٣٠ میلیۆن کەسێن ب ھونەرێ را پەیوەندیدار د ناڤ زەحمەتیێ دا نە

ئیسال ڤیروسا کۆرۆنایێ باندۆرەکا مەزن ل ھەموو جورێن ھونەرێ کر. جیھێ کۆنسێرت، شانۆ و سالۆنێن موزیکێ ھاتنە گرتن. موزیکار، شانۆگەر، سینەماگەر بەتال مان. یۆنسکۆ داخویانیەک بەلاڤ کر و تێدا باس ل 30 میلیۆن کەسێن د قادا ھونەری دا کار دکەن کر.

یەکەم جار پار ڤێ مەھێ ل  ووھانا چینێ ڤیروسا کۆرۆنایێ دەرکەت. ژ وێ رۆژێ حەتا نھا ل دنیایێ نێزیکی 80 میلیۆن کەس ب ڤێ ڤیروسێ کەتن، نێزیکی 1.8 میلیۆن کەسا ژیانا خوە ژ دەست دا. و ڤیروسێ باندۆر ل ھەموو سێکتەران کر.

رێخستنا چاند، زانست و پەروەردەھیێ یا نەتەوەیێن یەکبوویی (یۆنسکۆ) بال کێشا سەر رەوشا گرانا هونەرێ و خەباتکارێن وێ. سەرپەرشتا گشتی یا یۆنیسکۆیێ ئاودرەی ئازۆولای بال کێشا سەر زەحمەتیێن ڤی سێکتەری.

ئەڤە ھندەک خالن ژ گۆتنێن وێ:

– د سێکتەرێ هونەری دا 30 میلیۆن کەس کار دکەن و ئەو د ناڤ زەحمەتیێ دا نە و پێدڤیا وان ب هاریکاریێ ھەیە.

– نێزیکی 10 میلیۆن کەسێن ژ بۆ سینەمایێ کار دکەن دبیت بەتال بمینن.

– د 6 مەھێن کو کۆنسێرت نەھاتینە ل دار خستن دا زیانێن ڤی سێکتەری نێزیکی 10 میلیار دۆلارا یە.

– د قادا ناڤنەتەوەیی دا رێژەیا بەلاڤکرنێ دێ سەدی 7.5 کێم بیت.

– خەباتکارێن موزەخانە و گالەریان ژی د خەتەرەیێ دا نە؛ کەسێن ل ڤان دەران کار دکەن نیڤا وان دێ بەتال مینن.