ئهم ڤهگهرین وێ ئامارا كو پهكهكێ دوهـی راگههاندی، خوهیایه كو د ههر جهنگهكێ دا، سێرڤێس كرنا نووچهیێن زیانێن دوژمن ب زانهبوون دهێـته كرن، ئارمانج ژێ بلندكرنا مۆرالا هێزان و شكاندنا مۆرالا هێزێن دوژمنه، لێ بهلێ ئهڤ یهك ل سهر جهنگا شانۆیی یا پهكهكێ ل دژی تركیێ جی ب جی نابیت، بۆچی؟ ئهمێ ب كورتی بێژین.
پهكهكه ب ڤان درهوان فكرا گهلێ ترك ل همبهر كوردان رادیكالتر دكهت
ئارمانجا پهكهكێ نه بلند كرنا مۆرالا گهریلایانه، ژ بهر كو گهریلایان خوه مۆبایلهكه ئاسایی ژی ڤێ نینن، ئهڤجا دێ ب چ ئاوایی دهستێ وان گههیته ئینتهرنێتێ و سۆسیال مهدیایێ، یا راست، بهلاڤ كرنا نووچهیێن درهو ل دهربارا كوشتنا عهسكهرێن ترك، بهرا ههر تشتی فكرا تركان ل همبهری كوردان یهكگرتی و رادیكالتر دكهت، ئهڤ نووچه دبنه ئهگهر كو گهلێ ترك ب ههموو هێز و شیانێن خوه پشتگریێ بدهنه ههنگاڤێن حكوومهتا ئهردۆگان یێن گرتنا بهشهكا ههری مهزن یا خاكا باشوورێ كوردستانێ.
پێگهها داركا مازی ل ناڤهراستا ڤێ سالێ مژارهك د ڤێ دهربارێ ده بهلاڤ كربوو و تێدا باس ل وێ راستیێ كر كو ههر كوردهكێ ب سهركهتنا جهنگاوهرێن كورد ل همبهر سوپایێ تركیێ كهیفخوهش نهبیت، پێویسته ئهو گۆمانێ ژ كوردبوونا خوه بكهت و وهك د ئهدهبیاتێن كوردی دا هاتی، ئهڤ كهس ب «كوردێن خوه فرۆش» هاتینه ناڤ كرن.
لهوما ئهڤا كو دڤێ نڤیسێ دا ههیه، ناهێت وێ واتایێ كو مه دڤێت سهركهتنێن گهریلایان بهرزه بكهین، لێ بهلێ پێویسته ئهم د هشیار بین كو نووچهیێن نهراست و بهرهڤاژ كرنا راستییان، گهلهك جاران زیانێ ب دۆزا نهتهوهیا مه دگههینیت.
لهوما ل دوماهیێ ئهم دبێژین: خوزی درهوێن پهكهكێ راست بان و رۆژانه ب ههزاران كهس ژ سوپایێ تركیێ هاتبان كوشتن، خوزی درهوێن پهكهكێ راست بان و عهفرین، گرێ سپی، سهرێ كانیێ ب وی ئاوایێ هۆڤ ژ دهست نهچووبان، خوزی پهكهكێ باوهری ب مافێ سهرخوهبوونا یهكجار یا نشتیمانێ كوردان و سهرخوهبوونا كوردستانێ ههبا و خوینا ڤان ههموو گهنجان ژ بۆ بهرژهوهندییا دهولهتێن داگیركهر نههاتبا رێشتن، خوزی و هزار خوزی گهریلا و ئهندام و ئالیگرێن پهكهكێ ل شوونا رادیكالبوونێ ب ئاوایهكی لۆژیكی سیاسهت، گۆتار و بریارێن رێخستنێ ههلسهنگاندبان و د مهرهما راستین یا رێڤهبهر و سهروكانییا سهرهكی یا بریاران «ئیمرالیێ» تێگههشتبان.
