خوەندەکارێن گوندێ ئۆسیانێ سەر ب ناڤچەیا بەرواری ڤە ل پارێزگەھا سێرتا باکورێ کوردستانێ د سەقایەکێ دا کو پلەیا گەرمێ 12 پلەیا ل ژێر سفرێ یە، رۆژانە چەند دەمژمێران د ناڤ بەرفێ دا دمەشن تا کو خوە دگھینن بلنداھیەکێ ل دەردۆرا گوند ژ بۆ کو ژ خوەندنا خوە پاش دا نەمینن.
خوەندەکارەک دبێژیت، “ئەم دخوازین ئینتەرنەت و تۆرێن پەیوەندیێ بۆ مە بێن دانین. ھەر رۆژ ئەم 3 کیلۆمەترا دمەشن، بێھنا مە تەنگ دبیت، لنگێن مە رەق دبن و دەستێن مە گەلەک دوەستن.” ل باکورێ کوردستانێ نەبوونا تۆرا پەیوەندییا تەلەفۆن و ئینتەرنەتێ ل ناڤچەیێن دوور، یەک ژ پرسگرێکێن سەرەکی یە ل بەر پرۆسەیا خواندنا ئۆنلاین. ل هەژمارەکا گوند و ناڤچەیان تۆرا پەیوەندییا تەلەفۆنێ نینە و ھەر ژ بەر وێ یەکێ ژی ژێرخانا ئینتەرنەتێ تێدا نەھاتیە دانین.
خوەندەکارەک دی دبێژیت، “ئەز ئێدی ناخوازم ل ڤێرە وانەیێن خوە بخوینم، دخوازم ل مالێ وانەیێن خوە بخوینم.”پشتی کو یەکەم پێکەتیێ کۆرۆنایێ رۆژا 11ێ ئادارا سالا دەرباسبوویی ل ترکیا و باکورێ کوردستانێ ھاتیە راگھاندن و ژ بەر بەلاڤبوونا وێ پەژیکێ دەریێن دبستانا ژی ھاتن گرتن و ب رێیا کەنالەکی تەلەڤیزیۆنی (ئەبا)یێ سەر ب وەزارەتا پەروەردەیا ترکیێ ڤە بۆ قۆناخێن سەرەتایی و ناڤەندی پرۆسەیا خوەندنێ ژ دوور دەستپێ کر.
ل گۆر ئاماران حەتا نھا زێدەتر ژ 2 ملیۆن و 300 ھەزار کەس ل ترکیا و باکورێ کوردستانێ ب ڤیروسا کۆرۆنایێ کەتنە و رۆژ ب رۆژ ئامارا پێکەتیان زێدە دبیت و ئەڤ یەک ژی رێگرییێ ل ئاساییبوونا پرۆسەیا خواندنێ دکەت، لەوما پرانیا خوەندەکاران ب رێیا ئۆجلاین وانەیێن خوە دخوینن، لێ بەشەک ژ خوەندەکارێن باکورێ کوردستانێ ژ بەر نەبوون ئان ژی لاوازیا ژێرخانا خواندنا ئۆنلاین، راستی پرسگرێک و زەحمەتیەک مەزن تێن.
