د سەردەما مە یا ئیرۆ دا هەڤدەم ل گەل بەرفرەهبوونا چاپەمەنیێ و زێدەبوونا ئاستا خواندنا خەلکێ، هێزا رایا گشتی گرنگیەکا پێتر ب خوە ڤە دیتیە. رایا گشتی بوویە مژارا لێکۆلین و خوەندنا بسپۆرێن بیاڤێن جودا یێن وەکو ئابۆرناسان، دیرۆکنڤیسان، رۆژنامەڤانان، دەروونناسان، جڤاکناسان و سییاسەتڤانان. بەشداربوونا ب ڤی ئاوا یا بسپۆرێن بیاڤێن جودا د خواندن و لێکۆلینکرن ل سەر رایا گشتی دا ڤێ یەکێ ددەتە خوەیا کرن کو ئەڤ مژارە د چارچووڤەیا هیچ یەک ژ ڤان بیاڤێن تایبەت دا نینە، بەلکو بوویە مژارەکا گشتی و پر گرینگ.
رایا گشتی د هەر وەلاتەکی دا ل وی دەمی دبیتە جیهێ مەترسی یێ دەما کو ژ لایێ دەولەتەکێ یان رێخستنەکێ یانژی گرۆپەکێ دوژمن ڤە ب رییا شەرێ نەرم دهێتە هەدەفکرن، هەر وەکو وێ یاکو نها ل باشوورێ کوردستانێ ب گشتی و ل سلێمانیێ ب تایبەتی ژ لایێ ئیرانێ و رێخستن و گرووپێن سەر ب وێ ڤە دهێتە برێڤەبرن.
شەرێ نەرم کو ب پرۆپاگاندایێن چاپەمەنیێ و پسکۆلۆژی رایا گشتی ئارمانج دکەت و بێ هیج پەڤچوونەک و بکارئانینا هێزا رەق جڤاکی بەر ب شکەستنێ و کارڤەدانێن توندڤە دبەت دیرۆکەک گەلەک کەڤنار هەیە. تەڤی کو د سەدسالا 21ێ دا شەرێ نەرم گرینگیەکا هەری زێدە ب خوە ڤە دیتیە و هندەک ژ دەولەتان بێی مەزاختنا هیچ تێچوونەکا زیدە ب تەنێ ب رێیا شەرێ نەرم دگەهن ئارمانجێن خوە، لێ بەلێ هێژان ژی هندەک دەولەت هەنە کو ژ بۆ گارانتیکرنا بەرژەوەندیێن خوە د سیاسەتا دەرڤە دا ژ شەرێ رەق ژی مفا وەردگرن داکو پێترین دەستکەفتان ب دەست خوە بخن.
د نهایا کوردستانێ دا ژی ب تایبەت ل باشوورێ کوردستانێ دەولەتێن دوژمن، ب رێیا بکارئانینا شەرێ نەرم ل دژی ستاتۆیا باشوور دخوازن بەرژەوەندیێن خوە بپارێزێن و رێ نەدەن کورد بگەهنە ئارمانجا خوە یا دیرۆکی، ئەڤ دەولەتە ب رێیا بکارئانینا پرۆپاگاندا و درەوێن مەزن ب سەدەما هەبوونا کریزا ئابووری ل باشوورێ کوردستانێ کو وان ب خوە دروست کریە، دخوازن رایا گشتی یا کوردان د بەرژەوەندیا خوە دا بکار بینن، ژ بۆ ڤێ یەکێ بەرهەڤیێن باش ژی کرینە و دخوازن ب رێیا هندەک پارتیێن کوردی یێن خوە فرۆش ڤی کارێ قرێژی ئەنجام بدەن، وەکە هەردەم ژی، ژ بەختێ رەشێ کوردان پارتیێن کو دێ ببن هەڤکار و رێنیشاندەرێن دوژمنان ل باشوور نە کێمن.
پەکەکە وەکە یەک ژ پارتیێن کوردی کو د نها دا ب تەمامی کەتیە بن باندۆرا ئیرانێ دا و ئیران چەوا بخوازیت دکاریت وێ ب وی ئاوا ئاراستە بکەت، ل باشوور ب گشتی و باژارێ سلێمانیێ ب تایبەتی دەست بکار بوویە و دخوازیت ب بەهانەیا هەبوونا کریزێن ئابووری کو دوژمنێن کوردستانێ دروست کرینە، رایا گشتی ل باشوورێ کوردستانێ چەواشە بکەت، مخابن کو ب سەدەما ئاگەهـ ژ خوە نەبوونا ئێکەتیێ و هەبوونا چاپەمەنیەکا بهێز، پەکەکە حەتا ئاستەکێ مەزن شییایە باندۆرێ ل سەر رایا گشتی ل سلێمانیێ و حەلەبچە و گەرمیان دروست بکەت.
پەکەکە ب 2 رێیان باندۆرێ ل رایا گشتی دکەت، ئەو رێ ژی ئەڤنە:
یەکەم: ب رێیا راستەراست و بکارئانینا وان رێخستن و سازی و ناڤەندێن جڤاکا سڤیل کو دربرینێ ژ سیاسەتا پەکەکێ دکەن و شانازیێ ب ئاپۆچیتیێ دبەن، ژ وان:
- “تەڤگەرا ئازدییا کوردستانێ، کو رێخستنەکا پەکەکێ یە و ب ئاوایەکێ ئاشکەرا چالاکیێن سیاسی ئەنجام ددەت و تەڤلی خوەپێشاندان و مەشێن گرسەیی ل سلێمانیێ دبیت. هەر وەها هەبوونا هندەک بارەگەهـ و سازیێن حیزبی کو ژ بۆ چالاکیێن حیزبی تێنە بکارئانین، وەکە : ئاڤاهییا فایەقی مۆتێ، کو دکەڤیتە تاخێ چوارباخ ل سلێمانیێ.”
- چاپەمەنی، پەکەکە د ڤی واری دا پر بسپۆرە، ئەو ب رێیا هەبوونا چاپەمەنیەک ب هێز وەکو هەبوونا چەندین کەنالێن تەلەفزیۆنی یێن وەکو “رۆژ تیڤی، ئاریان تیڤی، ستێرک، ژن تیڤی …هتد، و هەبوونا هەژمارەکا هەری زێدە یا پەیامنێران و کۆمبۆنێن وان ل ئاڤاهیەکێ بازرگانی یێ مەزن ل باشوورێ سلێمانیێ کو دکەڤیتە سەر جاددەیا 60 مەتری ل بەرامبەری فاملی مۆلێ، کارەک جددی ل سەر کارتێکرن ل سەر رایا گشتی ل سلێمانێێ دکەن.
- ب خراب سوود وەرگرتن ژ یاسایێن حکوومەتا هەرێما کوردستانێ چەندین رێخستنێن جڤاکا سڤیل ل سلێمانیێ دروست کرینە، ژ ڤان رێخستنا: “ریخستنا ب ناڤێ ناوەخت کو مەنسوور تەیفۆری یەک ژ رۆژنامەڤانێن رۆژهەلاتێ کوردستانێ برێڤە دبەت، ئەو ل سەر مەژیکێ گەنجان کار دکەن و دخوازن وان بکەن ئاپۆچی، رێخستنا چەپک کو رێخستنەکا کولتووری یە، ڤێ رێخستنێ پشتی دەرکەتنا ڤیروسا کۆرۆنا سەمتا کارێن خوە ژ بۆی کارێن خێرخوازی گوهەراندیە، رێخستنا نوێگەر و چەندین رێخستنێن دی کو هەر هەموو د ئاراستێ بەرژەوەندیێن حیزبی یێن پەکەکێ دا تەڤ دگەرن و باندۆرێ ل رایا گشتی دکەن.
دویەم: ب رێیا نەراستەراست، پەکەکێ و تەڤگەرا ئازادی کادرێن خوە یێن کو ب ئاپۆچی تێنە ناسکرن دەرباسی ناڤا سازیێن حکوومی و حیزبی و مەدیایی ل سلێمانیێ کرنە، ژ بۆ میناک، پەیمانگەها کوردی ژ بۆ هلبژارتنان کو ئارام جەمال ب رێڤە دبەت، ل بن باندۆرا تیزێن ئاپۆ دا یە ب ئاوایەکێ نە راستە راست خزمەتا بەرژەوەندیێن پەکەکێ دکەت.
د ڤی چارچۆڤە دا 56 رێکخراوێن جڤاکا سڤیل کو پرانیا وان سەر ب پەکەکێ ڤە بوون ب مەرەما پرۆتەستۆکرنا شەرێ د ناڤبەرا “پەدەکێ و پەکەکێ” دا کو د ئەساس دا ئێریشا پەکەکێ ل سەر حکوومەتا هەرێما باشوورێ کوردستانێ یە، د دەما رابووری دا داخویانیەک نڤیسکی پارڤەکر، ئارمانجا ڤان رێخستنان د داخویانیا وان دا ب زەلالی هاتە دیتن، وان خواست وەها بدەن نیشاندان کو یا روو ددەت شەرێ د ناڤبەرا پەکەکێ و پەدەکێ دا یە، نە وەک کو ئێریشا پەکەکێ ژ بۆی سەر ستاتۆیا فەرمی یا هەرێما کوردستانێ بیت. یا هەری بالکێش د ڤێ یەکێ دا ئەڤەیە کو پەکەکە شییایە باندۆرێ ل یەک ژ رێکخراوێن جڤاکا سڤیل کو ژ لایێ پارتی ب خوە ڤە دهێتە پالپشتی کرن ب ناڤێ رێخستنا “شار” بکەت، ڤێ رێکخراوێ ژی داخویانیا ڤان رێکخراوان ئیمزا کریە، ئەڤ یەک د دەمەکێ دا یە کو پارتی مەهانە 1000 دۆلاران وەکە کرێ یا ئۆفیسا وان ددەت، هەر وەها د دەما 15 سالێن رابووری دا ب هاریکارییا پەدەکێ چەندین جیهێن بازرگانی ژ بۆ ڤێ رێخستنێ هاتینە دروستکرن!
ئەڤ رەوشە ژبەر بێ ئاگەهییا ئێکەتیێ و مژوولبوونا رایەدارێن وێ ب کارێن بازرگانی و نە شەهرەزاییا وان ژ پەکەکێ پەیدا بوویە، ئێکەتی ب ئاوایەکی کار دکەت کو مرۆڤ دبێژیت ئەو نها د خەوەکا گراندایە. دبیت سەدەمەکا دی یا بهێزبوونا رێخستنێن پەکەکێ ل سلێمانیێ ژ بۆی ئارمانجا وان یا سەرەکی کو خوە د دژاتیکرنا هەموو کارێن پارتی دا دبینیت ڤەگەریت، هەر کەس باش دزانیت کو پەکەکە و ئێکەتی نها ب تەمامی کەتینە بن باندۆرا ئیرانێ و هەر فەرمانەکا ژ تەهرانێ بهێت، زوو ژ ئالیێ ڤان دو پارتیان ڤە دهێتە جێبەجێکرن.
دێ وەختەک هێت کو ئێکەتی ژ ڤێ خەوا گران رابیت و بینیت هەر تشت ژ دەستێ وێ دەرکەتیە، لێ بەلێ ل وێ دەمێ پووشمانی فایدە ناکەت، راستە نها ئێکەتی د خەوەکا خوەشدایە لێ بەلێ ب هشیاربوونا وێ، ئەو دێ کابووسەکا گەلەک ب ترس بینیت، کابووسەکا وەها کو چ جاران هیچ کەسەکێ نەدیتبیت و نەخواستبیت ببینیت.
نها پەکەکە تەڤی ئێریشێن خوە یێن ل سەر باشوورێ کوردستانی ئێریشا چاپەمەنیێ ژی دکەت، ئێریشا چاپەمەنیێ و پارڤەکرنا پرۆپاگاندایا هەڤدەم ل گەل ئێریشا فیزیکی نە ب تەنێ وێ پێکهاتەیا جڤاکا هاتیە ئارمانجکرن گوهریت، بەلکو دێ بیتە سەدەم کو بنگەها سیاسی و کلتووری یا وێ جڤاکێ ب تەمامی ژناڤ بچیت و ب ڤێ یەکێ رەوشەک باش ژ بۆ دەستهلاتداریا کەسێ ئێریشکار (پەکەکە-ئیران) دێ دروست بیت.
دوژمن د شەرێ نەرم دا زەمینەیێ ژ بۆی قەبوولکرنا ئێریشا بییانیان خوەش دکەت، هەر وەها زەمینەیێ ژ بۆی دروستبوونا کریزان و پەڤچوونێن ناڤخوە ژی دروست دکەت.
یا مە باسکری ب تەنێ دلۆپەکە ژ وێ بەحرا زانیاریان کو د دەستێ مە دایە، مخابن حەتا نها نە ئێکەتی نە ژی کوردێن باشوور ب گشتی وەکو ئەم گەلێ باکور پەکەکێ ناس دکین، ئەو وسا پەکەکێ ناس ناکەن، هەر دەما پەکەکە وەکو خوە بهێتە ناسکرن هیچ کوردەکێ ب شەرەف ل گۆر ئەجیندا و سیاسەتا وێ تەڤناگەریت، ژ بەر کو ئەو ب تەمامی تەسلیمی دەولەتێن دوژمن و سازیێن وان یێن ئیستخباراتی بوویە، تشتا کو ئەڤ دەولەتە نکارن ل هیچ یەک ژ پارچەیێن کوردستانێ ئەنجام بدەن ب رێیا پەکەکێ ئەنجام ددەن.
کورت و کورمانج، کەمالیست و بەعسی و بەسیجی یێن ئیرانێ چەند ژ بۆی کوردستانێ ب مەترسی بن، هندەژی ئاپۆچی مەترسینە و پیدڤیە ئێکەتی پێش ژ دەست دانا هەر تشتی، پێش کو خوە ب خوە ژی ژ دەست بدەت ژ خەو رابیت و هشێن خوە بینیتە سەرێ خوە و چ دی رێ ب ڤان کارێن قرێژ یێن پەکەکێ نەدەت، گەر نە دێ هەر تشتی ژ دەست دەت، ژ بۆ ناسکرنا پەکەکێ ژی، ئێکەتی نە پێدڤی زەحمەتیێ یە، ب تەنێ گوهداریا داخویانی و ڤیدیۆیێن بەرێز مام جەلالێ رەحمەتی بکەن دێ باش زانن پەکەک کی یە چ دکەت و دخوزیت چ بکەت.
