جودابوون ژ پەکەکێ خیانەت یان ولاتپارێزی؟

جودابوون ژ پەکەکێ خیانەت یان ولاتپارێزی؟

جیهانگیر حازر یێ ب کۆد ناڤێ “ساری باران” یەک دی ژ وان کەسانە کو ژ پەکەکێ قوت بوویی، ئەو ل سالا 1956ێ ل دێرسمێ ژ داییک بوویە. بۆ دەما 7 سالان ل باژارێن سامسۆن و دێرسمێ مامۆستەیێ بیرکاریێ بوویە. سالا 1975-1978ێ ئەندامێ پارتیا دەمۆکراتا کوردستانێ-باکور بوویە، لێ وەکو ئەو ب خوە دبێژیت ب سەدەما هەبوونا کێشەیێن ناڤخوە د ڤێ پارتیێ دا، پارتیا دەمۆکراتا کوردستانێ ب جی هێلایە و تەڤلی گرۆپا ئایدۆلۆجی یا ئۆجەلان بوویە و یەک بوویە ژ بەشداربوویێن کۆنگرەیا دامەزراندنا پارتیا کارکەرێن کوردستانێ ل رۆژا 27/11/1978ێ دا.

حەتا سالا 1980یێ ئەندامێ لیژنەیا خارپۆت یا پەکەکێ بوو و سالا 1981ێ چوویە لبنانێ و ل کەمپا بەرەیا دەمۆکراتیکا فەلەستینێ ل بێتکایا سووریێ پەروەردەیا لەشکری دیتییە و دیرۆکا سیاسی یا جیهانێ خواندییە. سالا 1982ێ نێزیکی 6 مەهان پاش کۆنفەرانسا یەکەما پەکەکێ هاتیە شاندن ژ بۆی باشوورێ کوردستانێ. سالا 1986ێ بێکو بەشداری کۆنگرەیا سێیەمین ببیت، وەکو ئەندامێ کۆمیتەیا ناڤەندی یا پەکەکێ هاتیە هلبژارتن.

ب سیستەما سەرۆکاتیێ هەر تشت کەتە دەستێ ئۆجەلان دا و ل ڤێرە دەست ب کوشتن و تەسفیەکرنا کادر و گەریلایێن پەکەکێ و خەلکێ سڤیل هاتە کرن.

ئەو دبێژیت: “د ڤێ کۆنگرەیێ دا 4 بریارێن هەری خەتەر هاتنە پەسەندکرن کو پێک تێن ژ: یاسایا لەشکر کرنا ب زۆری. دڤێت هەموو کەسەک ژ داهاتێ خوە بەشەکی بدەتە پەکەکێ. “رێژەیا ڤی پارە دێ ل گۆر داهاتێ وی کەسی هێتە دیارکرن”. د پەکەکێ دا دێ ئیستخباراتا حیزبی هێتە ئاڤاکرن. ب ڤان بریارا پەکەکە وەکو دیانەتەکێ لێهات و هیچ کەسەک نەدکاری ل دژی سەرۆکاتیێ بئاخڤیت و هزرێن خوە بەیان بکەت. ب سیستەما سەرۆکاتیێ هەر تشت کەتە دەستێ ئۆجەلان دا و ل ڤێرە دەست ب کوشتن و تەسفیەکرنا کادر و گەریلایێن پەکەکێ و خەلکێ سڤیل هاتە کرن.”

“مە گۆت هەموو کەسێن کو چەک هەلگرتی ژ بەر سیاسەتا شاشا پەکەکێ چوونە پال دەولەتێ”

ساری باران یەک بوو ژ بەشداربوویێن کۆنگرەیا دویەمین و چوارەمین یێن پەکەکێ کو ل حەفتەنینێ هاتبوون لدارخستن د ڤێ دەربارێ دە ئەو دبێژە: ” محەمەد شەنەر، شیار و من بەشداری کۆنفەرانسا دویێ نەکر. د ڤێ کۆنفەرانسێ دا گەلەک نیقاش هاتنە کرن. مژارا لەشکەرکرنا ب زۆری مە قەبوول نەکر و مە گۆت بوونە گەریلا ب زۆری نابیت. ئیستخباراتا سەر ب ئاپۆ مە هەلوەشاند و مە گۆت ئیستیخبارات ژ بۆی دوژمنا دبیت، نە ژ بۆی کادر و ئەندامێن پارتیێ. سیاسەتا دژی جاشێن کوردستانێ مە گوهەراند و مە گۆت هەموو کەسێن کو چەک هەلگرتی ژ بەر سیاسەتا شاشا پەکەکێ چوونە پال دەولەتێ، گەر نە عيشیرەتێن گەردی، هەرکی، عەشۆر، ژیرکی، مام خۆرا….هود جەحش نەبوون. پێش جێبەجێکرنا سیاسەتا شاشا پەکەکێ و کوشتنا خەلکێ بێ دادگەهکرن و لێکۆلینێ، ئەڤ هەموو د گەل مەدا بوون و هاریکارییا مە دکرن.

“مە خواست ب هارکاریا هندەک رێخستنێن چەپ یێن ترکیێ، کو نێزیکی پەکەکێ بوون، شەری ژ کوردستانێ ڤەگوهێزین ناڤا باژێرێن مەزن یێن وەکو ئەزمیر، ستەنبۆل و ئەنقەرەیێ داکو ترک ژی تام کەنە شەری”

د کۆنفەرانسا دویەمین دا بریار ل سەر ڤان هەموو مژاران هاتە دایین، مە بریار دا داخوازا خەلکێ ژ بۆی هەڤکاریێ، یەکیتیا نەتەوی پێک بینین. مە خواست ب هارکاریا هندەک رێخستنێن چەپ یێن ترکیێ، کو نێزیکی پەکەکێ بوون، شەری ژ کوردستانێ ڤەگوهێزین ناڤا باژێرێن مەزن یێن وەکو ئەزمیر، ستەنبۆل و ئەنقەرەیێ داکو ترک ژی تام کەنە شەری. هەر وەها د کۆنگرەیا 4ێ دا مە داخوازا لێکۆلینێ ل سەر کەسێن هاتیە کوشتن، چالاکیێن پەکەکێ ل ولاتێ سووریێ و جێبەجێکرنا بریارێن کۆنفەرانسا دویەمین کر کو ب تەڤاهیا دەنگا هاتە قەبوول کرن. د ڤێ کۆنگرەیێ دا ئەز و محەمەد شەنەر وەکو ئەندامێن کۆمیتەیا ناڤەندی هاتینە هەلبژارتن. هەڤدەم د گەل ئەندامبوونا من د کۆمیتەیا ناڤەندی دا، ئەز بەرپرسێ لەشکری یێ پەکەکێ بووم و شەنەر بەرپرسێ سیاسی بوو. پاش کۆنگرەیێ، هەر یەک ژ مە ڤەگەریا جهێ خوە یێ کار کرنێ. بریارێن کۆنگرەیێ ژ بۆی ئاپۆ هاتبوون شاندن کو وان پەسەند بکەت، لێ وی قەبوول نەکرن و راگەهاند ڤان کەسا پارتی کریە د دەستێن خوە دا. دەربارا من و شەنەر دا بریار هاتە دایین لێکۆلینێ ل سەر مە بکەن. ئەز بانگ کرم و چووم حەفتەنینێ، ل وێرێ من زانی شەنەر هاتیە گرتن.

“ئۆجەلان گۆتیە دڤێت د دەما 15 رۆژان دا لێکۆلین ل سەر هەوە بهێتە کرن و شەنەر بهێتە کوشتن”

ئۆجەلان هێزەکا نوو د پەکەکێ دا ئاڤا کربوو کو ناڤێ وێ هێزا پاراستنا حیزبێ بوو. عەبدولرەحمان قایچقچی “فایەق” بەرپرسێ ڤێ هێزێ ل سووریێ هاتبوو لێکۆلینێ ل سەر من و شەنەر بکەت. عەبدولرەحمان چەند جاران د گەل مە دا جڤییا و گۆتە مە: “ئۆجەلان گۆتیە دڤێت د دەما 15 رۆژان دا لێکۆلین ل سەر هەوە بهێتە کرن و شەنەر بهێتە کوشتن”. فایەق کو کەسەکی وەلاتپارێز بوو، ئەڤ نهێنیە ژ بۆی مە ئاشکەرا کر و د ئەنجام دا فایەق و ئەز و شەنەر ل سالا 1991ێ ژ پەکەکێ جودا بووین. دەمەکێ ل باشوورێ کوردستانێ ماین و رێخستنەک ب ناڤێ “ڤەژین” مە ئاڤاکر و هەژمارەکا زێدە یا خەلکی ل دۆرا مە کۆم بوون. شەنەر چوو قامشلۆیێ کو پەیوەندیێ ب ساکینا جانسز و سەلیم چرۆک کایا بکەت. ئەڤ دو کادرە پێش نها د گەل شەنەر د زندانێن ترکیێ دا بوون و ئەو ژی ل دژی سیاسەتا ئۆجەلان بوون، لێ پەکەکێ و دەولەتا سووریێ ب هاتنا شەنەر ژ بۆی قامشلۆیێ زانی و ل وێرێ ئەو کوشت.”