مستەفا شەفیق یێ بەرنیاس ب هەڤال “ئاری”، ل سالا 1966ێ ل گوندێ ئیدلبێ ل ناڤچەیا مزوری باڵا ل باشوورێ کوردستانێ ژ داییک بوویە. سالا 1985 – 1986ێ ژ بۆی خواندنا پزیشکی ل زانینگەهێ هاتیە وەرگرتن، لێ نەچوو زانینگەهێ و چوویە ئیرانێ، بۆ دەما 4 سالان ل باژارێ ئۆرمیێ و دەردۆرا وێ ژیان کریە. ئەندامێ یەکیتییا خوەندکاران و قۆتابیان بوویە و پشترا بوویە ئەندامێ پارتییا دەمۆکراتا کوردستانێ.
ل جۆتمەها سالا 1989ێ وەکو یەکەم گرووپێ گەنجێن باشوورێ کوردستانێ ل گەل 13 گەنجێن دی تەڤلی رێزێن پەکەکێ دبن. ئەو سەدەمێن تەڤلیبوونا خوە ژ بۆی ناڤا رێزن پەکەکێ ژ بۆی مژارێن فکری یێن وەکو سۆسیالیزمێ و دەستڤەئانینا عەدالەتا جڤاکی ڤەدگێرینیت، لێ بەلێ، د ناڤا پەکەکێ دا ئەڤ خواستەکێن وی نەهاتینە مسۆگەر کرن و ژ بۆی وی ئاشکەرا بوویە کو ستراتیژی د پەکەکێ دا ئەساسێ فکری و فەلسەفی و ئایدۆلۆژی یێن شەکلینە و ئەو جیهێ کو ئۆجالان تێدا یە، ستراتیژییا پەکەکێ لێ دهێتە دانان.
د ڤێ دەربارێ دا ئەو دبێژیت: ” دەما ئۆجالان هاتیە دەستەسەرکرن، ستراتیژییا پەکەکێ ژی هاتە گوهەرین و ئۆجالان د یەکەم دەرکەفتنا خوە د مەحکەمێ دا ل مەها خزیرانا 1999ێ دا، پشتا خوە ب شێوازێ تەڤگەریان و خوەپارێزی یا مەزلووم دۆغان، کەمال پیر و خەیری دورمووش گەرم نەکر. ڤان سێ ئەندامێن سەرکرداتیا پەکەکێ ل سالا 1982یێ دا ل زیندان و مەحکەمەیا دیاربەکرێ، بەرگریەک دیرۆکی و زانستی نیشان دا، ب ڤێ بەرگریکرنا خوە ستراتیژییا سەرخوەبوونا کوردستانێ خستە ناڤا پرۆگرامێ پەکەکێ دا، ڤێ یەکێ ژی کارتێکرنەکا هەری زێدە ل سەر مە کر.”
“من دخواست ئۆجەلان ژی مینا هەموو گرتیێن دی یێن پەکەکێ بەرگریەک دیرۆکی ل کوردان بکەت، لێ وی بەرگری ل ستراتیژییا کۆمارا دەمۆکراتیک کر کو ڤێ یەکێ پێدڤی ب هندە شەر و شەهیدان نەدکر. ئەز ل بەندێ بووم سەرکرداتیا پەکەکێ ڤێ ستراتەژییێ قەبوول نەکەت، لێ بەلێ ئەو ژی بەرەڤاژی بریارێن کۆنگرەیا 7ێ یا پەکەکێ بوو کو دبێژیت: “ئەم گرێدایی چ بریارەکا عەبدوللا ئۆجالان نابین، عەتا وی دەمی کو د زیندانێ دا بیت و وی پەیوەندیەکا راستەراست ل گەل رێخستنێ دا نینە.” بەرەڤاژی بریارا کۆنگرەیا 7ێ، کۆنسەیا سەرکرداتیا پەکەکێ، ستراتەژییا نوو یا ئۆجالان قەبوول کر. راستی ئەڤەیە، د ناڤا پەکەکێ دا ستراتیژی ئەساسێن فکری و فەلسەفی و ئادیۆلۆژی شەکلن، ئەو جیێ کو ئۆجالان تێدایە، ستراتەژی تێدا دهێتە دانین، بۆ میناک پەکەکێ سێ قۆناغ دەرباس کرینە.”
قۆناغا یەکەمین قۆناغا ئەنقەرێ یە، قۆناغا دویەمین قۆناغا سووریێ یە کو د ڤێ قۆناغێ دا هەموو ستراتیژیێن پەکەکێ ل دەردۆرا تێکلیێن ئۆجالان و سووریێ و شەرێ چەکداری دا بوو و سەرکرداتی ژ ڤێ یەکێ هایدار نەبوو. قۆناغا سێیەمین، قۆناغا ئیمرالیێ یە کو د ڤێ قۆناغێ دا ب هەموو ئاوایەکی دخوازیت خوە ل گەل ترکیێ بگونجینیت و ستراتیژییا کۆمارا دەمۆکراتیک و خوە گونجاندنا ل گەل ترکیێ دانا.”
مستەفا شەفیق ب کۆد ناڤێ “ئاری” کو یێک بوویە ژ ئەندامێن دامەزرینەرێن پارتییا ئازادی یا کوردستانێ “پاک” و ئەندامێ سەرکرداتیا وێ رخستنێ ژی بوویە. وەک ئەو ب خوە دبێژیت، پاش کۆنگرەیا 7ێ ژ بۆی کارێن پەکەکێ هاتیە شاندن ژ بۆ ئەرمەنستانێ و ل قەفقاز ژ پەکەکێ جودا بوویە.
