د دەما ئاخاتیێ دا ھەر ئاوایەکی ب سەرێ خوە ئاغایێ گوندێ خوە بوو کو وی ئان وان تو کەسێن دی د سەرخوە دا نەددیت.
ئەڤە حەتا سالا 1965ێ بەردەوام بوو. ژ بەر کو د وێ سالێ دا پەدەکە-ت ھاتە دامەزراندن. ب دامەزراندنا خوە وێ خواست پیچەکێ رەنگ و دەنگێن ئاغاتیێ کێم بکەت.
ب کێمکرنا وی دەنگی دێ دەنگێ وەلاتپارێزان ثێتر دیار بیت. ل گۆر من کارەکی باش ژی کرن. کارێن خوە ب دزی ڤە ئەنجام ددان، لێ ب ئەساسی ب رێڤە دبرن.
پشتی دامەزراندنا خوە ژی ل گۆر قاوەت و ھێزا خوە هاریکاریا برایێن خوەیێن ل باشوورێ کوردستانێ کو شەرێ ئازادی و سەرخوەبوونا کوردستانێ ئەنجام ددا، دکر.
پشتی دامەزراننا پەدەکە-ت ل باکورێ کوردستانێ روحیەتا وەلاتپارێزی، بەرخوەدانا ژ نوو دا ژ بۆنا ئازادی و سەرخوەبوونێ رۆژ ب رۆژ، گاڤ ب گاڤ پێشڤە دچوو.
پشتی جیھان بوو دو قوتب، ئاھا چ بوو ژ وێ و پێدا مال ل کوردێن باکورێ کوردستانێ ژی خەراب بوو. قوتبێ سۆسیالیست و قوتبێ کاپیتالیست وەکو دو بوویەرێن گرنگ کەتنە ناڤا وەلاتپارێزێن کوردان یێن کو ل د باژێرێن مەزن یێن ترکان دا، د قۆتابخانێن مەزن ئانکو زانکۆیان دا دخواندن.
ب سایا برایێن مەیێن ل باژێرێن مەزن یێن ترکان دخواندن و پرانیا وان ژی د دەستپێکێ دا دووڤ قوتبێ چەپ ئانکو سۆسیالیستن ترکان. ھەر ب ھاتنا وان بۆ کوردستانێ وان ژی ئەو فکر د ناڤ گەنجێن کوردێن ل کوردستانێ دخواندن بەلاڤ دکرن.
ڤێ بەلاڤکرنێ وەکر کو ژ پەدەکە-ت چەند رێخستن دەرکەتن. ئەو ب خوە ژی پیچەکێ کێمھێز بوو. ئێدی سەرێ گەنجێن مە، جوانێن مە ب ئایدۆلۆژییا سۆسیالیزمێ شوشتن دا کو کورد ب تەنێ رێیا خوە، ئازادی و سەرخوەبوونا خوە د وێ دا ببینن.
ب سەختەکاریا چەپ ئانکو سۆسیالیستن ترکان، دیرۆکا کوردان ژ وان ھاتە ڤەشارتن کورد ب ئاوایەکی گەلەمپەری کرنە دوژمنێن ئەمەریکا و ئیسرایلێ دا کو رۆژەکێ ئەو وەلات هاریکاریا کوردان نەکەن، د دەستپێکێ دا وەھا ژی بوو.
داگیرکەرێن مە ب ھێز و قاوەتن، خوەدی چەک و ئیمکانێن مەزن و گرانن، لەورا ژی ژ بۆنا کورد دیراکا خوە ناسنەکەن، هندەک جاران ب رێیا ئۆلی و هندەک جاران ژی ب رێیا ئایدۆلۆژیا سۆسیالیزمێ کورد ژ دیرۆکا وان دوور کرن.
رەوشەنبیر و رێبەرێن وەلاتەکێ دەما دیرۆکا خوە نەزانین و ناس نەکربیت ئەو وەلات زوو ب زوو نکاریت ئازادی و سەرخوەبوونا خوە ژی ببینیت.
ئاھا نھا ئەڤە گەلەک ب زەلالی دهێتە دیتن کو ئەو پەکەکە یا ژ لایێ داگیرکەران و ل سەر ناڤێ کوردان ھاتیە دامەزراندن، ل دژی ھەمی ھێژایی و بەرژەوەندیا کوردانە. ژ بۆنا کورد تشتەکی ب دەست نەخن و سەرێ خەلکی تەڤلی ھەڤ بکەن، ب سروودا یەکیتیا گەلان و براتیا وان کورد ژ کوردبوونێ دوور خستنە و دوور تێخن.
ئەڤ رێخستنا ب دەستێ داگیرکەران ب ئاوایەکی ئایدۆلۆژیک ھاتیە دامەزراندن، ناھێلیت و ژ دەستێ وان بهێت، نەھێلیت کو کورد ببیتە خوەدیێ ئەردێ خوە و ناسنەمایە خوە.
ناھێلن و ژ دەستێ وان بهێت دێ بنە ئاستەنگ دا کو کورد ل باشوورێ کوردستانێ سەرخوەبوونا خوە رانەگھینن. کارێ وان یێ سەرەکی ل دژی بەرژەوەندیا گەلێ کوردە.
نھا ب ھەر ئاوایی دهێتە دیتن و زانین کو ل باشوورێ کوردستانێ سەرخوەبوون ل بەر دەری یە. لێ داکو ئەو دەری ڤەبیت دڤێت کوردستان ئارام بیت، خوەدی دەستھلاتا خوە بیت، خوەدی جێش و ھێزا خوە بیت و دڤێت بکاریت سنۆرێن خوە ژی بپارێزیت.
ژ بۆ کو ئەڤە چەندە پێک نەهێت پەکەکە یا کو داگیرکەرێن ترک ئەو دامەزراندیە چ ژ دەستێ وان دهێت دکەن و دێ کەن ژی ھەتا کو ل گۆر داخوازا داگیرکەران سەرکەڤیت.
باکورێ کوردستانێ بێ دەنگە، ژ بەر کو پەکەکێ ھەموو خەساندنە و بێ دەنگ کرنە کو پارتی و کەس نکارن و نەوێرن دەنگێ خوە دەرخن.
ھەگەر دەرخست ژی ژ لایەکێ دا پەکەکە ژ ئالیێ دی ژی دا دەولەت ب ھەڤرا کار دکەن دا کو وان بێدەنگ بێھێلن. نھا رەوش ئەڤەیە، لەورا باکورێ کوردستانێ نکارن و نەوێرن ل ھەمبەر کریار و بوویەرێن پەکەکێ یێن د بەرژەوەندیا داگیرکەران دا نە، دەنگێن خوە دەرخن.
ئەڤە دێ چاوا هێتە چارەسەرکرن؟
ل گۆر من چارەسەرکرنا وێ د سەرخوەبوونا کوردستانێ دایە. لۆما دڤێت ھەمی کورد نھا گرانیێ بدەنە باشوورێ کوردستانێ ب هاریکاریا وان ڤە رابن، دا کو وێرێ سەربخوە ببیت.
چارەسەری و دەرمان نھا ب تەنێ ئەڤەیە. ل گۆر من حەتا ئەڤە نەبیت دێ پەکەکە ھەر خەرابیان بکەن دا کو ورێ نەگەهیتە سەرخوەبوونا خوە. ژ بەر کو سەرخوەبوونا باشوورێ کوردستانێ دبیتە قاوەت و رۆناھی ژ بۆ پارچێن دی ژی…
