ب دەھان سالانە کو ئۆپەراسیۆنێن دەولەتا ترک د سنۆرێن حکوومەتا فەدەرالا کوردستانێ و رۆژئاڤایێ کوردستانێ دا بەردەوامن. د ڤان رۆژێن داوی دا ژی ئۆپەراسیۆنەکا گەلەک خورت یا بەژایی و ھاوایی د سنۆرێ حکوومەتا فەدەرالا کوردستانێ دا دەستپێکریە و بەردەوامە.

لەوما ژی د دەربارێ سەدەمێن ئۆپەراسیۆنێن دەولەتا ترک دا و رێیا پێشیا ڤان ئۆپەراسیۆنان دێ چەوا هێتە گرتن، نیقاش دهێنە کرن.

د مژارێ دا نێرینێن من ژی ھەنە.

ب تایبەتی ژی ھەڤالبەندێن پەکەکێ یێن ڤەکری و ب دزی، رۆلا پەکەکێ د ئۆپەراسیۆنێن دەولەتا ترک دا ڤەدشێرن.

بەشەک کوردپەروەر ژی، ژ بەر کەربێن خوە یێن حەق ل دژی دەولەتا ترکیا داگیرکەر راستیێ نکارن تەسبیت بکەن. پەکەکە ژی ژ ڤێ یەکێ مفا وەردگریت.

ژ بۆ چارەسەریا پرسگرێکێ ژی پێشنیار ناهێنە پێشکێش کرن.

من د ڤێ مژارێ دا گەلەک نڤیس ب کوردی و ترکی نڤیساند. ئەز د ڤێ نڤیسا خوە دا دیسا  دخوازم د دەربارێ ڤێ مژارێ دا تەسبیت و پێشنیارێن خوە پێشکێش بکەم. ئەز نێرین و تەسبیت و پێشنیارێن خوە د سەر بەلاڤۆکا 5 حیزبێن-رێخستنێن کوردستانێ دا دخوازم پێشکێش بکەم.

5 حیزبێن-رێخستنێن کوردستانێ دەربارێ ئۆپەراسیۆنێن دەولەتا ترک ل باشوور و رۆژئاڤایێ کوردستانێ دا بەلاڤۆکەک بەلاڤ کرن.

بەلاڤۆکا 5 حیزبێن کوردستانێ…

5 حیزب و رێخستنێن کوردستانێ د بەلاڤۆکێ دا دبێژن:

“ئەم ژ ئێریش و داگیرکەرییا دەولەتا ترک را دبێژن نە

ئەڤە چەند سالە کو دەولەتا ترکیا ل سێ پارچەیێن کوردستانێ شەرەکێ توند و داگیرکەرانە دمەشینیت. د سەری دا پیدڤی گۆتنێ یە کو ئەڤە شەرەکێ نە رەوایە و داگیرکەری تاوانەکا ل دژ مرۆڤاھیێ یە. د ھەمان دەمی دا ئەڤ شەرە نە یاسایی و نە ژی قانوونی یە. ئەڤ شەرە ژ بۆ تێکبرنا دەستکەفتییێن سییاسی یێن کوردانە و ژ بۆ رێگریکرنا ل تێکۆشینا ئازادی، رزگاری و سەرخوەبوونا کوردستانێ یە.

ل رۆژھلاتا نێزیک و ناڤین بوویەر و پێشھاتەیێن سیاسی یێن کو باندۆرا وانا ب ھێز ل سەر تەڤگەرا رزگارییا کوردستانێ ھەیە، ب لەز و بەز دقەومن. ئێریشێن دەولەتێن داگیرکەر و نەیارێن ئازادییا کوردستانێ رۆژ ب رۆژ بەرفرەھتر دبن.

دەولەتێن داگیکەرێن کوردستانێ نە تەنێ د بەشەکێ کوردستانێ دا، بەلکو ل سەرانسەرێ کوردستانێ دژمنێ تەڤگەرا رزگاریخواز، ئازادی و دەستکەتییێن گەلێ کوردن. ژ بۆ پێشیلێگرتنا تەڤگەرا ئازادیخوازیا نەتەوەیی کورد و نەھیشتنا دەستکەتییێن نەتەوەیی ب ھەموو ھێزێن خوە ڤە ھەول ددەن، ھەڤکارییا ھەڤدو دکەن و د ناڤبەر خوە دا رێکەفتنا ئیمزا دکەن.

دەولەتا ترک، کو ل سەر ئینکارکرنا نەتەوا کورد و گەلێن دی ئاڤا بوویە، ژ دامەزراندنا خوە و حەتا ئیرۆ کارێن جینۆسایدی پێک تینیت و سیاسەتا بشاڤتنێ ل سەر گەلێ کورد دمەشینیت. ژ بۆنا ڤێ ئارمانجێ ژی نە تەنێ ل باکورێ کوردستانێ، ھەر وسا ل سەرانسەرێ کوردستانێ ژی سییاسەتا داگیرکەرییێ ب رێ ڤە دبەت. دەولەتا ترک ئێریشێن ھۆڤانە دبەتە سەر باشوورێ کوردستانێ و ب ڤی ئاوایی ژی یاسایێن ناڤنەتەوەیی بنپێ دکەت. و ئەڤ ئێریشێن ب ڤی ئاوایی پێتری 30 سالانە بەردەوامن.

دەولەتا ترک ھەردەم ھەبوونا بنگەھێن پەکەکێ ل باشورێ کوردستانێ ژ بۆ ئێریشێن خوە وەک سەدەم نشان دایە و ددەت. لێ راستی نە وەسایە. راستی ئەڤەیە، کو ل باکورێ کوردستانێ شەرەکێ کو پەکەک ەل دژی دەولەتا ترکیایێ دکەت نەمایە، لێ دەولەتا ترک بنگەھێن پەکەکێ وەک بەهانە ب کار تینیت و ئارمانجا وێ یا سەرەکی داگیرکرنا باشورێ کوردستانێ، بنپێکرنا سەروەرییا حکومەتا کوردستانێ، تێکبرنا فەدەراسیۆنێ و پێشیلێگرتنا دەولەتبوونا نەتەوا کوردە ل باشورێ کوردستانێ. ژ بۆ گھیشتنا ڤان ئارمانجێن خوەیێن کرێت، ل باشوورێ کوردستانێ بنگەھێن لەشکەری یێة ماییندە ئاڤا دکەت. ھەژمارا بنگەھێن لەشکەری یێن دەولەتا ترک ل ڤی بەشێ کوردستانێ رۆژ ب رۆژ زێدەتر دبن. ئاشکەرایە کو پەکەکە ژی ب ھەولدان، سیاسەت و چالاکییێن خوەیێن ل باشوورێ کوردستانێ رێ ژ ڤێ سیاسەتا دەولەتا ترکیا ئێریشکەر و داگیرکەر خوەشتر دکەت.

دەولەتا ترک نە تەنێ ل باشورێ کوردستانێ، ھەر وسا ل رۆژئاڤایێ کوردستانێ ژی سیاسەتا داگیرکەرییێ ب رێ ڤە دبەت. ھەر رۆژ ب باھانەیا یەپەگێ-پەیەدێ ئێریش دکەتە سەر ناڤچەیێن کوردستانێ، کو ئەو ب دەستێ گەلێ ناڤچەیێ تێنە برێڤابرن. ب هاریکاریا نۆکەرێن خوەیێن ئیسلامی یێن توندرەو دەمۆگرافیایا رۆژئاڤایێ کوردستانێ دگوهریت. ئارمانجا دەولەتا ترکیا یا سەرەکی تێکبرنا دەستکەتیێن کوردانە، پێشیلێگرتنا ئاڤاکرنا کۆریدۆرا کوردی یا باشوور و رۆژئاڤایێ کوردستانێ یە.

داگیرکەر نە تەنێ دەولەتا ترکە. دەولەتا سوریەیێ ژی یەک ژ داگیرکەرێن کوردستانێ یە و ئەو ژی وەک داگیرکەرێن دی دژمنێ ئازادیا کوردستانێ یە، نەیارێ دەستکەتییێن نەتەوا کوردە. ئەڤ یەک سەدەمێ بنگەھین یێ شەر و پەڤچوونێن داوی یێن ل باژێرێ قامشلۆ، کو د ناڤ ھەسەدێ، ئارتێش و گرووپێن چەکدارێن گرێدایی ب دەولەتا سورییێ ڤە روودایە. ناڤچەیێن کو دەولەتا سوریێ تێدا نینە، دکەڤنە بەر ئێرشێن دەولەتا ترک، ناڤچەیێن کو نە د دەستێ ترکیایێ دا نە دکەڤنە بەر ئێرشێن دەولەتا سوریایێ. ھەر دو دەولەت ژی، ل بەر چاڤێ ئامەریکا و رووسیایێ و ژ بێدەنگییا رایا گشتی ئیستیفادە دکەن و جەسارەتێ وەردگرن ژ بۆ ئێریشبرنا سەر ملەتێ کورد.

ل گۆر بیر و باوەرییا مە، کورد دکارن رێگریێ ل ئێریشێن دەولەتێن داگیرکەر بکەن.

ژ بۆ ڤێ ئارمانجێ، وەک پارتی و رێخستنێن کوردستانی ( ناڤێن مە ل ژێرن):

ئەم داخواز ژ ھێزێن کورد یێن ل رۆژئاڤایێ کوردستانێ دکەین، کو ل دژی داگیرکەرییێ، ژ بۆ پێشیلێگرتنا گوهارتنا دەمۆگرافییا رۆژئاڤایێ کوردستانێ و ب دەستخستنا مافێن نەتەوەیی پێکڤە تێبکۆشین، ل سەر پێڤاژۆیا پێکئانینا یێکەتییا ل سەر بنگەھێ رێکەفتنا دھۆکێ پێگر بن و مزگینییا پێکھاتنا یێکەتیێ بدەنە گەلێ کورد.

ئەم داخواز ژ حکومەتا ھەرێما کوردستان و ھێزێن وەلاتپارێزێن باشورێ کوردستانێ دکەین، کو بلندتر دەنگێ خوە ل ھەمبەر ئێریش، سیاسەتا گەفخوارن و داگیرکرنا دەولەتا ترک و ئیرانێ بلند بکەن، تفاق و یەکرێزییا ناڤ مالا خوە ژی خورتتر بکەن. پێکڤە ھەول بدەن، کو رایا گشتی یا جیھانێ، ب تایبەت دەولەتێن ئامەریکا، روسیا و ئەورۆپایێ دەنگێ خوە ل ھەمبەر ئێریشێن دەولەتێن داگیرکەرێن ل سەر کوردستانێ، بلند بکەن و رێگریێ ل ڤان ئێریشان بکەن.

ئەم بانگ ل پەکەکێ دکەین کو رێزێ ل سەروەرییا پارلەمەن، سەرۆکاتی یا حکوومەتێ و ل ھێزێن پێشمەرگەیێن ل ھەرێما کوردستانێ بگرن، بەهانەیا نەدەن دەستێ دەولەتا ترک کو ئێریشی باشوورێ کوردستانێ بکەن و ل پەی خوە دەولەتا ترکیایێ کاش نەکەنە باشوورێ وەلاتێ مە.

ئەم داخواز ژ ھەموو ھێزێن وەلاتپارێزیێن کوردستانێ دکەین کو ل سەر بنگەھا نشتیمانپەروەرییێ، ھەڤکارییا ماییندە پێک بینن، دا کو ئەم ب ھێزتر بکارین رێگریێ ل سییاسەتا دەولەتا ترکا داگیرکەر و ل ئێریشێن وێ یێن ھۆڤانە بکەین.

3.5.2021

پاک، پەدەکە-باکور، پێلکورد، پەسەکە، تەڤگەر”

ھیچ شک تێدا نینە کو دەولەتا ترک داگیرکەر و کۆلۆنیالیستە…

نێرینێن 5 حیزب-رێخستنان یێن د دەربارێ دەولەتێن کۆلۆنیالیست دا، نێرینێن گشتی نە.

ھەر کوردەک پەسەند دکەت. ھیچ شک تێدا نینە کو دەولەتا ترک: داگیرکەرە. کۆلۆنیالیستە. نەژادپەرەستە. دژمنێ نەتەوەیا کوردە. لێ ئەو بوویەرا ئەم نیقاش دکەین چارەسەر ناکەت. لەورا دەولەتا ترک ھەر وەخت و د شەرتی دا نکاریت بەشێن دی یێن کوردستانێ داگر بکەت.

لەورا بەرژەوەندیا دەولەتێن دی یێن کۆلۆنیالیست ژی رێکێ نادەت. ھەموو دەولەتێن کۆلۆنیالیست دکارن د مژار و بەرژەوەندیا گشتی دا ل ھەمبەر نەتەوەیا کورد و تەڤگەرێن کوردی و”خستنێن کوردی ببنە یەک، رێکەفتنێ پێک بینن. لێ ھەر دەولەتەک ژی خوەدیێ سەروەریەکێ و دەستھلاداریەکێ یە. هیچ یەک ژ وان رێکێ نادەت کو ب ھێسانی سەرووەری و دەستھلاتداریا وان بنپێ بکەت.

دڤێت پەکەکە باش بهێتە ناس کرن…

لێ د تەسبیت و شرۆڤەیێن وان یێن د دەربارێ پەکەکێ دا، مژارا رۆژانە و ستراتەژیک دا، خوەدیێ پرسگرێکێن مەزنن.

د شرۆڤەیا وان دا دەردکەڤیت ھۆلێ کو پەکەکە رێخستنەکا کورد و کوردستانێ یە. لەورا ژی ئۆپەراسیۆنا ل دژی پەکەکێ، دبیتە ئۆپەراسیۆنا ل دژی نەتەوەیا کورد.

ئەڤ تەسبیتە شاشیەکا مەزنە. ئەڤ تەسبیتە میسیۆنا پەکەکێ ویا دوھی و ئیرۆ ڤەدشێریت.

پەکەکە، پرۆژە و رێخستنا دەولەتا ترکیا یە. ئارمانجا وێ یا ستراتەژیک ئەوە کو ل سەر ناڤێ دەولەتا ترک تەڤگەرا نەتەوەیی یا کوردستانێ، رێخستنێن کوردستانێ ژ ناڤ ببەت.

لێ پەکەکە، پشتی دەمەکێ ب ئاوایەکی ژ کۆنترۆلا دەولەتا ترک دەرکەت. کەت بن کۆنترۆلا دەولەتا سووریایێ، ئیراقێ، ئیرانێ.

دەولەتا ترک پشتی دەمەکێ مەجبوور بوو کو پەکەکێ ڤەگەرینتە سەر ئەرکێ وێ یا بەرێ.

بەشەکێ پەکەکێ، ئۆجالان ئەڤ سیاسەتا دەولەتا ترک دپەژرینیت، لێ بەشەکێ وان (قەندیل) سیاسەتا دەولەتێن کۆلۆنیالیستیێن دی، ئەمەریکایێ، دەم-دەم سیاسەتا رووسیایێ دمەشینیت.

پەکەکە ل سەر ناڤێ دەولەتێن کۆلۆنیالیست ل ھەر چار بەشێن کوردستانێ داگیرکەرە.

دەولەتا ترک ل ھەمبەری ئاپاراتا خوە پەکەکێ شەرەکێ دمەشینیت.

دڤێت ئەرکێ پەکەکێ ل باشوورێ کوردستانێ باش بهێتە ناس کرن…

ل باشوورێ کوردستانێ ئەرکێ پەکەکێ یا دەولەتا فەدەرالا کوردستانێ یا خرابکرنێ ژی نەھاتیە فام کرن. نەھاتیە تەسبیت کرن کو پەکەکە ژ بۆنا کو دەولەتا فیدرال یا کوردستانێ خراب بکەت، دبیتە سەدەم کو دەولەتا ترک ئۆپەراسیۆنان بکەت.

ھەگەر پەکەکە نەبیت، د ڤان شەرتان دا دەولەتا ترک نکاریت ل باشوورێ کوردستانێ ئۆپەراسیۆنان بکەت. لەورا نە ل بەرژەوەندیا وانە. ئۆپەراسیۆنێن دمەشینیت گەلەک ب زەحمەتە و د چیایێن کوردستانێ یێن ئاسێ دا نە. ھەگەر ئارمانجا دەولەتا ترکیا رۆژانە، داگیرکرنا باشوورێ کوردستانێ بیت، دێ ل جیهێن ھێسان و نە چیایی ئۆپەراسیۆنا ئەنجام دەت و داگیرکەریا خوە ب جیهـ کەت.

د بەلاڤۆکێ دا دەربارێ داگیرکەری و تەرۆرا پەکەکێ ل باشوورێ کوردستانێ تشتەک نەھاتیە گۆتن.

باش دهێتە زانین و دهێتە نڤیساندن کو پەکەکێ گوندێن کوردستانێ داگیر کرینە. پەکەکێ گوندێن کوردستانێ داگیر کرینە. ژ گوندیان ب زۆری خەراج و باجێ وەردگریت. ناهێلیت کو گوندی چاندنێ بکەن. زارۆکێن کورد درەڤینیت تێخیتە بن چەکان، ددە کووشتن. شەنگال و گەلەک دەڤەرێن دی یێن کوردستانێ داگیر کرینە. چالاکیێن تەرۆریستی پێک تینیت. ئێریشی ھێزێن پێشمەرگەیان دکەت.

دوهی دیسا ب چەکێن گران ئێریشی ھێزا پێشمەرگەیان کر.

فەرماندارێ فەرمانداریا ھەلگورد بەھرام عریف یاسین، ژ K24ێ را راگھاند، چەکدارێن پەکەکێ ب چەکێ RPG، BKC و چەکێ سڤک ئێریش سەر خالەکا پێشمەرگە ل دەڤەرا برادۆست کر.

دیار کر ژی، ھێزا پێشمەرگەیا ل وێ خالێ بەرسڤا ئێریشا چەکدارێن پەکەکێ دان و چ زیانێن جانی د ناڤا ھێزا پێشمەرگە دا نەبوون.

بەھرام عریف یاسین گۆت ژی: ” پەکەکە دخوازیت ل ھەرێما کوردستانێ تەڤلھەڤیێ دروست بکەت. دڤێت پەکەکە رێزێ ل رەوش و یاسایێن ھەرێما کوردستانێ را بگریت”

دڤێت ئەرکێ پەکەکێ ل رۆژئاڤایێ کوردستانێ باش بهێتە ناس کرن…

د بەلاڤۆکێ دا ل رۆژئاڤایێ کوردستانێ دەستھلاتداری و دیکتاتۆریا رەژیما بەعسی و پەکەکە/پەیەدەیا ھەڤبەش، وەک دەستھلاتداریا نەتەوەیا کورد دهێتە پەژراندن، ئەڤە شاشە.

دهێتە زانین کو رەژیما بەعس ل ھەمبەری کوردان و ئۆپۆزسیۆنا کوردان رەحەت تەڤگەریا و دەستھلتاریا خوە ل رۆژئاڤایێ کوردستانێ د گەل پەکەکێ/پەیەدێ دا پارڤە کر.

قامشلی %60-65 کرنە عەرەب. سووریا د سیاسەتا خوە یا کەمەرا عەرەبان دا ب سەرنەکەت. د شەرتێن نوو دا ب دەستێ پەکەکێ/پەیەدێ ب ھێسانی سەرکەفتی بوو.

ل قامشلوویێ، دەولەتا سووریایێ نھا دخوازیت ئەماناتا خوە، ژ وەکیل و مقاولێ خوە پەکەکە/پەیەدێ بستینیت.

کورد د دەستپێکێ دا ژی و نھا ژی زرارا مەزن دبینن، دپەرچقن، تێنە کووشتن.

دەولەتا ترک ژی د سایا پەکەکێ/پەیەدێ دا ل رۆژئاڤایێ کوردستانێ گەلەک ھەرێم و باژێر داگیر کرن. دەولەتا ترک، ل سەر ناڤێ سووریایێ، ئاخا کوردان یا د بن داگیرکەریا سووریایێ دا بوو، دابوو پەکەکێ/پەیەدێ، ب دەستێ دەولەتا ترک ژ پەکەکێ/پەیەدێ ھاتە گرتن. ھەگەر ئەم ل راستیێ بنێرن داگیرکەری نەھات گوھەرتن، خوەدیێ وێ ھاتنە گوھەرتن.

دڤێت چ بهێتە کرن؟

د ئەنجامێ دا ئەز گەلەک ڤەکری دیار دکەم کو ھەگەر پەکەکێ ل دەولەتا فەدەرالا کوردستانێ رەوشا خوەیا نەیاسایی و تەرۆریستی نەدۆمینیت؛ دەولەتا ترکا نەشێت ئۆپەراسیۆنان پێک بینیت.

لەورا ژی دڤێت حکوومەتا دەولەتا فەدەرال یا ئیراقێ و حکوومەتا فەدەرال یا کوردستانێ ڤێ پرسگرێکا پەکەکێ چارەسەر بکەن. ئەڤە ژی ب دەرخستنا پەکەکێ یا کوردستانێ دبیت.

ھەموو ھێز و پارتیێن کوردستانێ، ھەموو ھەموەلاتیێن کوردستانێ، ھەموو خێرخوازێن کوردستانێ ژی دڤێت پشتەڤانێن ڤێ داخوازێ و  حکوومەتا کوردستانێ بن.

دڤێت کو ئەم راستیێ تەعل و سار ژ گەلێ خوە را ببێژین.

دیاربەکر، 7. 5. 2021