ل شه‌ڤا ده‌رباسبوویی هێرشا ب مووشه‌كان ل سه‌ر هه‌ولێرێ، پایته‌ختا باشوورێ كوردستانێ پێكهات، هه‌ری كێم 14 مووشه‌ك ب باله‌فرگه‌ها هه‌ولێرێ و ده‌روورا وێ كه‌تن، زیانێن جانی ل په‌ی خوه‌ هشتن، یه‌كێ ئه‌مه‌ریكی جان ژ ده‌ست دا و 6 كه‌سێن دی بریندار كه‌تن.

ل ده‌مه‌كی كو ئه‌ڤ بوویه‌ر د ساعه‌تێن ده‌ستپێكێ یێن شه‌ڤا ده‌رباسبوویی دا‌ ل ته‌ڤاهییا جیهانێ ده‌نگ ڤه‌دا، ده‌وله‌تێن هه‌رێمی، ئه‌ورۆپا و ئه‌مه‌ریكا و نه‌ته‌وه‌یێن یه‌كبوویی هه‌لوه‌ست نیشان دان و ئه‌ڤ هێرش ب ته‌رۆریست ناڤ كرن و شه‌رمه‌زار كرن، لێ رێخستنا په‌كه‌كێ چ گرنگی ب ڤێ هێرشێ نه‌دا و د ساعه‌تا یه‌كێ یا پاش هێرشێ دا، ئاژانسا فه‌رمی یا رێخستنێ ANFێ ته‌نێ نووچه‌یه‌ك كو ژ 3 رێزكان پێكدهات به‌لاڤ كر.

د ڤێ نووچه‌یێ دا‌ رێخستنا په‌كه‌كێ ئه‌ڤ هێرشا كو ل سه‌ر هه‌ولێرێ پێكهات وه‌سا بچووك كرییه‌، هه‌ر وه‌كه‌ بوتله‌كێ غازێ ته‌قیایه‌، وان گۆتییه‌: «ته‌قینه‌ك پێكهات و باژێر ب ته‌قینێ حه‌سییا».

هه‌موه‌خت دبێژیت‌ باژێرێ هه‌ولێرێ یێ باشوورێ كوردستانێ و نه‌گۆت پایته‌ختا باشوورێ كوردستانێ!.

ل ستێرك تیڤی یا كه‌نالا په‌كه‌كێ ژی، وان نووچه‌یه‌ك پارڤه‌كرییه‌ و تێدا گۆتییه‌ هه‌ری كێم 3 ، 4 مووشه‌ك ب هه‌ولێرێ كه‌تنه‌!

گه‌لو بۆچی په‌كه‌كێ گرنگی ب ڤێ هێرشێ نه‌دا؟

هه‌گه‌ر مرۆڤ ئاژانسا ANFێ بشۆپینه‌ كو وه‌شانێ ب 10 زمانێن ناڤچه‌یێ و جیهانێ دكه‌ت، ته‌نێ د به‌شا زمانێ كوردی یێ زارێ سۆرانی دا‌، نووچه‌یه‌ك ل ده‌ربارێ هێرشا سه‌ر هه‌ولێرێ پار ڤه‌كرییه‌ و تێدا‌ ته‌نێ داخویانیێن وه‌زاره‌تا ته‌ندروستیێ باس كرییه‌ و گۆتییه‌ كو كوشتی و بریندار هه‌نه.

د به‌شا كورمانجیێ دا، نووچه‌یه‌ك كو ژ رێزه‌ك و نیڤان پێكهاتییه‌ به‌لاڤ كرییه‌ و تێدا گۆتییه‌: «ته‌قینه‌ك ل هه‌ولێرێ چێبوو و دووكه‌ل ب سه‌ر باژێر دا‌ كه‌ت».

د به‌شا تركیێ دا‌، عه‌ینی نووچه‌یا كورمانجیێ به‌لاڤ كرییه‌.

یا راست ئه‌م نابێژین كو كێفا په‌كه‌كێ ب هێرشا سه‌ر هه‌ولێرێ هاتییه‌، لێ به‌لێ ئه‌و ناخوازه‌ چ گرنگیێ پێ بده‌ن ژ بۆ كو كه‌سێن مه‌دیا وێ د شۆپینن كو پرانی ژێ یێن زمانێ تركی و زارێ كورمانجی نه‌، بزانن كو ئه‌ڤ یێك ژ بۆ رێخستنێ گرنگه‌، ژ خوه‌ هه‌گه‌ر په‌كه‌كێ ئه‌ڤ یێك خوه‌ست با، وێ هه‌ر چ نه‌بایه‌ ئه‌ڤ نووچه‌یا د به‌شا سۆرانیێ دا به‌لاڤ كری دا ب زمانێن تركی و زارێ كۆرمانجی و زمانێن دی یێن ئاژانسا خوه‌ به‌لاڤ كه‌ت.

خالا دوویه‌مین و یا ئه‌ساس كو په‌كه‌كێ ئه‌ڤ هێرشا هه‌ولێرێ ووسا بچووك كری و چ گرنگی پێ نه‌دای ئه‌ڤه‌ داكو شریكێن وان یێن قه‌ده‌رێ «حه‌شدا شه‌عبی» عاجز نه‌بن.

ما ژ خوه‌ كێ هێرشا سه‌ر هه‌ولێرێ كر؟

پاش هێرشا سه‌ر هه‌ولێرێ میلیشیا ب ناڤێ «سه‌رایا ئه‌ولیا ئه‌ل ده‌م» كو گرووپه‌كه‌ ل ڤێ داویێ ده‌ركه‌تییه‌ هۆلێ و گرێدایی «یه‌كینه‌یێن حزبوللا» یا سه‌ر ب حه‌شدا شه‌عبی ڤه‌یه‌، هێرشا سه‌ر هه‌ولێرێ هلدایه‌ سه‌رێ خوه‌.

هه‌ر كه‌س دزانیت رێخستنا په‌كه‌كێ و حه‌شدا شه‌عبی په‌یوه‌ندیێن هه‌ری باش هه‌نه‌، ئه‌و ل ناڤچه‌یێن شه‌نگالێ ب هه‌ڤرا ته‌ڤ دگه‌رن، ئیرانێ په‌كه‌كه‌ وه‌ك‌ به‌شه‌كێ «میحوه‌ر مقاوه‌مه» و پارێزڤانێن ستراتیجییا «هیلالا زێرێن» واته‌ هێلالا شیعی‌ ل هه‌رێمێ حه‌ساب دكه‌ت‌، ل شه‌نگالێ چه‌كدارێن گرێدای په‌كه‌كێ مووچه‌یێن خوه‌ ژ حه‌شدا شه‌عبی دستینن، ئه‌ڤه‌ هه‌موو ئه‌گه‌رن كو په‌كه‌كه‌ ناخوازیت ڤێ هێرشێ هلده‌ته‌ سه‌رێ حه‌شدا شه‌عبی یان ژی هه‌ری كێم گرنگیێ د مه‌دیایا خوه‌ دا پێ بدهت‌، ژ بۆ كو چ زیان ب په‌یوه‌ندیێن وێ و حه‌شدێ نه‌كه‌ڤن.

هه‌گه‌ر په‌كه‌كه‌ شیابا دا بێژیت حكوومه‌تا باشوور و په‌ده‌كێ ئه‌ڤ هێرش‌ كرییه، وان هێرشا خوه‌ كرییه‌‌!!

په‌كه‌كه‌ چ فرسه‌ته‌كێ ژ بۆ بچووك كرن و توهمه‌تبار كرنا حكوومه‌تا باشوورێ كوردستانێ ژ خوه‌ ناكه‌ت‌، د هه‌ر كریزه‌كێ دا‌، ئه‌و مه‌دیایا خوه‌ ب ئاوایه‌كێ قرێژ ل دژی حكوومه‌تا باشوورێ و په‌ده‌كێ سێرڤس دكه‌ت‌، ژ خوه‌ بوویه‌رێن «زینی وه‌رتێ، رێككه‌فتنا شه‌نگالێ، خوه‌پێشاندانێن سلێمانیێ» میناكێن زیندی نه‌ و مه‌ ب چاڤێ خوه‌ دیت ل وان رۆژان په‌كه‌كێ چه‌وا ب ئاوایه‌كێ بێ ئه‌خلاق توهمه‌تێن بێ بنگه‌هـ بۆ حكوومه‌تا باشوور چێدكرن، یا راست هه‌گه‌ر د مژارا هێرشا شه‌ڤا ده‌رباسبوویی ژی دا په‌كه‌كێ شیابا دا بێژیت حكوومه‌تا باشوور و په‌ده‌كێ ئه‌ڤ هێرشه‌ كرییه‌، وان هێرشا خوه‌ كرییه‌!! لێ به‌لێ ژ به‌ر كو ئه‌و نه‌شیایینه‌ ڤێ هێرشێ بكه‌نه‌ جینایه‌ته‌ك و كراسه‌ك ل به‌ر حكوومه‌تا باشوور، وان چ گرنگی پێ نه‌دا.

ل ڤێرێ پێویسته‌ مرۆڤ ڤێ پرسێ ژ رێخستنا په‌كه‌كێ بكه‌ت، باشه‌ «ملیشیا ئه‌ولیا ئه‌ل ده‌م» یا گرێدای حه‌شدا شه‌عبی ب ده‌ڤێ خوه‌ گو مه‌ ئه‌ڤ هێرش كر، بۆچی هه‌وه‌ ئه‌ڤ هێرش نه‌هلدا سه‌رێ وان؟ یا راست به‌رسڤ ئه‌ڤه‌ كو په‌كه‌كه‌ ناخوازیت‌ شریك و هه‌ڤچه‌په‌رێن وان یێن حه‌شدا شه‌عبی عاجز ببن!.

هێژای گۆتنێ یه‌ دوھی د ساعه‌تێن شه‌ڤێ دا، ھەری کێم 14 مووشەک ل نێزیكی بالافرگەھا ناڤنەتەوەییا ھەولێرێ و چەندێن دی ل تاخێن دەردۆرێ کەتن، د ئەنجامێ دا، یەکێ ئه‌مەریکی ژیانا خوە ژ دەست دا و 6 کەسێن دی بریندار بوون، ئه‌مەریکا ژی سۆزا جەزاکرنا سووچداران دا.

کۆما گرێدایی ئیرانێ یا ب ناڤێ «سەرایا ئەولیا ئەل دەم» ئەڤ هێرش گرت سەر خوە، ئه‌ڤ كۆما چه‌كدار ل ڤێ داویێ ده‌ركه‌تییه‌ هۆلێ، ئه‌و گرێدای حزبوللا یا سه‌ر ب حه‌شدا شه‌عبی ڤه‌ یه‌، وان گەلەک هێرش ل دژی ھێزێن ناڤدەولەتی و شاندێن نه‌ته‌وه‌یێن یه‌كبوویی کرینە، ئه‌مەریکا حزبوللا خستییه‌ د لیستەیا خوە یا تەرۆرێ دا.

ئۆتۆمبێلا کو مووشەک ژێ ھاتبوون ئاڤێتن ژ ئالیێ ئاژانسا دژه‌ ته‌رۆرا باشوورێ کوردستانێ ھات دیتن، ئه‌مەریکا هه‌لوه‌ستا خوە ل سەر زمانێ وەزیرێ خوە یێ دەرڤە ئانتۆنی بلنکەن به‌لاڤ کر و هێرش شەرمەزار کر، بلنکەن تەكەز کر، سووچدار دێ هێنه‌ جه‌زا كرن.

ئیراقێ ژی هه‌لوه‌ست نیشان دا و سەرۆکێ وێ بەرھەم سالح هێرش وەکە کارەکی تەرۆریست و نەوێرەک ب ناڤ کر، ھەروه‌ھا سەرۆکوەزیرێ ئیراقێ مستەفا کازمی ژی بانگا ئاڤاکرنا کۆمیتەیەکا ھەڤبەش کر.

ئیرۆ ژی نه‌ته‌وه‌یێن یه‌كبوویی و ناڤه‌ندێن ناڤده‌وله‌تی و وه‌لاتێن ئه‌ورۆپایێ ئه‌ڤ هێرش شه‌رمه‌زار كر و ب پێشهاته‌كا خه‌ته‌ر ناڤ كرن.