شەرێ مە یێ مەزن، شەرێ ل دژی پێشمەرگەیە!

پەکەکە دخوازیت ب هاریکاریا حەشدا شەعبی وان ناڤچەیێن کوردستانی کو ب ناڤچەیێن ماددەیا 140 تێنە ناسکرن ژ پێشمەرگە ڤالا بکەت.

سەعید حەسەن، یەک ژ فەرماندارێن هێزێن پەکەکێ ل شنگالێ کو نها ل بەغدایە، د هەڤدیتنەکی دا د گەل یەک ژ کەنالێن تەلەفزیۆنی یێن نێزیکی نووری مالکی دا دبێژیت: “ئەم دێ د گەل حەشدا شەعبی دا، ب تایبەت “عەسائیبی ئەهلی حەق” ئامادەکاریان دکەین ژ بۆی کو ڤان ناڤچەیان “ناڤچەیێن ماددەیا 140 کو ب ناڤچەیێن کوردستانی یێن دەرڤەی سنۆرێ هەرێما کوردستانێ دهێنە ناسین” ژ داعش و پێشمەرگەیان پاقژ بکەین.

ناڤبووری بەردەوام دکەت و دبێژیت: “شەرێ مە یێ مەزن دێ شەرێ ل دژی پێشمەرگەیان بیت، ژبەرکو ئەو ئامادە نابن ژ ڤان ناڤچەیان ڤەکێشن و دخوازن وان ناڤچەیان داگیر بکەن و بێخنە سەر هەرێما کوردستانێ ڤە”.

ئەڤ داخویانیا فەرماندارێ پەکەکێ یێ ل شنگالێ تشتەکێ نوو نینە، فەرماندارێن پەکەکێ گەلەک جاران ئەڤ ئاخافتنە ل جیهێن جودا دوبارە کرنە و خوە ژ ڤان ئاخافتنان نادەنە پاش.

گەلۆ سەعید حەسەن کیە؟!

سەعید حەسەن سەعید خزر، کەسەک ئێزدییە و ژ هۆزا هەبابایە، ئەو خەلکێ گوندێ زومانێ یێ سەر ب شنگالێ یە، نها وەکو بەرپرسێ گشتی یێ یەبەشێ ئەرکدارە، ئەو ب مەزنترین بەرپرسێ ئێزدی یێ د ناڤ پەکەکێ دا ل شنگالێ دهێتە ناسین کو خەلکێ ئیراقێ بیت.

سەعید حەسەن، پاش رۆخاندنا رەژێما بەعس ل 9/4/2003ێ تەڤلی رێزێن پەکەکێ بوویە و وەکە کەسەک سیاسی د ناڤا پەکەکێ دا کار کریە. کەچا وی ل سالا 2017ێ ب بۆردۆمانا بالافرێن جەنگی یێن ترکیا ل قەندیلێ هاتیە کوشتن.

ئەو بابێ 5 زارۆکانە، د ناڤا پەکەکێ دا ب کۆد ناڤێ “باهۆز” دهێتە ناسکرن و بەرپرسێ ئیستیخباراتا پەکەکێ یە ل شنگالێ.

ب یەک ژ وان کەسان دهێتە ناسکرن کو داخویانیێن هەری توند و نەرەوا ل دژی پەدەکێ و هەرێما کوردستانێ ددەت و هەردەم هەول ددەت د ناڤبەرا ئێزدیان و حکوومەتا هەرێما کوردستانێ دا جوداهیان دروست بکەت و ئێزدیان ل دژی کوردستانێ تەحریک بکەت.

ژ لایێ ماددی ڤە ب کەسەک دەولەمەند دهێتە ناسکرن، دەولەمەندیا وی ژ نزیکاتیا وی ژ پەکەکێ و کارێن بازرگانی یێن نەیاسایی کو ل ژێر سیبەرا پەکەکێ و ب پشتەڤانیا رێڤەبەرێن پەکەکێ ئەنجام ددەت، دهێت.

ئەڤە جارا یەکەمین نینە کو سەعید داخویانیەکا ب ڤی ئاوا ددەت، پێش نها ژی چەند جاران ل سەر ئەکرانێن تیڤیان دا دەرکەتیە و ب توندی ل دژی حکوومەتا هەرێما کوردستانێ و کوردان داخویانی دانە، ئەو دبێژیت کو ئێزدی نە کوردن و کوردستانێ ژی ناخوازن.