ئیبراھیم گوچلو

 پەکەکێ، د ڤان رۆژێن داوییێ دا، ل هەرێما فەدەرال یا کوردستانێ دیسا دەست ب ئێریشان کر.  د دو رۆژێن جودا دا 6 پێشمەرگە شەهیدکرن و 7 پێشمەرگە بریندار کرن، 2 پێشمەرگە ژی رەڤاندن. جیێ وان دیارە. لێ پێشمەرگە نایێن بەردان. بەرپرسیارێن پەکەکێ، گۆتیە مالباتا پێشمەرگەیان کو “ئەم دێ لێپرسین و مەحکەمێ ب وان کەین، پشت را گەهینە ئەنجامەکێ.” واتە گەلەک ئاشکەرایە کو پەکەکێ وەک ھەر دەمێ کوردستانیان درەڤینیت، زیندانی دکەت، ئێشکەنجە دکەت و دکوژیت. گوندیان درەڤینیت و زارۆکێن گوندیان درەڤینیت و دکەتە چەکدار، یان ب دەستێ دەولەتێ ئەو تێنە کووشتن، یان ژی پەکەکە وان سێدارە ددەت و دکوژیت.

پەکەکێ گوند و باژار داگیرکرینە. ناھێلیت کو گوندی چاندنیێ بکەن. ژ گوندیان باجێ وەردگریت. دەما خواست گوندیان ژ گوندی دەردێخیت. د ناڤ گوندیان دا پلانێن خوەیێن قرێژ دمەشینیت. ژ بۆ کو گوندییان ل ھەمبەری هەرێما فەدەرالا کوردستانێ بکەتە دژمن، پەروەردەیێ ددەتە وان، ب زۆرێ و ب ترسێ و ب تەرۆرێ گوندیان دکەتە دژمنێ هەرێما فەدەرالا کوردستانێ.

پەکەکێ دەستھلاتداری و سیستەم و یاا و سەروەرییا کوردستانێ ناس ناکەت. پارتیێن سیاسی و دەستھلاتدارێن رەوا قەبوول ناکەت. ل گەلەک جیهان ژی سەروەری و دەستھلاتدارییا خوە ئاڤا کریە. تشتەکێ گەلەک خەریبە کو د کووشتنا 5 پێشمەرگەیان دا دیار کر کو “مافێ پێشمەرگەیان نینە بێنە ھەرێما ئەو لێ دەستھلاتدار و سەروەر، وان ئەڤە قەبوول نەکر، لەوما ژی پەکەکێ ئەو پێشمەرگە شەهیدکرن”.

دەما کو رەوشا پەکەکێ ل باشوورێ کوردستانێ بهێتە شرۆڤە کرن، گەلەک ئاشکەرا دهێتە دیتن کو تەھدید و ئیستیفزازێن پەکەکێ ل دژی هەرێما فەدەرالا کوردستانێ ھەیە. پەکەکە گەهشتیە وێ مەرحەلەیێ کو ئێدی دبێژیتە گەلێ کورد کو ل ھەمبەری دەستھلاتداری و حکوومەتا فەدەرالا هەرێما کوردستانێ سەرھلدانێ بکەن.

سییاسەتا دەستھلاتداری و حکوومەتا کوردستانێ دەربارێ پەکەکێ دا شاشە دڤێت بهێتە گوهرین… 

ئەڤ ستاتویا پەکەکێ ل باشوورێ کوردستانێ د چەند سالێن داوی دا چێنەبوو. وەک دهێتە زانین ئێریشکەرییا پەکەکێ پشتی شەرێ 1ەمین یێ کەنداڤێ (کۆرفەزێ) دەست پێ کر. پەکەکێ ب ھەولدان و ب پشتگرییا چار دەولەتێن کۆلۆنیالیست (دەولەتا ترک، ئیران، ئیراق و سووریێ) ل ھەمبەری ھەرێما ئازاد یا کوردستانێ شەر کر. پەکەکێ چەند جاران ل ھەمبەری پەدەکێ، ل ھەمبەری یەنەکێ، ل ھەمبەری ھەردویان شەر ئەنجام دا. ب ھەزاران پێشمەرگە و ھەموەلاتییێن کوردستانێ ھاتنە شەهیدکرن.

پەکەکێ ژ سالا 1991ێ هێر ڤە دەست پێ کر، ل ھەرێما ئازاد یا کوردستانێ بجیهـ ببیت. پشتی دەمەکێ ژی گوند و ھەرێمێن کو د بن کۆنترۆل و دەستھلاتداریا رەژیما بەعسا-سەددام دا بوون، دەولەتا ئیراقێ دانە پەکەکێ.

خەتەرییا پەکەکێ، د ناڤ 30 سالان دا مەزن بوو و ھاتە قۆناغا گرنگ.

ھیچ شک تێدا نینە کو د ئاڤابوونا مەترسی و تەھلیکەیا پەکەکێ دا سییاسەتا دەستھلاتداری و حکوومەت و حیزبێن سییاسی یێن کوردستانێ ئەساس و بنگەھە.

دەستھلاتداری و حکوومەتا کوردستانێ، د قۆناغا دەولەتا فەدەرالا ئیراقێ و دەولەتا فەدەرالا کوردستانێ دا ژی سییاسەت و ستراتەژییەکا شاش مەشاند. وان پەکەکە وەک رێخستنەکا کوردستانی پەژراندن و کاراکتەرا پەکەکێ یا تەرۆریستی و داگیرکەری و بیانی و بازرگانی نەدیتن و قەبوول نەکرن.

دەستھلاتداری و حکوومەتا کوردستانێ، ل ھەمبەری پەکەکێ وەک دەولەتەکێ تەڤنەگەریا. ھەموەلاتییێن خوە و ھێژایی و بەرژەوەندیێن نەتەوەیا کورد ل ھەمبەری پەکەکێ نەپاراستن. پەکەکە ھەر دەم پششێ پشێ کرن. ل ھەمبەری خرابی و ئێریشێن پەکەکێ، سییاسەتا شەرمەزارکرنێ مەشاندن. ئەڤ سییاسەتە، گەلەک یا ئاشکەرا بوو کو سییاسەتەکا شاش و بێی بەرپرساتی و نەدەولەتی و زیان گەهاندن ب وەلات و ھەموەلاتییانە.

دڤێت دەستھلاتداری و حکوومەتا کوردستانێ، ب رامانا ستراتەژیک سییاسەتا خوەیا دەربارێ پەکەکێ دا بگوھریت. وەک دەولەتەکێ وەلات و ھەموەلاتییێن خوە بپارێزیت..

 دەستھلاتدارییەک و حکوومەتەک، وەلاتێ خوە، ھەموەلاتییێن خوە، سەروەرییا خوە، سیستەما خوەیا جڤاکی و سییاسی، دڤێت ب ھەر ئاوایی بپارێزیت. ئەو کەس و ھێز و دەولەتێن زیانێ دگەهیننە وەلات و ھەموەلاتییێن وان، ژناڤ ببەت، یان ژی بگرن دادگەهـ بکەن و سزا بدەن.

حکوومەت، دەزگەھێن ئەولەکارییێن هەرێما فەدەرالا کوردستانێ، د ڤان رۆژێن داویێ دا، دەما کو پێشمەرگە ژ لایێ پەکەکێ ڤە ھاتینە شێھید کرن، سییاسەتا شەرمازارکرنێ مەشاندن. بەرێ ژی دەما پەکەکێ، پێشمەرگە شەهید کری، ھەموەلاتی و زارۆکێن گوندییان رەڤاندین، ھەمان سییاسەت ھات مەشاندن. هێژتا ژی دمەشینن. ئەڤ سییاسەتە ژی باوەرییا خەلکی دشکێنیت. خەلکێ بێباوەر دکەت.

دەولەتبوون و دەستھلاداری و سەروەرییێ دینیتە ھۆلا مناقەشەیێ.

ئەڤ ھەلوەستا دەستھلاتداری و حکوومەتا کوردستانێ ژ ھشمەندی و سییاسەت و ستراتەژییا وان یا شاش دهێت. حەتا ئیرۆ ژی بەردەوامە. ڤێ سییاسەتێ، مەترسی و تەھلووکەیا پەکەکێ مەزنتر کر. دڤێت کو ئەو ھشمەندی و سییاسەت و ستراتەژییا حکوومەتا کوردستانێ بهێتە گوھارتن.

دڤێت حکوومەتا کوردستانێ، پەکەکێ ب لەزووبەز وەک رێخستنەکا نەکورد، دژمنا کورد ، تەرۆریست، داگیرکەر، بیانی و نە یاسایی راگەهینیت. وەک دەولەت ژی چ پێویست بیت وێ ئەنجام بدەت…

ژ بەرکو سییاسەتا راست ژ بۆنا بەرژەوەندییا وەلات و ھەموەلاتییێن کوردستانێ بهێتە مەشاندن:

1-دڤێت پەکەکێ وەک رێخستنەکا نە کورد و کوردستانی راگەهینیت.

2-دڤێت پەکەکێ، وەکو دژمنا کوردان و هەرێما فەدەرالا کوردستانێ راگەهینن. لەورا پەکەکە دخوازیت کو هەرێما فەدەرالا کوردستانێ تێک ببەت. پەکەکە ژ بۆ کو ڤێ پلانا خوەیا قرێژ جێبەجێ بکەت، ل گەل دەولەتێن کۆلۆنیالیست دا ھەڤکاری و بازرگانیێ دکە.

3-دڤێت پەکەکە، وەک رێخستنەکا نە یاسایی بهێتە راگهاندن. ژبەرکو رێخستنەکا نە ژ ئیراقا فەدەرال و هەرێما فەدەرالا کوردستانێ یە.  ژ دەرڤەیی یاسایێن وان، ب دەستێن دەولەتێن کۆلۆنیالیست ھاتیە ئاڤاکرن.

4-دڤێت پەکەکە وەک رێخستنەکا تەرۆریستی بهێتە راگهاندن.

5-دڤێت پەکەکە وەک رێخستنەکا داگیرکەر بهێتە راگهاندن.

 6-دڤێت پەکەکە وەک رێخستەنەکا بیانی بهێتە راگهاندن.

7-دڤێت باش بهێتە زانین کو ل ھۆلێ شەرەکێ براکوژی نینە.

وی دەمی ھەلوەست ل ھەمبەری پەکەکێ زەلالتر دبیت. یاسایێن ناڤنەتەوەیی، یاسایا دەولەتا فەدەرالا ئیراقێ، یاسایا هەرێما فەدەرالا کوردستانێ دێ ل ھەمبەری پەکەکێ جێبەجێ بیت.

وی دەمی پەکەکە دێ ناچار بیت، یان ژی هێتە ناچار کرن کو ژ کوردستانێ دەرکەڤیت. دێ دەست ژ خرابیێن خوە و خرابکرنا هەرێما فەدەرالا کوردستانێ بەردەت. نەشێت ھەموەلاتییێن کوردستانێ و پێشمەرگە و ئەندامێن سازیێن ئەولەهیێ بکوژیت. دەما دەرنەکەت بەرپرسیار و ئەندامێن پەکەکێ بهێنە گرتن و بهێنە دادگەهکرن و سزادان. تێنە بێی چەک کرن.

دیاربەکر، 11.6.2021