لۆفیگارۆ: په‌كه‌كه خه‌ته‌ره‌كا جددی یه ل سه‌ر باشوورێ كوردستانێ
رۆژنامه‌یا لۆفیگارۆ یا فره‌نسی، راپۆره‌ك ل سه‌ر نیازێن ئاردۆگان به‌لاڤ كرییه و و تێدا وه‌ها نڤیسایه: «سالا 2021ێ، دێ سالا به‌فره‌هخوازییا هه‌رێمی بیت بۆ سه‌رۆكێ تركیێ، ئاردۆگان ئێدی ته‌نێ ب ئێریشێن ئاسمانی ل سه‌ر په‌كه‌كێ ل باشوورێ كوردستانێ رازی نابیت، دێ هنه‌ك گاڤێن دی هاڤێت».
رۆژنامه‌یا لۆفیگارۆ یا فره‌نسی د راپۆره‌كێ دا كو ل داوییا سالا رابووری 2020 به‌لاڤ كرییه گۆتییه كو سه‌رۆكێ ده‌وله‌تا تركیێ نیازێن به‌رفره‌هخوازیێ ل سالا 2021ێ هه‌نه، پشتی كو ل سالا رابووری ده‌ستوه‌ردان د هه‌ر یێك ژ سووریا، لیبیا و قه‌فقازێ دا كری، د ئیسالێ دا ژی دێ به‌رێ خوه بده‌ته ئیراقێ و باشوورێ كوردستانێ.
ڤێ رۆژنامێ نڤیسایه: «ئاردۆگان ئێدێ ته‌نێ ب ئێریشێن ئاسمانی یێن ل سه‌ر په‌كه‌كێ ل باشوورێ كوردستانێ رازی نابیت، ئارته‌شا ترك دێ هه‌ژماره‌كا دی یا ئۆپه‌راسیۆنان ل ژێر ناڤێن جودا ل ڤێ هه‌رێمێ پێك ئینیت و دێ پێگه‌هێن خوه یێن له‌شكه‌ری ژی زێده بكه‌ت».
لۆفیگارۆ دبێژیت: «ئاردۆگان دێ ڤان ئیریشان ب به‌هانه‌یا چه‌كدارێن رێخستنا په‌كه‌كێ ل سه‌ر باشوورێ كوردستانێ پێك ئینیت».
د به‌شه‌كا دی یا ڤێ راپۆرێ دا ئاماژه ب ده‌ستوه‌ردانێن تركیێ د هه‌ر یێك ژ ده‌وله‌تێن سووریێ، لیبیا، ئه‌رمه‌نستان و قوبرس و یه‌ونانستانێ دا ژی كرییه و گۆتییه كو هه‌ڤپه‌یمانێن تركیێ پر ژ ڤێ ده‌وله‌تێ عاجزن و ئه‌و گه‌هشتینه وێ باوه‌ریێ كو ئێدی رێككه‌فتن ل گه‌ل سه‌رۆكێ پارتییا داد و گه‌شه‌پێدان نه‌مومكینه بهێته ئه‌نجام دان.
پێگه‌ها داركا مازی ل سالا رابووری راپۆره‌ك ل ده‌ربارا نه‌خشه‌رێیا په‌كه‌كێ و تركیێ بۆ باشوورێ كوردستانێ به‌لاڤ كربوو و تێدا ئه‌شكه‌ره كربوو كانێ په‌كه‌كه ب چ ئاوایی به‌هانه‌یان دده‌ته ده‌ستێ تركیێ كو له‌شكه‌ركێشیێ بۆ باشوورێ كوردستانێ بكه‌ت و ب چ ئاوایی ده‌ڤه‌رێن باشوور هێدی هێدی بۆ ئارته‌شا تركیێ چوول دكه‌ت.
