ژ بۆ كو په‌كه‌كێ باشتر ناس بكن
عادل زه‌نگه‌نه، نڤیسكار و پێشمه‌رگێ دێرین یێ یه‌كێتییا نشتیمانی یا كوردستانێ، د مژاره‌كێ ده باس ل سه‌ده‌مێن پاشڤه‌كشینا هێزێن په‌كه‌كێ ل شه‌نگالێ دكه و دنڤیسه: «سه‌ده‌م چ بوو كو هه‌یا پۆلیسێن فه‌ده‌رال ل شه‌نگال نه‌هاتن به‌لاڤ كرن، په‌كه‌كێ ژ نوو ڤه بریارا پاشڤه‌كشینێ دا»؟.
زه‌نگه‌نه، باس ل ئاڤێتنا ئالا په‌كه‌كێ دكه و ب ڤی ئاوایی ده‌ست ب نڤیسا خوه دكه: «پاش هه‌فته‌یه‌كێ ژ به‌لاڤ بوونا 4 لیوایێن پۆلیسێن فه‌ده‌رال یێن ئیراقێ ل شه‌نگالێ، ژ بۆ جیبجیكرنا په‌یمانا ئاسایی كرنا ره‌وشێ ل گۆری په‌یمانا هه‌ولێر و به‌غدایێ، ئالا په‌كه‌كێ و وان كۆمێن میلیشیایێن دن كو ل سه‌ر هنه‌ك باره‌گه‌هان هاتبوو هلدان، ژ بال پۆلیسێن فه‌ده‌رال ڤه هاتن ئاڤێتن».
هه‌ر د ڤێ مژارێ ده، نڤیسكار روناهیێ دخه سه‌ر هنه‌ك خالێن گرینگ و ئاماژه ب وێ یه‌كێ دكه، «ئه‌ڤ هه‌نگاڤ ده‌ستپێكه‌كه باشه ب ئاراسته‌یا جیبجیكرنا وێ په‌یمانێ، لێ به‌لێ جیبجیكرنا په‌یمانێ مه‌به‌ستا ڤێ نڤیسێ نینه، به‌لكو مه‌به‌ست هه‌لوه‌ستا په‌كه‌كێ یه كو بێ كو تو كاڤه‌ندانه‌كێ بكه، ئه‌و ب ئاڤێتنا ئالایێن حیزبا خوه رازی دبه»، ژ ڤێ بوویه‌رێ و ژ بۆ كو په‌كه‌كێ باشتر ناس بكن، وه‌رن ب هه‌ڤرا بالێ بكشینن سه‌ر و فكر لێ بكن.
پشتره عادل زه‌نگه‌نه، ب هنه‌ك پرسان كو ئاراسته‌ی خوه‌نده‌ڤانان دكه، داخواز دكه خوه‌نده‌ڤان و گه‌لێ كوردستانێ ب خوه بریارێ ل سه‌ر ڤان كریارێن په‌كه‌كێ بده و ب ڤی ئاوایی دپرسه:
ژ ده‌ما كو په‌كه‌كێ خوه ل شه‌نگالێ سه‌پاندی، حكوومه‌تا باشوورێ كوردستانێ و كوردێن ئێزدی یێن شه‌نگالێ، ژ په‌كه‌كێ دخوازن كو ئه‌و وه‌كه هێزه‌كه نه‌شه‌رعی و غه‌ریب ژ بۆ شه‌نگالێ، ڤی باژاری چوول بكن، لێ به‌لێ په‌كه‌كێ ل همبه‌ر ڤێ داخوازا حكوومه‌تا باشوور و كوردێن ئێزدی یێن شه‌نگالێ، گه‌فا بكارئانینا هێزێ دكر و هنه‌ك سه‌ده‌مێن پر عه‌جێب ژ بۆ ڤان گه‌فێن خوه دگرتن، لێ كو نها پۆلیسێن فه‌ده‌رال ئالا حزبا وان ل شه‌نگالێ ئاڤێت و ژێره گۆتییه كو پێویسته هوون شه‌نگالێ چوول بكن، په‌كه‌كه ب ڤێ كش و ماتێ رازی بوویه و ده‌ستێ خوه ل سینگا خوه دایه و ژ وان ره گۆتییه: به‌لێ فه‌رمانا وه وێ جی ب جی ببه، چما ژ مێژه ڤه ده‌نگێ وه نه‌بوو؟
ژ ده‌ما په‌كه‌كێ ل رۆژئاڤا كوردستانێ ب ئاوایه‌كێ ته‌كئالی هنه‌ك رێڤه‌به‌ریێن خوه‌سه‌ر ژ بۆ خوه ئاڤا كرن، ل سینۆرێ ده‌ستهلاتا خوه و سینۆرێن خوه ل گه‌ل تركیێ، خاكا ژێر ده‌ستێ خوه نه‌كرنه بنگه‌ها ئێریشێن سه‌ر ئارته‌شا تركیێ ل ناڤا تركیێ ده، ئه‌ڤ ژی ژ بۆ كو رێڤه‌به‌ریێن وێ یێن خوه‌سه‌ر ئێمن بمینن، وه‌ختا تركیێ ژی ئێریشی وان كری، دیسا هه‌ر ژ به‌ر سه‌لامه‌تییا رێڤه‌به‌ریێن خوه‌سه‌ر یێن كو د ده‌ست ده مانه، هه‌موو په‌یمانێن نێڤبه‌را «ئه‌مه‌ریكا – تركیێ» و «رووسیا – تركیێ»، سه‌باره‌ت ب ڤه‌كشاندنا ژ ناڤچه‌یا ئه‌وله‌هیێ قه‌بوول دكن و ژ بۆ هه‌مان مه‌به‌ستێ ئاماده‌یه په‌یمانێ ل گه‌ل سووریێ بكه، لێ به‌لێ وه‌ختا حكوومه‌تا باشوور ژێره دبێژه: «برا مه ل باشوور حكوومه‌ت و ستاتۆیه‌كه یاسایی و ده‌ستووری هه‌یه، تو كاران نه‌كن كو سه‌لامه‌تییا ڤێ ستاتۆیێ و ڤێ حكوومه‌تێ بكه‌ڤه ژێر گه‌فێن تركیێ و بلا ئێدی گه‌لێ باشوور ب تایبه‌ت یێن گوندان و جۆتكارێن ناڤچه‌یێن سینۆر یێن نێڤبه‌را هه‌رێما باشوور و تركیێ زێده‌تر مالوێران نه‌بن، په‌كه‌كه د به‌رسڤێ ده دبێژه: باشوورێ كوردستانێ بوویه جیێ ب كرێگرتیێن تركیێ»!
ئه‌ڤجا پاش دیار كرنا ڤان دوو خالان، ژ هه‌وه خوه‌نده‌ڤانێن برێز دپرسم: توو و ویژدانا خوه، ئه‌ڤ ئه‌جێندایێن په‌كه‌كه خه‌باتێ ژ بۆ دكه، كورد و كوردستانی نه، یان دژه كورد، كوردستان و كوردستانییانه؟ ئه‌ز چ نابێژم، هوون بریارێ بدن.
