سازیا ژنان یا ب ناڤێ پلاتفۆرما “ئەم دێ کوشتنا ژنان راوەستینن” راگھاند، د سالا 2020ێ دا 300 ژن ل ترکیێ ھاتینە کوشتن.
پلاتفۆرما “ئەم دێ کوشتنا ژنان راوەستینن” راپۆرتا خوە یا سالانە یا دەربارێ کوشتن و توندووتووژیا ل دژی ژنان ل ترکیێ بەلاڤ کر.
ل گۆر وێ راپۆرتا ھاتیە بەلاڤکرن د سالا 2020ێ دا ب گشتی 300 ژن ھاتنە کوشتن و 171 ژن ژی ب ئاوایەکی گومانبار مری ھاتینە دیتن.
ئەو راپۆرت دیار دکەت، ژ وان ژنێن ھاتینە کوشتن؛ 97 ژ ئالیێ ھەڤژین، 54 ژ ئالیێ دەزگر، 38 ژ ئالیێ کەسەکێ ناس، 21 ژ ئالیێ ھەڤژینێن بەرێ، 18 ژ ئالیێ کور، 17 ژ ئالیێ باب، 16 ژ ئالیێ کەسووکار، 8 ژ ئالیێ دەزگرێ بەرێ، 5 ژ ئالیێ برا، 3 ژ ئالیێ کەسێن نەناس ڤە ھاتینە کوشتن و 23 ژن ژی نەھاتیە زانین کا ژ ئالیێ کێ ڤە ھاتینە کوشتن.
د راپۆرتێ دا تەکەزی ل سەر وێ دهێتە کرن کو 22 ژن ژ بەر سەدەمێن ئابۆری و 96 ژن ژی ژ بەر سەدەمێن مینا؛ رەدکرنا داخوازا زەواجێ، داخوازا جودابوونێ، رەدکرنا پەیوەندیێ ھاتنە کوشتن و سەدەما کوشتنا 182 ژنان ژی نەھاتیە زانین.
ل گۆر راپۆرتێ، 181 ژن ل مالێن خوە، 48 ل کۆلانێ، 15 ل جھێ کار، 14 ل زەڤیێ، 11 د ئۆتۆمۆبیلێ دا، 5 ل ھۆتێلێ، 4 ل جھەکێ تەنھا، 1 د عمبارا داران و ژنەک ژی ل جوانکاریێ ھاتیە کوشتن و جھێ کوشتنا 20 ژنان نەھات زانین.
دەربارێ چاوانیا کوشتنا وان ژنان دا ژی د راپۆرتێ دا دهێتە گۆتن، 170 ب چەک، 83 ب ئامرازێن وەک کێر و بڤر، 26 ب لێدانێ، 26 ب خەنقاندن، 2 ب شەوتاندنێ، 1 ژن ب ماددەیێن کیمیاوی و ژنەک ژی ب ئاڤێتنا ژ بلنداھیێ، ھاتینە کوشتن.
پلاتفۆرما “ئەم دێ کوشتنا ژنان راوەستینن” ئاشکەرا دکەت کو ژ ژنێن ھاتینە کوشتن، تەنێ دەربارێ 23 ژنان دا بریارا پاراستنێ ھەبوویە، 45 ژ وان گلی ل ناڤەندێن پۆلیسا تۆمار کربوون و د قۆناغا ژھەڤجودابوونێ دا بوون و ھەروھا ھاتیە گۆتن، نەھاتیە زانین کا بریارا پاراستنێ دەربارێ 263 ژنان دا ھەبوویە یان نە!
