێ چ دا گەلێ کورد؟  4420 سالن سترییەک ژی نەچوویە د پییێ جەنەرالێن قەندیلێ را. تەنێ دێ فەرمانێ دەن و خۆرت و کەچێن کورد دەنە کوشتن.

پەکەکە دەولەتا کوردی ناخوازیت، بۆچی؟ هیچ کێشەیەک د گەل ئالایێ دەولەتا ترک ژی نینە، کێشەیا وێ دگەل لەشکەرێن ترک ژی نینە، د گەل دەولەتێ ژی هیچ کێشەیەک نینە، باشە پەکەکێ کێشە د گەل کێ هەیە؟

بێ گومان د گەل ئالایێ کوردان، پێشمەرگەیێن کوردستانێ، حکوومەتا باشوورێ کوردستانێ و هتد… د ناڤا کێشەیێن گەلەک کوور دایە، کێشەیێن ب رادەیەکێ کوور کو ل کێشەیێن ترک و فارس و عەربان د گەل کوردان دا گەلەک کوورتر و دژوارترن..

هەر ژ بەر ڤێ یەکێ یە کو دبێژین “پەکەکە بۆ کوردان گ….یە و بۆ خەلکێ گ…کە”!

پوستێن ھەمان بەش