• بەشا یەکەم

سەرۆکێ حکوومەتا ھەرێما کوردستانێ مەسرور بارزانی پشتی کۆمبوونا حکوومەتێ ل ھەولێرا پایتەختا ھەرێما کوردستانێ پرێس کۆنفەرانسەک ئەنجامدا و ھەموو کەنالێن تەلەفزیۆنی ب زیندی ئەو پرێش کۆنفەرانس پەخش کر. کۆمیتەیا دیپلۆماسی یا کەجەکێ د 10ێ کانوونێ دا داخویانیەک وەشاند و بەرسڤا پرێس کۆنفەرانسا مەسرور بارزانی یا 9ێ کانوونێ دا. لێ ووسا دیار دبیت کو پەکەکە ب خوە ژی، ژ بەرسڤا خوە نە رازی نە و دزانن کو ئاخفتنێن وان ل سەر فێل و دەرەوان ئاڤا بوونە. ژ بەر ڤێ یەکێ، وان داخویانیەک دا، لێ وان ب رەنگەکێ داخویانی دا کو کەس پێ نەزانیت و بەلاڤ نەکەت. ANF ھەر گۆتنەکا کەجەکێ ب زووترین دەم بەلاڤ دکەت لێ ئەڤ داخویانییا کەجەکێ بەلاڤ نەکر. ئەڤ نووچە ب تەنێ د مالپەرا نووچەیان یا پەکەکێ ب ناڤێ رۆژ نیوز، کو ل سلێمانیێ وەشانێ دکەت، ھاتە بەلاڤکرن و گرنگی پێ هاتە دان. ژ بەر ھندەک سەدەمان، نەخواست کو کوردێن باکور و یێن کو ب ترکی نووچەیان دشۆپینن ڤێ داخویانیێ ببینن؟

کەجەکێ دیار نەکریە کا بۆچی ئالایێ کوردستانێ ھاتییە قەدەغە کرن

د داخویانییێ دا دهێتە گۆتن کو “ئاخفتنێن مەسرور بارزانی ئێرشێن ترکییێ ژ بۆ سەر پەکەکێ رەوا دکەن لێ بەلێ، ھەبوونا پەکەکێ ل ھەرێمێ رەواکرنا ھەموو جوورێن ئێرشا ترکییێ یە ژ بۆ سەر دەڤەرێ. وەسا خویا دکەت کو ھێڤییا کۆمیتەیا تێکلیێن دەرڤە یا کەجەکێ ئەوە کو مەسرور بارزانی ژی وەکو رێڤەبەرێن کەجەکێ د ناڤچاڤێن رایا گشتی بنێریت و راستییان نەبێژیت. ژ بەر کو یاکو مەسرور بارزانی گۆتی تەنێ راستیێن بەرچاڤن کو ژ لایێ ھەموو رایا گشتی ڤە تێنە زانین. بارزانی گۆتبوو “پەکەکێ ئالا کوردستانێ ل ھەموو ھەرێمێن کو د بن دەستهەلاتدارییا وان دایە قەدەخە کریە”. میناک، کەجەکێ دیار نەکریە کا بۆچی ئالایێ کوردستانێ ھاتییە قەدەغە کرن. دەستپێکێ بلا کەجەکە بەرسڤا ڤێ بدەت. کەجەکە ل پارچەیێن کوردستانێ دەستیریێ نادەت کو ئالایێ کوردستانێ بهێتە بلندکرن. ئەو بلا دەستپێکێ بەرسڤا ڤێ بدەت.

ژ بەر کو مەسرور بارزانی چەند راستیێن پەکەکێ ئاشکەرا کرن، ئەو پڕ دلتەنگ بوونە

موراد قەرەیلان، د 26ێ مەها چریێ دا د ستێرک تیڤی دا دەسرکەت، ئاخافتنەک کر و توهدید ل حکوومەتا ھەرێما کوردستانێ کرن و گۆت، “ئەز ناخوازم فەرمانا کوشتنا کوردان بدەمە فیدائییێن خوە.” قەرەیلان ب ڤێ ئاخفتنا خوە ڤە کەتیبونا خوە  و دوورکەتنا ژ ھەستێن وەلاتپارێزی و کولتورا کوردەواری دییار کر. پەکەکە-کەجەکە، کو ھەر کەسەکێ بچووک و بێ نرخ دکەن، ھەولدانێن ھەر کەسی پاشگوھ دکەن و ژ بۆ ھلوەشاندنا کوردستانا باشوور ژی ھەموو جوورێن دوژمناتیێ  رابەر دکەن.  ژ بەر کو مەسرور بارزانی چەند راستیێن پەکەکێ ئاشکەرا کرن، ئەو پڕ دلتەنگ بوونە.

پەکەکێ هەردەم بوویەر بەرەڤاژی کریە، چ جاران ل درەو کرنێ شەرم نەکرییە

ژ داخویانیا کەجەکێ تێ فاھم کرن کو ئەو ژ داخویانیا شەنگالێ گەلەکی عاجز بوونە. ب ئیحتمالەک مەزن، پەکەکێ ژ بۆ کو ل شنگالێ یاری و خیانەتا وان پێش چاڤ نەبیت، ئەڤ داخویانییە ب بێدەنگی وەشاندیە. ب راستی، پەکەکە ب سالانە ئێریشی حکوومەتا ھەرێما کوردستانێ و پەدەکێ دکەت، چ جاران پەدەکێ و حکومەتا ھەرێمێ ب ھەمان رەنگی بەرسڤ نەدایە پەکەکێ. پەکەکێ هەردەم بوویەر بەرەڤاژی کریە، چ جاران ل درەو کرنێ شەرم نەکرییە. ھەر دەم پەکەکێ تاوان ل دژی پارتی و کەسان کرییە لێ هیچ کەسەکێ نە گۆتییە وان “ھوون دەرەوان دکەن و ئێدی راوەستن” ڤێجا دەما کو بەرسڤا وان دهێتە دان ژی، ئەو دەڤێ خوە دئێخنە ناڤ لنگێن خوە و گۆتنێ دویڤ گۆتنێ، داخویانیێ دویڤ داخویانیێ بەلاڤ دکەن.

یا کو پەکەکە ل شنگالێ دکەت جاشایەتی یە و دخوازیت سیستەمێ جاشایەتییێ گونجاو بکەت

دڤێت خیانەتا پەکەکێ یا ل شنگالێ بهێتە ئاشکەرا کرن. ژ بەر کو پەکەکە ژ یاریێن خوە یێن شنگالێ و حەشدا شەعبی دترسیت و هندە نەرەحەتە و دخوازیت شۆپا وێ یا ل شنگالێ ڤەشێریت. پێویستە وەلاتپارێزێن کورد ڤێ خییانەتا پەکەکێ یا ل شنگالێ ناڤا چاڤێن وان بدەت و بینیتە رۆژەڤا ھەموو کوردان دا. د داخویانیا خوە یا چاپەمەنیێ دا، مەسرور بارزانی تەنێ د دەرحەقێ شۆپا پەکەکێ یا ل شنگالێ دا ئاگاھیەک بەرچاڤ کر و شرۆڤەیێن گران ژی نەکرن. لێ بەلێ، یا کو پەکەکە ل شنگالێ دکەت جاشایەتی یە و دخوازیت سیستەمێ جاشایەتییێ گونجاو بکەت.

یێن ل گەل حەشدا شەعبی د ناڤ ھەڤالبەندیێ دا بن ئەو بێ شک جاشن

د داخویانیا خوە یا چاپەمەنیێ دا، مەسرور بارزانی گۆت، “پەکەکە و هیچ ھێزەکا گرێدایی وێ ژ شنگالێ دەرنەکەتییە. ئەو تەنێ چەند دەمژمێران پاشدا ڤەکێشیان جل و بەرگێن خوە گۆھارتن و دیسا شوندا ڤەگەرییان. بەرەڤاژی ڤێ یەکێ؛ ھەژمارا وان هێشتا پێتر زێدە بوو.” ئەرێ، ئەڤ راستیا پرسگرێکا شنگالێ یە. یێ تەڤلی حەشدا شەعبی بوویی ھێزا پەکەکێ ب خوە یە. ژ بلی ھێزا ئێزدییا یا 200-300 کەسی، پەکەکێ ھێزەکا لەشکەری کو ژ 1000 کادرێن رۆژئاڤا و باکور پێک دھات زێدە کر و ھەمی ب فەرمی خستنە ناڤا رێزێن حەشدا شەعبی دا. حەشدا شەعبی تەڤگەرەکا دژە کوردە، حەشدا شەعبی بکوژا کوردایە، حەشدا شەعبی ژی مینا داعشێ تەڤگەرەکە کو دێ خوینا کوردا ڤەخوە.  رێکەفتنا ل گەل حەشدا شەعبی رێکەفتنە ل گەل دوژمنێ کوردان. هەڤالبەندییا ل گەل دوژمنێن کوردا ب رامانا جاشایەتییێ دهێت. دەما کو ئەو ل گەل حەشدا شەعبی د ناڤ ھەڤالبەندیێ دا بن ئەو بێ شک جاشن.

کێ ل گەل حەشدا شەعبی ھەڤالبەندی کر؟ پەکەکێ.

وی دەمی ما پەکەەک جاشە؟ بێ گومان، پەکەکە جاشە.

ھەڤکێشەیەکا ب ڤی رەنگی ئاسان ھەیە.

ژ بۆ کو پەکەکە چێتر تێبگەهیت ئەم دکارین ڤێ ببێژین. ل رۆژئاڤا و سووریێ، ئارتێشا نشتمانی یا سووری، کو بەرێ ژێ را د گۆتن  ئارتێشا  ئازاد (ئارتێشا سوری یا ئازاد) چ بیت، ژ بۆ کوردستانێ و ئیراقێ ژی حەشدا شەعبی ئەوە. ئەرێ، ئارتێشا ئازاد و حەشدا شەعبی ئاڤا یەک کانییێ نە ئاستا فکری، زێهنی و کەڤنەشۆپی دا. ئەوێن کو عەفرین و گرێ سپی تالان کری، ژن رەڤاندی و دەستدرێژی ل ناموسێ کری. گاڤا کو فەرسەندەک بکەڤیتە دەستێ حەشدا شەعبی دا دێ وەکو ئارتێشا ئازاد و داعشێ خوونا کوردان فر کەت. کەس و حیزبێن کو ل عەفرینێ ل گەل ئارتێشا ئازاد رێکەفتن کری خائینن. ھەر ووسا، یێن کو ل شنگالێ ل گەل حەشدا شەعبی رێکەفتنێ دکەن ژی خائینن. کەس نەشێت ببێژیت خائینێ من باشە یێ تە خرابە. خائین، خائینە ل کو دەرا کوردستانێ بیت.

پێویستە هیچ کەسەک ڤێ خیانەتا پەکەکێ کو ژ بۆ خوە ئێزدییان دکەتە ماسک قەبوول نەکەت. دڤێت ئەم ب پرۆپاگاندایا پەکەکێ نەخاپین و نەبێژین ” ئێزدییا حەشدا شەعب قەبوول کر”. کۆما کو پەکەکە وەکی گەلێ ئێزدی دەستنیشان دکەت، ب راستی تەنێ رێژەیا 5% ێ یا ئێزدییێن ل شنگالێ مایی نە. گروپەک بچووکە. ئەو ھەستێن چەند کەچ و دایکێن ئێزدییا ب کار تینن، ئەو گەریلایێن خوە، یێن کو ئێدی نکارن د مەرجێن چیایی دا بمینن، پیچەک ژ رۆژئاڤا، پیچەک ژ مەخموور دئینیت و وێنەیەکێ قەلەبالخ چێدکەت.  ل شنگالێ حەشدا شەعبی ب حەزا پەکەکە دمینیت.

پەکەکێ داخویانیا خوە یا چاپامەنیێ تەنێ ژ بۆ کو ڤان راستیان ڤەشێریت و دا کو کەس خیانەتا وان نەبھیزیت ب ڤەشارتی بەلاڤ کر

بەسێ ھۆزات و مستەفا کاراسو دخوازن تێکەلیێن خوە ل گەل دەولەتا ئیراقێ و حەشدا شەعبی دا ل پشت چەند ئێزدییان ڤەشێرن، د بن ناڤێ خوەسەریا دەمۆکراتیکا ئێزدییا، مافێ ئێزدییا یێ خوە ب رێڤەبرنێ، پەکەکە نەشێت خییانەتا خوە یا شنگالێ ڤەشێریت. لێ بەلێ، راستی گەلەک زەلالە کو پەکەکێ حەشدا شەعبی کرییە شریکێ خوە و تەڤلی وان بوویە. ناڤێ ڤێ شریکاتییێ خییانەتا نەتەوی یە.

پەکەکێ داخویانیا خوە یا چاپامەنیێ تەنێ ژ بۆ کو ڤان راستیان ڤەشێریت و دا کو کەس خیانەتا وان نەبھیزیت ب ڤەشارتی بەلاڤ کر. لێ خیانەتێن وان هندە مەزنن کو داخویانیێن چاپەمەنیێ یێن خاپینۆک، دەستکاری یێن چاپەمەنیێ و نووچەگەھانێن وان یێن کو نووچەیێن درەو چێدکەن ژی نەشێن وێ خییانەتێ بڤەشێرن.