رێخستنا په‌كه‌كێ دوو كه‌چێن ئێزدی ل باشوورێ كوردستانێ ره‌ڤاندن و ب دارێ زۆرێ ئه‌و برن چیایێ قه‌ندیلێ.
چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره كر، چه‌كدارێن په‌كه‌كێ ل رۆژێن رابووری دوو كه‌چێن ئێزدی ژ كۆمه‌لگه‌ها «تل قه‌سه‌ب» و گوندێ «كۆجۆ» ره‌ڤاندنه و ئه‌و ب دارێ زۆرێ برنه چیایێ قه‌ندیلێ.
ده‌ست نیشان كر، یێك ژ وان كه‌چان ب ناڤێ «فیرده‌وس فارس مووسا» ژ ئاكنجیێن كۆمه‌لگه‌ها «تل قه‌سه‌بێ» یه و كه‌چا دن ژی ب ناڤێ «شیلان خدر خه‌له‌ف» نێ ناس كرن و ئه‌و ژ گوندێ «كۆجۆ» یه، چه‌كدارێن په‌كه‌كێ ل رۆژا 24 مه‌ها گولانا ئیسال 2021ێ ئه‌و ره‌ڤاندنه و ل هه‌مان رۆژێ ڤه‌گوها‌ستنه قه‌ندیلێ.
فیرده‌وس ته‌مه‌ن 21 ساله و هه‌روه‌ها شیلان ژی ته‌مه‌ن 17 ساله.
رێخستنا په‌كه‌كێ ژ بۆی چێكرنا شه‌رڤانان، پشت به‌ستنێ ل سه‌ر ره‌ڤاندنا، كه‌چ، زارۆك و جوانێن كورد ژ هه‌ر چار په‌رچه‌یێن كوردستانێ دكه‌ت، ئه‌ڤ یێك ژی ژ ئالیێ رێخستنێن مافێن مرۆڤان و رێخستنێن مافێن زارۆكان و سازیێن ناڤده‌وله‌تی ڤه هاتییه ته‌سبیت كرن.
ژ ده‌ما ئێریشا ته‌رۆرا داعشێ ل سه‌ر شه‌نگالێ، رێخستنا په‌كه‌كێ ب سه‌دان كه‌چ و جوانێن ئێزدی ره‌ڤاندنه و هه‌یا رۆژا مه یا ئیرۆ چاره‌نڤیسا وان نه‌دیاره، ل سالا رابووری هه‌ژماره‌كا دایك و باڤێن كو په‌كه‌كێ زارۆكێن وان ره‌ڤاندنه، ل شه‌نگالێ بانگ ل گه‌لێ ئێزدی كرن كو رێ نه‌دن ئێدی په‌كه‌كه زارۆكێن وان ب خاپینیت و ب زۆر كێشی چیا بكه‌ت، ره‌ڤاندنا زارۆكان ژی ب ده‌واما فه‌رمانا داعشێ ب ناڤ كرن.
