رۆژ ل باشوور دهەلێت

دروستکرنا فەوزایێ، ترسێ و بەلاڤکرنا پرۆپاگاندایا، ناکۆکی و جوداهیێن دەرۆنی، بەرەڤ پێش برنا روحا بێ ئۆمێدیێ و بێ مۆرالیێ ل جهێ ئۆمێدواری و چالاکییان، گرنگی پێنەدان ب مژارێن گرنگێن کوردستانێ و نۆرمال دیتنا ئێریشێن دوژمنان ل سەر باشوورێ کوردستانێ ب بەهانەیا دژایەتیکرنا پارتیەکا دیارکری ژ وان جورە ئێریشێن چاند و کولتووری و شەرێ نەرمێ سیستەماتیکە کو دەولەتێن دوژمن ب تایبەتی ئیران و ترکیا ل سەر باشوورێ کوردستانێ ئەنجام ددەن.

چارلز لیندبلام یەک ژ زانایێن دیار یێن ئەمریکایێ دبێژیت، “ئاراستەکرن و نەچارکرنا مرۆڤان ب ئەنجام دایینا کارێن بەرەڤاژی حەزا دلێ وان ب سێ رێکان مومکینە: ب زۆرێ، پەڤگوهارتن و قانعکرن. ب نەرینا وی د سەدسالا بیس و یەکێ دا ژ ئالیەکێ بکارئانینا زۆرێ و شێوازێن نەچارکرنا ئاشکەرا، تێچوونێن هەری گران هەنە و نایێ قەبوولکرن، ژ ئالیەکێ دی هندەک ژ کەسێن ئامادە ژ بۆی  ئەنجامدایینا کارەکی بەرەڤاژی حەزا خوە ب ئارمانجا دەستڤەئانینا بەرژەوەندیێن ئابووری نینە و ئیمکانا بکارئانینا ئالاڤێن ئابووری ژ بۆی دەستهلاتدارییا ل سەر خەلکێ سینۆردارە، لێ بەلێ بەرفرەهبوونا سازیێن چاپەمەنیێ و خەباتا وان یا د وارێن جودا، جودا یێن ژیانێ دا قانعکرن کرییە باشترین و ب باندۆرترین ئالاڤ ژ بۆی ئاراستەکرنا خەلکێ بۆ سەمت و جیهێ دلخواز.

شەرێ نەرم ل کوردستانێ چەوا دهێتە برێڤەبرن؟

شەرێ نەرم کو ل دووڤ ژناڤبرنا هزر و رامان و نرخێن جڤاکا هەدەفکری یە داکو زنجیرا فکری و چاند و کولتووری یا وان پووچ بکەت و ب بۆمبەبارانا نووچەیێن نە راست و پرۆپاگاندایێن سیاسی، جڤاکی و ئابووری دخوازیت بێ باوەریێ د ناڤا جڤاکێ دا بەلاڤ بکەت ژ وان مژارانە کو د دەمێن گەلەک کەڤن دا، د جیهانێ دا هاتییە هەبوونێ. ئەڤ مژارە ل دژی کوردستانێ ب گشتی و باشوورێ کوردستانێ ب تایبەتی دەمەک درێژە دهێتە مەشاندن ژ بەرکو دەستێن دوژمنێن سووند خواری یێن ڤی گەل و ولاتی ژ چاڤکانیێن سرۆشتی یێن ڤێ پارچەیا کوردستانێ قوت بوویە و نەشێن وەکو پێش نها ڤان چاڤکانیێن خوەزایی یێن کوردان ل دژی وان ب خوە بکاربینن و پارەیێ ژ فرۆتنا ڤان چاڤکانیێن سرۆشتی ب دەست وان دکەڤیت جارەکا دی ب تانک و تۆپ و جەبلخانە بدەن و ل دژی کوردان بکار بینن.

دەولەتێن دوژمن هەما بێژە نها ژ شەرێ رەق ئانکو بکارئانینا هێزا لەشکری ل دژی باشوورێ کوردستانێ بێ هێڤی بوونە، ژ بەر کو ئەڤ پارچەیا ئازادا کوردستانێ ژ ئالیەکێ خوەدی باوەرمەندیەک ناڤنەتەوی یە و ژ ئالیەکێ دی د نها دا ئەنجامدایینا شەرەک لەشکری ژ بۆی دەولەتێن دوژمن ل دژی باشوور دێ تێچوونێن زێدە ل دووڤ خوە ئینیت و ژ لایێ ناڤنەتەوی و ناڤخوە ژی نایێ قەبوولکرن، لەوما ئەڤ دەولەتە ب تایبەتی ئیران ب رێیا حیزبێن ل بن دەستهلاتا خوە دا وەکو ئێکەتیێ و پەکەکێ نها ب بکارئانینا شەرێ نەرم دخوازیت ئارمانجا خوە یا ژناڤبرنا هەرێما باشوورێ کوردستانێ ل ژێر ناڤ و نیشانێن جودا دا پێک بینیت.

پەکەکە ل سلێمانیێ ب چ ڤە مژوولە؟!

د نها دا پەکەکێ وەکو بەشەک ژ ئەجیندایا ئیرانێ ل باشوورێ کوردستانێ ب تایبەتی ل باژارێ سلێمانیێ ب رێیا دروستکرنا چەندین رێخستنێن جڤاکا سڤیل و دەزگەهێن چاپەمەنیێ و بکارئانینا سۆسیال مەدیایێ ژ بۆی پارڤەکرنا پرۆپاگاندایێن ل دژی هەرێمێ ب بەهانەیا دژاتیکرنا پارتی شەرەکی نەرمێ مەزن ل دژی باشوور دمەشینیت و شییایە رایا گشتی ل سلێمانیێ ب ئاستەکی مەزن بێخیتە بن باندۆرا خوە و ژ بۆ وێ سەمتا ئەو دخوازیت ئاراستە بکەت.

پەکەکێ ب رێیا مەدیا و رێخستنێن خوە یێن کو ل ژێر ناڤێ رێخستنێن چڤاکا سڤیل ئاڤاکرینە شییایە هێزەکا نەرم دروست بکەت، و شییایە ب ڤێ یەکێ باندۆرێ ل سەر رایا گشتی دروست بکەت و د بەرژەوەندا خوە دا بکاربینیت، ئەڤ هێزا نەرما پەکەکێ د ئەساس دا ل دژی داخوازێن نەتەوی و نشتمانی یێن باشوورێ کوردستانێ و د بەرژەوەندا دەولەتێن داگیرکەردا یە، پەکەکە ب رێیا ڤێ هێزێ رایا گشتی چەواشە دکەت و وەها ددەتە نیشاندان کو دەستدرێژییا پەکەکێ ژ بۆی سەر ستاتۆیا باشوورێ کوردستانێ نە دەستدرێژیی یا ل سەر هەرێمێ یە بەلکو شەرێ پەکەکێ ل دژی پارتی یە.

خەبات ژ بۆی بێ بوها کرنا ئەزموونا حکومەتا هەرێما کوردستانێ و مەزن کرن و گرینگ نیشاندانا ئەزموونا رێڤەبەرییا خوەسەرا پەکەکێ ل رۆژئاڤا کوردستانی یەک ژ ئارمانجێن سەرەکی یێن پەکەکێ و دووڤەلانکێن وێ یە

خەبات ژ بۆی بێ بوها کرنا ئەزموونا حکومەتا هەرێما کوردستانێ و مەزن کرن و گرینگ نیشاندانا ئەزموونا رێڤەبەرییا خوەسەرا پەکەکێ ل رۆژئاڤا کوردستانی یەک ژ ئارمانجێن سەرەکی یێن پەکەکێ و دووڤەلانکێن وێ یە، بۆ میناک پەکەکێ ل سالا 2019ێ دا هژمارەک نڤیسکار و رۆژنامەنڤیسێن باشوور داخوازکرن رۆژئاڤا، ژ وان: دکتۆر فارۆق رەفیق، سەرۆکێ ناڤەندا حیکمەت ژ بۆ لێکۆلینێن فەلسەفی، هاوژین مەلا ئەمین کو برایێ مووسەنا ئەمینێ پارلەمانتەرێ یەکگرتۆیا ئیسلامی یا کوردستانێ یە، هاوژین کو کەسەک مولحدە و سەرۆکێ ناڤەندا سوهرەوەردییە ژ بۆ لێکۆلینا ئۆل و ئەفسانەیان، مەنسوور تەیفۆری سەرۆکێ رێخستنا ناوەخت کو کادرەکێ دیارێ پەکەکێ یە ل باشوورێ کوردستانێ…هتد، ژ دیارترین وان کەسانە کو پەکەکێ داخواز کرینە رۆژئاڤا کوردستانێ. ڤان کەسان پشتی ڤەگەرین ژ رۆژئاڤا کوردستانێ هەژمارەک سمینار ل ژێر ناڤێ “رۆژ ل رۆژئاڤا هەلتێت” برێڤە برن کو هەموو ئارمانجا وان کرێتکرن و لێدانا حکوومەتا هەرێما باشوورێ کوردستانێ و جوانکرن و گرنگ نیشاندان و مەزنکرنا رێڤەبەرییا خوەسەرا رۆژئاڤا کوردستانێ بوویە.

هەرچەند کو ئەڤ کەسە باش دزانن ب چ رەنگا رۆژئاڤا ل گەل باشوور ناهێتە بەراوردرن لێ بەلێ ژ بەرکو ژ چەندین ئالیان تەعلیمات ب وان هاتینە دایین ئەو ناچار دمینن ب ڤی ئاوا تەڤ بگەرن. ل گۆر زانیاریێن پشتراستکری هندەک کادرێن پەکەکێ کو ل ئیرانێ تەڤلی پەروەردەهییا شەرێ نەرم بوونە نها ب ئاوایەکی سیستەماتیک ل سەر ڤێ یەکێ کار دکەن، وان ب سەدان پەیێجێن فەیسبووکێ، ب دەهان کانالێن تەلەفزیۆنی و رۆژنامە و مالپەرێن ئەلیکترۆنی ب وان پەرەیان دروستکرینە کو وەکو باج ژ خەلکێ هەژارێ دەڤەرێن سنۆری دستینن و هزرێن خوە یێن گەمار پێ بەلاڤ دکەن، هزرێن وەها کو ل گۆر حەز و خواستەکا دوژمنانن و ل دژی حەز و داخوازا هەموو نشتیمانپەروەرێن کوردە.

رۆژا کورد و کوردستانێ، نە ل رۆژئاڤا نە ل باکور و نە ژی ل رۆژهەلات هەل ناهێت، بەلکو رۆژا تەڤ کورد و کوردستانییان ل باشوور هەلتێت

ب ڤی ئاوا تەڤگەرینا پەکەکێ وەکو پێش نها مە باس کری ژ ئەنجامێ خەوا کوورا رایەدارێن ئێکەتیێ و نە ناسکرنا پەکەکێ ژ ئالیێ وان دهێت، هەرچەند کو پێش نها پیچەکێ ئێکەتی هشیار بوویە و گوهێ هندەک ژ ڤان کەسان کێشایە، لێ بەلێ هێژان ژی ئەڤ کەسە کار دکەن و نە ب تەنێ بوونە مەترسی ل سەر باشوور ب تەنێ، بەلکو د نها دا بوونە گەفەکا جدی ل سەر ئێکەتیێ ب خوە ژی، ژبەر ڤێ چەندێ ئەم دبێژین بەرا کو هەر تشت ژ دەست ئێکەتیێ ب خوە ژی دەرکەڤیت دەم هاتیە ئێکەتی ژ خەوا خوە یا گران رابیت و چاڤێن خوە ڤەکەت، دەم هاتیە ئێکەتی وەکو پارتیەکا کوردی یا باشوورێ کوردستانێ راستییا پەکەکێ فام بکەت و وەکو چاوا رەحمەتا خوەدێ لێ بیت مام جەلال ئەو ناسکری، رێڤەبەرێن نها یێن ئێکەتیێ ژی ب وی رەنگی پەکەکێ و مەترسییا وێ ل سەر باشوور ناس بکەن.

ل داوییێ ئەم دبێژینە پەکەکێ و هەموو کرێگرتیێن وێ یێن خوە وەکو رەوشەنبیر، نڤیسکار، ولاتپارێز، رەخنەگر و دلسۆزێن کوردستانێ ددەنە نیشاندان: رۆژا کورد و کوردستانێ، نە ل رۆژئاڤا نە ل باکور و نە ژی ل رۆژهەلات هەل ناهێت، بەلکو رۆژا تەڤ کورد و کوردستانییان ل باشوور هەلتێت و دێ رۆژەک هێت رووناهیا ڤێ رۆژێ دێ چاڤێن هەموو دوژمن و نەیارێن ڤێ ئاخێ کورە کەت.