ڤەقەتیان ژ پەکەکێ خیانەت یان نشتیمانپەروەری؟
یەک دن ژ وان کەسێن کو ژ پەکەکێ ڤەقەتیای «زوبەیر عیسا» یە، ئەو ل سالا 1969ێ ل گوندێ ئێدلبێ ل دەڤەرا مزۆری بالا ل باشوورێ کوردستانێ هاتییە دنیایێ، وەکە ئەو ب خوە دبێژیت ئەو هێژان گه‌نج بوویە وه‌ختا كو ل پەی باشترین چارەسەر ژ بۆی پرسگرێکێن کوردی د گه‌ریایی، ژ بۆی ڤێ یەکێ پاش ئەنفالێن سالا 1988ێ ل باشوورێ کوردستانێ، ل دووڤ رێیەکێ گەریایە کو بزاڤا کوردان ل باشوورێ کوردستانێ بەردەوام بیت، ئەو دبێژیت: «ل وی دەمی پەکەکێ ب سلۆگانا سۆسیالیزم و دادپەروەرییا جڤاکی و سلۆگانا ئازادی و سەرخوەبوون ژ بۆی هەموو کوردستانێ» ل سەر سنۆرێن باشوور و باکورێ کوردستانێ بوو، ئەڤ سلۆگانە ژ بۆی مە هەژمارەک گه‌نجان کو ل ئیرانێ پەنابەر بووین، ب تەمامی یێن تازە بوون و بلەز باندۆرا خوە ل مە کر.
ل وێ دەمێ گه‌نجێن کورد بەرێ خوە ددان ئەورۆپایێ و مە ژی نەخواست مەیدانێ چوول بکه‌ین، مە وه‌سا فێم کر پەکەکە ژ بۆی چارەسەرکرنا پرسگرێکێن کوردستانێ هێزه‌كا سه‌ره‌كه یه، ژ بەر ڤێ یەکێ ئەم 14 گه‌نجێن ئالیگرێ پارتییا دەمۆکرات کو ل ئیرانێ ئاوارە بووین، ل رۆژا 20/10/1989ێ چووین جەم پەکەکێ داکو پەروەردێ ببینین و ڤەگەرین باشوورێ کوردستانێ و شەرێ چه‌کداری بەردەوام بکه‌ین.
ناڤێ وان 13 کەسان کو ئەز د گه‌ل وان چوویم ئەڤه‌نه:
مستەفا شەفیق “ئاری”.
عەزیز وەیسی.
عەلی تەتەر.
ئەسعەد عیسا.
میکائیل مەجید.
حسێن یاسین.
سەعید ئیبراهیم.
هادی عەلی.
قادر مووسا.
شەوکەت رەمەزان.
مەدەنی عەبدوللا.
سەباح مەلحەم.
نەوزاد گەلیار.
مە هزر نەدکر رۆژەک دێ هێت و پەکەکە دێ ژ بۆ باشوورێ کوردستانێ و پارچەیێن دن بیته ئاستەنگ و پرسگرێک
ئەم تەڤ پێشمەرگە و ئەندامێن پارتیبا دەمۆکراتا کوردستانێ بووین، بەرا تەڤلیبوونا مە د ناڤا رەفێن پەکەکێ دا مە وه‌سا فکر نەدکر کو رۆژەک دێ هێت و پەکەکە دێ ژ بۆ باشوورێ کوردستانێ و پارچەیێن دن یێن کوردستانێ بیته ئاستەنگ و پرسگرێک.
بەرا کو هزر د چوونا جەم پەکەکێ دا بکه‌م، ل سالا 1984ێ من پرس ژ “مەعسووم كۆركوماز” ئەندامێ سەرکرداتییا پەکەکێ کربوو، کو گەر هوون بوون حزبەکا مەزن، دێ وه‌ك پارتیێن دن یێن مەزن شەرێ براکوژیێ بکه‌ن؟ گۆ نا چ جاران تشتەک وه‌سا ناقەومیت، ژ بەر کو مە بریار دایە شەرێ براکوژی د ناڤا کوردان دا ب داوی بینین.
دگۆت: گەر پارتیێن کوردستانێ گەریلایێن مە بکوژن ژی، ئەم بەرێ چەکێن خوە ناده‌ینه وان، ئەم هاتینە پرسگرێکا کوردان چارەسەر بکه‌ین.
لێ بەلێ هەموو ئاخفتنێن وی سەر و بن دەرچوون، نە ب تەنێ پرسگرێک جارەسەر نەکرن، بەلکو بوونه پرسگرێک ژ بۆی سێ پارچەیێن دن یێن کوردستانێ ژی، ل وێ دەمێ عەگید و ئەندامێن پەکەکێ پر به‌حسا پێکئانینا بەرەیەکێ کوردستانی و سوپایەک نەتەوه‌یی دکر کو هەر پارتییەک نوونەراتییا پارچەیا خوە تێدا بكه‌ت، بۆ میناک جەمیل باییک و ئەندامێن دن یێن سەرکرداتییا پەکەکێ دچوون ناڤا خەلکێ دا و وه‌سا ددا خوەیاکرن کو ئەو نوونەرێن پرۆلیتارا خزمەتکارێن خەلکێ نە، ڤان کاران مەژیکێ گه‌نجێن کورد ژ بۆ ئالیێ پەکەکێ رادکێشا و حەماسەتا نشتیمانپەروەریێ د ناڤا وان دە بهێز دکر، ب ڤان پرۆپاگاندایان ئەم چووین ژ بۆ کو جەم وان پەروەردێ ببینن و سوودێ ژ ئەزموونا وان وەرگرین و ڤەگەرین باشوورێ کوردستانێ، لێ هەر ئەول راستی پرسگرێکان هاتین.
ل دەستپێکا چوونا مە، ل بن ناڤێ چالاکییا سەربازی دا ل گوندێ «ساتێ» ل ناڤچەیا گەڤەرێ 24 کەس کوشتبوون و 700 بزنێن خەلکی ئینابوون، ژ وان 24 کەسان، 6 ژن و 8 زارۆک و 8 شڤان بوون و دو کەسێن دن ژی خەلکەک دی بوون، ئالییەکێ گوندێ ساتێ چەکێ رژێمێ ڤێ بوو و ئالییەک دن بێ چەک بوون، ئەڤ کارەسات ب سەرێ ئالیێ بێ چەک ئینابوو.
دەما کو مە ئەڤ کارەسات دیتی، ب تەمامی ئەم تەڤلیهەڤ بووین، د وی دەمی دا هۆگر ئەم دەستەسەر کرین و گۆت هوون سیخۆرێن پەدەکێ نە و حوکمێ بدارڤەکرنا مە دا.
6 مەهان ل بن کۆنەیەکێ دا ئەم زیندان کرین، هەتا کو عەبدوللا ئۆجالان ژ هۆگر عاجز بووی، ئەو رەڤییا، ل دەستپکێ چوو ئالیێ رژێما ئیراقێ و ل داویێ ل ئەورۆپایێ ئەو کوشت و ئەم ژ زیندانێ دەرێخستن و ب فەرمانا ئۆجالان چووین دۆلا بیقاعێ.
پشتی گرتنا ئۆجەلان د ناڤا پەکەکێ دە لەرزینەک بهێز چێبوو و د ناڤا پەکەکێ دا ب سەدان دەرەز چێبوون، ل دەستپێکێ ئۆسمان ئۆجالان و پشترە موراد قارایلان جهێ وی گرت، لێ بەلێ د پراكتیک دا جەمیل باییک پەکەکە دمەشاند نها ژی ئەو ب خوە کەسی یەکێ یە.
هەموو کوشتن و تەسفییه ب فەرمانا باییک هاتینە ئەنجام دان
بایک د ناڤا پەکەکێ دا رێخستنێن تایبەت هەنە، هەموو کوشتن و تەسفییه ب فەرمانا باییک هاتینە ئەنجام دان، ژ بۆ ڤێ یەکێ سووچا خائین بوون، سیخۆر بوونێ ددا پال وان و ئەو دکوشتن. یا سەیر ئەڤەیه پشتی چەندین سالان وەکە شەهیدێن پەکەکێ دهاتن ناساندن و دگۆتن ئەڤه شەهیدێن پەکەکێ نە.
د ڤێ دەربارێ دە نموونه پرن، «ناسر» ئەندامێ سەرکرداتییا په‌كه‌كێ کو ل سالێن 91-93یان دربێن هەری بهێز ل رژێما ترکیێ خستبوون، پەکەکێ ب خوە کوشت و پشترە ب شەهید دا ناساندن، یان ژی «هارۆنێ سەرمەزن» «کورێ عەبدورەحمان دورە» یەک ژ وان کەسانە کو پەکەکێ کوشتی و پشترە ب شەهید دایه ناساندن، ل سەر ڤان کارێن پەکەکێ پێویسته لێکۆلینێن دەقیقتر ل سەر بهێنه كرن.
