• مەمەت مێردینی

خویا دبیت هێدی هێدی جەنەرالێ مە ئانکو مەزلووم عەبدی، ژ وێ رێیا راست یا گرتیە بەر خوە دوور دکەڤیت و ئێدی هەما بێژە وەختا وێ یەکێ یە جارەکا دی بکەڤیتە بن باندۆرا پەکەکێ و تەعلیماتێن وێ، وەکو دیار گڤاشێن گرووپا ئەنقەرێ ب تایبەتی جەمیل بایک ل سەر رۆژئاڤایێ کوردستانێ ب گشتی و ب تایبەتی ل سەر مەزلووم عەبدی جیهێ خوە گرتینە و مەزلووم عەبدی ژی ئالایێ سپی هەلکریە و چ دی نەشێت خوە ل بەر وان گڤاشان بگریت، لەوما ژ نەچاریا خوە، داخویانیێن نە ل گۆر حەزا خوە ددەت.

پشتی کو چەندین جاران مەزلووم عەبدی ژ بۆ چاپەمەنیێن ناڤخوە و دەرڤە داخویانی دای و تیدا سوپاسیا مەسعوود بارزانی و رایەدارێن دی یێن باشوورێ کوردستانێ کری و پەسنا وان دای ل دۆر هاریکاریا وان ژ بۆ رۆژئاڤایێ کوردستانێ، پشتی کو مەزلووم عەبدی، وەکو فەرماندارێ گشتی یێ هێزێن سووریا دەمۆکراتیک هەسەدێ چەندین گاڤێن باش ژ بۆ رێکەفتنا د ناڤبەرا پەیەنەدێ و ئەنەکەسێ ئاڤێتی و گوهـ نەدای خواستەک و هوشداریێن قەندیلێ، و چەندین جاران ژ لایێ رێڤەبەرێن پەکەکێ یێن ل قەندیلێ ڤە هاتی هشیار کرن کو نێزی رێڤەبەرێن باشوور نەبیت، وەکە خوەیا دبیت ئێدی تاقەتا مەزلووم عەبدی ل همبەر ڤان گڤاشان ب داوی هاتیە و دخوازە بالانسەکی دناڤبەرا داخویانیێن خوە ل سەر پەدەکێ و پەکەکێ چێکەت!

بوویەرێن چەند مەهن ل باشوورێ کوردستانێ روو ددەن پەیوەندیەک راستە راست ب مژارا دانووستاندنێن دناڤبرا هێزێن کوردی یێن رۆژئاڤا و رێکەفتنا شەنگالێ یا دناڤبەرا بەغدا و هەولێرێ دا هەیە، پەکەکە دخوازیت ب چێکرنا فەوزایی و کارێن ئیستیفزازی ل دژی حکوومەتا هەرێما کوردستنێ ژ لایەکێ ل دژی وان رێکەفتنا بسەکنیت داکو بکاریت کەمەرا شیعی کو ئیران دبیژیتێ “میحوەرێ مقاوەمەتێ” و بەرژەوەندیێن خوە یێن حزبی بپارێزیت، ژ لایەکێ دی دخوازیت شکەستنا خوە یا لەشکری و پاشڤەکێشی و شکەستنا خوە یا ل همبەر دەولەتا ترک ل باشوورێ کوردستانێ بپەچنیت و ژ بیرا گەل ببەت.

بۆچی پەکەکە ل دژی رێکەفتنا هێزێن کوردی یێن رۆژئاڤایە؟!

ژبەرکو دێ رێکەفتنا هێزێن کوردی ل رۆژئاڤایێ کوردستانێ، د ئاستا شێوەیێ رێڤەبرن و پرەنسیپێن وێ دا گۆھەرتنێن دیرۆکی ئاڤا کەت، وەک پێڤاژۆیا سالا 1998ێ د ناڤبەرا په‌ده‌كێ و یه‌نه‌كێ دا کو ب پەیمانا  واشنتۆن ھاتی ناسکرن ل رۆژئاڤا ژی ئەو پێڤاژۆ برێڤە دچیت و ئەڤ چەندە ل گۆر خواستەکا گرووپا رێڤەبەرا پەکەکێ “گرووپا ئەنقەرێ” نینە ژبەرکو وەکە پێش نها مە ئاماژە پێ کری ئەڤ چەندە ل گۆر بەرژەوەندیێن حزبی یێن پەکەکێ و ڤێ گرووپێ نینە.

رێڤەبەرێ پەکەکێ جەمل بایک، د 7ێ تەباخێ دا ھەڤپەیڤینەک ل گەل تەلەڤزیۆنا ستێرک ئەنجام دا. د ئاخافتنا خوە دا بایک، کو زێدە نادەرکەڤیتە پێشبەری چاپەمەنییێ لێ دەما دەردکەڤیت ژی، ژەھر ژ دەڤی دباریت، ژ بلی ھێزێن داگیرکەر، زێدەتر ئێریشی ھێزێن کوردستانی کر. وی  ب گۆتنێن ڤرتووڤالا بەحسا فاشیزما ئاکەپێ-مەھەپێ کر، لێ ب چ رەنگا باس ل دەولەتا ترکیێ نەکر. بایک ب ئاوایەکی نە راستە راست ئێریشی سەر شەخسێ مەزلووم عەبدی کر.

جەمل بایک دەستپێکێ ئێریش برنە سەر رۆژئاڤایێ کوردستانێ و وەها گۆت: “ھەکە ھوون دخوازن ژ بۆ رۆژئاڤا سوپاسیا کەسەکی بکەن، وی دەمی پێویستە سپاسیا سەرۆک ئاپۆ بهێتە کرن.”  مەبەستا جەمیل بایک ل ڤێرە ئەوە کو شاھین جیلۆ سوپاسیا مەسعوود بارزانی کربوو. تشتێ کو پەکەکە و جەمل بایک تەنگەزار کری ئەڤ چەندە بوو. ژ بەر کو سەرکردایەتیا پەکەکێ ھەول ددەت باشوورێ کوردستانێ د ناڤ کوردان دا بێ نرخ بکەت، شەرمەزار و بچووک بکەت، لێ رێڤەبەرییا رۆژئاڤا ھەمان دەم دا، سوپاسیا کاربدەستێن پەدەکێ و بارزانی دکەت کو د دەمێن دژوار دا هاریکاریا وان کرییە. ئەڤە سەدەمە کو جەمیل بایک گەفێن تووند ل شاھین جیلۆ دکەت و لێ بخوریت.

مژارا سەرەکی کو بایک ژێ عاجز دبیت، نێزکبوونا د ناڤبەرا رۆژئاڤا و باشوورێ کوردستانێ دایە. گەلۆ ژ بەر چ؟ ژ بەر کو ژ بۆ جەمل بایک، کوردستان تەنێ پەکەکەیە، تشتێ کو نەیێ پەکەکێ بیت، ئەو  نە کوردستانە. ژ بەر کو ژ بۆ جەمل بایک پەکەکە  ژ کوردستانێ مەزنترە.

پشتی ڤێ داخویانیا جەمیل بایک چەندین جارێن دی ژی بایک و رێڤەبەرێن پەکەکێ داخویانی ل دژی مەزلووم عەبدی دانە و بەر پێیێن وی تەنگ کرینە، ب ئاوایەکی کو گهیشت ئاستەکێ کو پەکەکە بخوازیت مەزلووم عەبدی ژ پۆستێ وی دوور بکەت و کەسەک دی ل جیهێ وی دانە، لێ بەلێ ژبەرکو پەکەکێ باش دزانی ئەمەریکا رێ ب ڤێ یەکێ نادەت ئەڤ مژارە سەکناند لێ گەف، هوشداری و دژاتیکرنا وان ژ بۆ مەزلووم عەبدی ب داوی نەبوو.

کارێن ئیستیفزازی یێن پەکەکێ ل دژی باشوورێ کوردستانێ و هەلوەستا مەزلووم عەبدی

وەکو دهێتە زانین کارێن ئیستیفزازی یێن پەکەکێ ل زینێ وەرتێ دەستپێکرن و هەیا نها بەردەوامن، رۆژ ناچیت پەکەکە کارەکی ئیستیفزازی ل باشوور ئەنجام نەدەت، وەکو کوردێن باشوور دبێژن هەما بێژە “پەکەکە کولاڤێ خوە ژ بۆ شەری دفرۆشیت”، پەکەکێ ل زینێ وەرتێ قیامەت ل سەر سەرێ حکوومەتا هەرێمێ راکر، پاشان رێڤەبەرێ دەریێ سینۆری یێ سەرزێرێ تیرۆر کر، بۆریا نەفتا حکوومەتا هەرێما کوردستانێ کو قویتێ گەلێ باشوور بوو ل ترکیێ تەقاند، ل چەمانکی مین ل سەر رێیا پێشمەرگەیان تەقاند و پشیمەرگەیەک شەهید و سێ یێن دی بریندار کرن، لێ بەلێ دەنگێ جەنەرالێ مە نەهات، ب تەنێ ئەڤە نەبیت کو د داخویانیەکێ دا ژ بۆ چاپەمەنیێ راگەهاند “د بوویەرێن د ناڤبەرا پەکەکێ و پەدەکێ دا ل باشوورێ کوردستانێ ئەم بێ ئالی دسەکنن”، ل ڤێرە ژ بلی کو مەزلووم باش فام دکەت ئەڤ “بوویەرە” نە دناڤبەرا پەکەکێ و پەدەکێ دا نە، بەلکو دناڤبەرا پەکەکێ و حکوومەتا باشوور دا نە و دزانیت کو پەکەکە یە سەدەم لێ ب زانابوون وەکو بوویەرەک د ناڤبەرا پەدەکێ و پەکەکێ دا ددەتە نیشاندان، داکو بکاریت خوە ژ ئێریشێن گرووپا ئەنقەرێ بپارێزیت، لێ پشتی کو ل داوی جار پەکەکێ ل ئامێدیێ ئێریشی سەر پێشمەرگەیان کری و پێشمەرگەیەک شەهید کری، مەزلووم عەبدوی د حیسابا خوە یا تویتەرێ دا گۆت “ئێرێشا پەدەکێ یا ل ئامێدیێ ل دژی گەریلایێن پەکەکی جیهێ شەرمەزاریێ یە”! گەلۆ کێ ئێریشی کێ کریە؟! ما قەی جەنەرالێ مە هندە چاڤگرتی و دوور ژ بوویەرانە کو نزانیت کێ ئێرشی کێ کریە و ڤێ داخویانێێ ددەت؟! بێ گومان نەخێر، ئەو باش دزانیت بوویەرێ چاوا روودایە لێ دخوازیت نزیکاتیا خوە ل گەل پەکەکێ بپارێزیت!

ئێریشێن سەر بارەگەهێن ئەنەکەسێ

 ژ بلی کارێن ئیستیفزازی یێن پەکەکێ ل باشوورێ کوردستانێ، ل رۆژئاڤا ژی پەکەکێ دەست ب چالاکیان کریە، یەکەم جار ئەڤ چالاکیێن پەکەکێ ب رێیا داخویانیێن کادرێن وێ یێن ل بن باندۆرا قەندیلێ دا بوون و هەردەم ئێریشی ئەنەکەسێ دکرن و بەرەڤاژی ئاخافتنێن د گوفتگۆیان دا داخویانی ددان و باس ل راوەستاندن و بێ ئەنجام بوونا گوفتگۆیان دکر، پاشان دەست ب ئیریشا سەر بارەگەهێن ئەنەکەسێ کر و د ڤێ چارچووڤێ دا د ڤێ حەفتەیێ دا هەر یەک ژ ئۆفیسێن ئەنەکەسێ یێن دربێسیێ و عاموودێ شەوتاندن و گوللـە ل وان بارەگەهان رەشاندن، ئەڤ چەندە ل بن گوهێ جەنەرال مەزلووم عەبدی هاتە ئەنجامدان لێ بەلێ جەنەرال مەزلووم پر ب هشیاری بێ کو پەکەکێ سووچبار بکەت (هەرچەند کو باش دزانیت پەکەکە سووچبارە)، ب ئارامی د حەسابا خوە یا تویتەرێ دا نڤیساند “مافێ تو کەسێ نینە ئێریشی بارەگەهێن ئەنەکەسێ و تو پارتیێن سیاسی ل رۆژئاڤا بکەت”، ژبەرکو باش دزانیت گەر ب پەیڤەکێ ژی باس ل وان کەسا و وی ئالی بکەت یێ کو ئەو کار ل دژی بارەگەهێن ئەنەکەسێ ئەنجامدای دێ بەرسڤەکا توند وەرگریت، برسڤەکا هندە توند کو دبیت ب کوشتنا وی ب داوی بهێت. باشتر ئەوە جەنەرال مەزلووم ئەڤ بوویەرا کو د بن دەستهلاتا وی دا روودای شەرمەزار کربا، نە وەک هاتبا و بوویەرێن باشوور کو دوورن ژ وی و هایداریا وی بەرەڤاژی کربا و ب دلێ پەکەکێ داخویانی دابا، ژبەرکو هەر کەس دزانیت بوویەر ب چ ئاوا قەومینە و پێویستە کی بهێتە شەرمەزارکرن.

ب راستی ژی ئەڤ ئاخافتنا مە یا بەرێ گەلەک راست دەرچوو، شیرۆڤەکرنەکا وەها کو مرۆڤ رۆلەکێ گەلەک مەزن بدەتە مەزلووم کۆبانی و ببێژیت ڤی کەسی خوە ژ پەکەکێ دۆرخستییە ئەڤ یەکە وێ شیرۆڤەیەکا شاش بیت، ژ بەر کو مەزلووم کۆبانی ب سالان د رێڤەبه‌رییا پەکەکێ دا جی گرتییە و د ناڤا پەکەکێ دا ب ئاوایەکی پراکتیکی و پێکئانینا کار و سیاسەتا پەکەکێ خوە پێشخستییە، د سالێن دەستپێکی یێن پیڤاژۆیا رۆژئاڤا دا، ل سالێن 2011-2014ێ، مەزلووم کۆبانی رۆلەکێ سەرەکی و بنگەهین د دەرخستنا ئەنەکەسێ و ئەو پارتیێن نەگریدایی ب پەکەکێ ڤە ل رۆژئاڤا هەبوویە، یانی مەزلووم عەبدی «شاهین جیلۆ» نەفریشتەیەکە، وی ژی نانێ پەکەکێ خوارییە، و هەر کەس ڤێ یەکێ دزانیت.

ب راستی ژی هەر وەک چەوا ژ مشکا پەزکیڤیێن ئازاد یێن سەر چیا و زنارێن کوردستانێ ژ دایک نابن، ژ پەکەکێ ژی کەسێن ئازاد و ولاتپارێز و کوردپەروەر دروست نابن.