بەشا یەکەمین

پەکەکە یێک ژ وان رێخستنێن ئایدۆلۆژی یە کو ل سەر تەئۆریێن مارکسیست لینینیست ل باکورێ کوردستانێ هاتیە ئاڤاکرن، پەکەکە مینا پارتیێن دی یێن ئایدۆلۆژی خوەدی سیستەمەک توندە د ناڤخوە و دەرڤەیا رێخستنا خوە دا، پشتی تەسلیم بوونا ئۆجەلان ب دەولەتا ترکیێ ل سالا 1999ێ هندەک ژ سەرکردەیێن ڤێ پارتیێ ژ بەر داخویانی و هەلوەستێن ئۆجەلان د زندانا ئیمرالیێ دا و گوهەرینا ستراتەژییا پەکەکێ ژ ئاڤا کرنا دەولەتەک سەربخوە ژ بۆی براتیا گەلان ژ ڤێ پارتیێ جودا بوون کو پشت را پەکەکێ ئەڤ کەسە ب خائین و ئاژان، میت و ولاتفرۆش دانە ناساندن و هەژمارەک هەری زێدە ژ وان کوشتن، یێن ماییی ژی پرانیا وان ب گەف و گڤشاتنان هاتنە بێدەنگکرن.

پێگەها دارکا مازی ب پشت بەستن ل سەر پرتووکا “پارتا کارکەرێن کوردستانێ ژ عەبدولا ئۆجەلان هەیا جەمیل بایک ” یا نڤیسەر “حامید گەوهەری”، هەر وەها ئاخافتنێن هندەک کەسێن سەرکردە یێن ژ پەکەکێ قوت بوویی دێ هەول دەت راستیا پەکەکێ و سەدەما قوتبوونا وان ئاشکەرا بکەت و ژ بۆ گەلێ کورد دەتە دیار کرن یاکو پەکەکە ب خیانەت ناڤ دکەت تەڤ کوردایەتی و نیشتیمانپەروەری بوویە و ئەو کەسێن رازی نەبووی بکەڤنە بن باندۆرا فەرمانێن شاش یێن ئۆجەلان د زندانا ئیمرالیێ دا کو دەولەتا ترکیێ ب وی ددان دەرکرن ژ پەکەکێ جودا بوونە.

ل دەستپێکێ ئەم دێ ب نیزامەدین تاش ئانکو “بۆتان” کو یەک ژ ئەندامێن سەرکرداتیا پەکەکێ بوویە دەستپێکین و ژ زار دەڤێ وی باس ل سەدەمێن جودابوون و راستیا پەکەکێ کین.

نیزامەدین تاش “بۆتان” ل سالا 1961ێ ل باژێرێ مووشێ یێ سەر ب قەزا وارتۆ ژ داییک بوویە. ژ بۆ مامۆستاتیێ خواندیە، لێ بەلێ پێش کو ببیتە مامۆستا ل سالا 1976ێ تەڤلی رێزێن گرووپا ئایدۆلۆژیکا “پەکەکێ” بوویە. ل سالا 1984ێ حەتا سالا 2004ێ فەرماندارێ لەشکری یێ پەکەکێ بوویە. ل سالا 1986ێ و کۆنگرەیا سێیەمین بوویە ئەندامێ سەرکرداتیا پەکەکێ و ل کۆنگرەیا شەشەمین دا بوویە ئەندامێ کۆنسەیا سەرۆکاتیا پەکەکێ. بۆتان ب ڤی رەنگی باس ل جودابوونا خوە ژ پەکەکێ دکەت و دبێژیت:

“ئۆجەلان گۆت ئارمانجا مە نە ئاڤاکرنا دەولەتەک سەربخوەیە”

پشتی تەسلیم بوونا عەبدوللا ئۆجەلان، ل سالا 2000ێ دا جوودا بوون د ناڤا رێزێن پەکەکێ دا دروست بوویە، ئاپۆ هندەک پەرتووک ل دەربارا دەستەسەرکرنا خوە دا نڤیساندن. پەکەکێ دگۆت ئارمانجا مە ئاڤاکرنا دەولەتا سەربخوە و دەمۆکراتیکە و گەریلا ژبۆی ڤێ یەکێ شەری دکن، لێ بەلێ پشتی تەسلیم بوونا ئاپۆ، وی راگهاند دەولەتا ترکیێ دەمۆکراتیکە و پێویست ناکە ئەم شەری ل دژی بکین، رێیا چارەسەرکرنا پرسگرێکا کوردان ل ترکیێ رێیا سیاسی و دەمۆکراتیکە نە رێیا لەشکری و شەر. هەر وەها ئۆجەلان گۆت ئارمانجا مە نە ئاڤاکرنا دەولەتەک سەربخوە یە، ئەم دێ پرسگرێکا کوردان د چارچۆڤا ترکیێ دا چارەسەر کین. مە ژی گۆت ژبەرکو پەکەکێ دەست ل دەولەتا کوردی بەردایە، دڤێت ستراتەژییا خوە ل سەر بنگەها سیاسەت و دەمۆکراتیەتێ ئاڤا بکەت و دڤێت د وارێن رێخستن، ئایدۆلۆژی، فەلسەفە، پراکتیک و ب ئاوایەک گشتی هەموو سیستەما خوە بگوهریت. ژ بۆی ڤێ یەکێ ژی پێویستە بەرنامەیەک نوو دانە و ل گۆری ستراتەژییا نوو ریفۆرمێ بکت.

“مە کۆنگرەیا 8ێ پێک ئانی و ناڤێ پەکەکێ ژ بۆی “کۆنگرەیا ئازادی و دەمۆکراتییا کوردستانێ” کادەک گوھەراند”

مە گۆت گەر ژ بۆی جارەکا دی بریارێ بدین دەولەتا کوردی ئاڤا بکین باشە، گەر نا دڤێت ئەم شەری بسەکنین. ژ بۆی وێ ئارمانجێ نابیت کورد بهێن کوشتن. ل سەر ڤان گۆتنێن مە ب ئاوایەک گشتی ئاخافتن هاتنە کرن و ئەڤ ئاخافتن ژ لایێ هەر کەسەکی ڤە، خوە جەمیل بایک ژی هاتن پەژراندن. مە کۆنگرەیا 8ێ پێک ئانی و ناڤێ پەکەکێ ژ بۆی “کۆنگرەیا ئازادی و دەمۆکراتی یا کوردستانێ” KADEK گوهەراند. ب پرانیا دەنگان ئەڤ ناڤ د کۆنگرەیێ پەکەکێ دا هات پەژراندن، ژ بۆی کو بریارێن مە ب فەرمی بێن ناسکرن، مە ژ بۆی ئیمرالیێ شاندن دا کو ئاپۆ ئیمزا بکەت، ئاپۆ ل دژی نەسەکنی و ب زارەکی قەبوولکر، لێ هەر حەفتەیەکی گوهەرینەک د نووتێن مە دا دکر و پرۆگراما مە ڤالا دەرخست و ئەم ژی ناچار ماین ل گۆری ئۆجەلان وان نووتان بگوهەرین. بۆ میناک ناڤ ژ بۆی “ئەنجوومەنا جڤاتا کوردستان بۆ کۆنفەدرالیزما دەمۆکراتیک بۆ رۆژهلاتا ناڤین” گوهەری.

“ئۆجەلان ٣ پارێزەرێن خوە ب ناڤێن مەحموود شاکار “زلامێ ئەرگەنەکۆن”، عیرفان دۆندار “کو پشت را ھات زانین سەر ب میتێ یە” و بەکر کایا سەرۆکێ نھا یێ شارەداریا “وان”ێ شاندن قەندیلێ”

پشت را حکوومەتا ئاکەپێ هندەک گاڤ ژ بۆی دەمۆکرات کرنا دەولەتێ ئاڤێتن. ئەڤ مژارە ب دلێ جەنەرالێن لەشکرێ ترکیێ نەبوو،  ژبەرکو سەکناندنا شەری دەستهلاتێن وان کێم کربوون. ژ بەر ڤێ یەکێ ژ ئۆجەلان خواست پەکەکە جارەکا دی شەری ل دژی لەشکرێ ترکیێ بکەت داکو رەوشا ترکیێ ئالۆز ببیت. ئۆجەلان 3 پارێزەرێن خوە ب ناڤێن مەحموود شاکار “زلامێ ئەرگەنەکۆنێ”، عیرفان دۆندار “کو پشت را هاتە زانین سەر ب میتێ یە” و بەکر کایا سەرۆکێ نها یێ شارەداریا “وان”ێ کو نامەیەک ب وان را بوو و تێدا هاتبوو نڤیساندن ئەڤ کەسە وەکیلێن منن، شاندن قەندیلێ. ئەڤ سێ کەسە بۆ دەما سێ مەها ل قەندیلێ مان و هندەک جاران جڤین ل گەل گەریلایان ئەنجام ددان و گۆت ب بریارا سەرۆک ئاپۆ دڤێت کۆنگرەیەک ئاوارتە بهێتە پیکئانین و د وێ کۆنگرەیێ دا بریارا شەر کرنێ بدین.

“17 ئەندامێن سەرکرداتیا پەکەکێ ل دژی خواستەکا ئۆجەلان سەکنین و ل سالا 2004ێ ژ پەکەکێ قوت بووین”

پارێزەرێن ئۆجەلان هەموو حەفتەیان ڤەدگەرین ترکیێ و ل گەل جەنەرالێن ترکیێ دجڤین و جارەکا دی ڤەدگەرین قەندیلێ. ب سەدەما ڤان هاتن و چوونا جارەکا دی ناڤێ پەکەکێ ل سەر رێخستنێ هاتە چەسپاندن کو ئەم ئەڤ 17 ئەندامێن سەرکرداتیا پەکەکێ ل دژی ڤێ خواستەکێ سەکنین و ل سالا 2004ێ ژ پەکەکێ قوت بووین: نزامەدین تاش “بۆتان”، خەلیل ئاتاج “ئەبۆبەکر”، خدر یالچین “سەرهات خدر”، ساری قەیا “ئەکرەم، دورسن عەلی کووچک، عوسمان ئۆجەلان “فەرهاد”، فەیسەل دوملایجی “کانی یلماز”، رەحیمە یلدرن، شاپۆر بادوشیوە “سیپان رۆژهلات”، کوردێ ناڤچەیا سەلماس ئا رۆژهلاتێ کوردستانێ، سالع “کەمال سوور”، کوردێ رۆژئاڤا کوردستانێ، حەسەن ئاتمەجات “فەرحان”، سلێمان قایدن “جەلال شرنەخی” و…هود.

هێژایی گۆتنێ یە کو ژ ڤان 17 کەسا 8 کەس ژ لایێ پەکەکێ ڤە هاتن کوشتن. هەر وها زیدەتر ژ 2000 گەریلایان ل گەل مە ژ پەکەکێ جودا بوون.

د بەشا دویەمین ژ ڤێ نڤیسێ دا ئەم دێ باس ل “خەلیل ئاتاج” ب کۆد ناڤێ ئەبوبەکر، یەک دی ژ ئەندامێن سەرکرداتیا پەکەکێ کین کو ب سەدەما گوهەرینا ستراتەجییا پەکەکێ پاش تەسلیم بوونا ئۆجەلان ب دەولەتا ترکیێ ژ ڤێ پارتیێ جودا بوو.

ل بەندا مە بن…