ژ رۆژا کو پەکەکێ شەرێ چەکداری دەستپێ کری و حەتا نھا چ ژ کوردان ستەند و چ ب کوردان دا قەزانج کرن؟
ئەز دێ ھێلا پەکەکێ، یا کو چ زەرار دایە دۆزا کورد و کوردستانێ دەرخم گوفتووگۆیێ:
-د شەرێ چەکداری یێ کو پەکەکێ د 37 سالان دا مەشاندی دا، نێزیکی 150 ھزار کورد ھاتنە کوشتن!
-پەکەکێ، ئەنەرژییەکا مەزنا کوردان یا 37 سالان ل دۆرا خوە کۆم کر و ئەڤ ئەنەرژی، د وارەکێ دژمنانە دا بکار ئانی. زانایێن کوردان، سییاسەتمەدار و سەرۆک عەشیرێن کوردان، مالدارێن کوردان، خویندەوار و رەوشەنبیرێن کوردان، گوندییێن کوردان کرنە ئارمانجا خوە و تەرۆریزە کر. یێن کو د ناڤ رێزێن پەکەکێ دا جیھ نەگرتی و بەشداری کاروانێ وان نەبووی، کرنە ئارمانجا خوە. ل وان دا، گەف ل وان کرن و کوشتن!
-د ڤی شەری دا 4 ھەزار و 500 گوند ھاتنە ڤالاکرن و شەوتاندن.
-12 ملییۆن کوردان کوردستان ب جیهـ هێلا و ل باژارێن مەزن یێن ترکان تووشی ئاسیمیلاسیۆنێ، ئێریشێن نیژادپەرەستی و کارەستێن خەراب بوونە. بەشەک ژ ڤان ژی ل جیھانێ بوونە پەنابەر.
-پەکەکێ، دییاسپۆرا کورد گەلەک ب خەرابی بکار ئانی و نەهێلا، کو دییاسپۆرایەکا رێک و پێک ژ بۆ کوردان دروست ببیت و کورد ل دییاسپۆرا ببنە خوەدی دەزگەھ.
-د پێڤاژۆکا ڤی شەری دا 17 ھەزار کورد، ب دەستێ ھێزێن رەش ھاتنە کوشتن. پرانییێن کووژەرێن ڤان بوویەران، پەکەکەلییێن کو رادەستی دەولەتا ترک ببوون و کار ژ بۆ دەولەتا ترکان دکر.
-پەکەکێ، د 2ێ مەھا 11. 2015 دا ب مەبەستا “خوەسەرییا دەمۆکراتیک”، “شەرێ خەندەکان” دەست پێ کر و د “شەرێ خەندەک”ان دا؛ ل شرنەخ، سوور، نسێبین، جزیر، گەڤەر، فارقین، لجەیێ؛ ب مەبەستا “خوەسەرییا دەمۆکراتیک”، مالێن کوردان ب سەرسەرێ وان دا هەلوەشاندن. نێزیکی 6 ھەزار جوانێن کورد د ڤان خەندەکان دا ھاتنە کوشتن. ب رۆژان جەسەدێن کوردان د ناڤا کۆلاناندا بێ خوەدی مان. دەرفەتەک مەزن دا دەولەتا ترک، کو ھەموو شارەدارییێن د دەستێ وان دا، رادەستی دەولەتا ترک ببن.
-پەکەکێ، ل باشوورێ رۆئاڤایێ کوردستانێ، ئیرادەیا کوردێن باشوورێ رۆئاڤایێ کوردستانێ ژ دەستێ وان دەرخست. یێن کو ئەڤ زلما پەکەکێ قەبوول نەکری، ھاتنە کوشتن، ھاتنە رەڤاندن، ھاتنە زیندان کرن و وەلاتێ باب و کالێن خوە ب جیهـ هێلا.
-بەرپرسێن پارتییێن کوردان، ژ باشوورێ رۆئاڤایێ کوردستانێ دەرخستن و ئۆفیسێن پارتییێن وان ھاتنە شەوتاندن. ل ڤی بەشێ کوردستانێ ب دەستێ پەکەکێ، ئالا کوردستانێ، کو ب خوینا جانگۆرییێن کوردستانێ ھاتبوو خەملاندن، بنپێ بوو. ھەر کەس ل ڤی بەشێ کوردستانێ ب “بژی سەرۆک ئاپۆ” روونشت و رابوو. ب ھەلوەستەکا یەکالی و دیکتاتۆری جڤات ھاتە دیزاین کرن.
-پەکەکێ، ھەر رۆژ، ب خوەپێشاندانان، ئالایێن پەکەکێ و پانکارتان. وێنەیێن ئۆجالان ل سنۆرێ ترکیا بلند کرن و ترکیا ڤەخواندە باشوورێ رۆئاڤایێ کوردستانێ.
هندە کۆرەفامی نابیت و ئەم نکارین راستییێ سەر و بن بکەین. ئەم، وەک کوردپەروەران، حەژێکەرێن وەلاتی، ئەگەر ل دژی کوردکوژییا کو ل ھەنبەر کوردان تێتە کرن، ھەلوەستێ دیار نەکەین و راستییێ نەبینن، ئەم ویژدانا خوە ژ دەست ددەین. کی کوردان دکوژیت و ددەتە کوشتن، دڤێت ئەم کوردکوژان ل بەر دەرییێ وان شەرمەزار بکەین.
ھەلبەت دەما کو بەشەک ژ رێڤەبەرێن کوردێن رۆئاڤایێ کوردستانێ، ب دەستێ پەکەکێ مالوێرانییا کو ل باشوورێ رۆئاڤایێ کوردستانێ ھاتیە سەرێ وان نەبینیت، مەبەست نە پەژراندنا کوردکوژییا پەکەکێ بیت؛ وی دەمی چما شیرەتان ل رێڤەبەرێن حکوومەتا ھەرێما کوردستانێ بکەت؟
گەلۆ غەریب حسۆ دکاریت بێژیت؛ “مە ل باشوورێ رۆژئاڤایێ کوردستانێ کورد کوشتن، گرتن، خستنە بن چاڤدیریێ و زیندان کر! مە بەشەک ژ کوردێن رۆئاڤایێ کوردستانێ کنەر دژمنێن باشوورێ کوردستانێ و پەکەکێ ئەڤ ئەمرە ددا مە؟” (!)
-دەما کو کوردێن رۆئاڤایێ کوردستانێ نەبینن، ب دەستێ پەکەکێ، چاوا ئیرادەیا وان، ل وی بەشی ھاتە بنپێ کرن و کەتە دەستێ پەکەکێ؛ تێ واتەیا مافێ وان، کو ئاقلی بدەنە باشوورێ کوردستانێ ژی ژ دەست دانە و ئەو دەرفەت، ویژدان وەندا کرنە!
کوردێن کو ل گەل پەکەکێ دا تەڤدگەرن و بەرژەوەندییێن وان ل گەل پەکەکێ نە، مەژیک و ھەستێن کوردەواری و ویژدان ب وان را نەمایە. پەکەکە ئێریشی سەر پێشمەرگان دکەت و ئەو دبێژن؛
“زەختەکا مەزن ل پەدەکێ بکەن، دا کو دەست ژ ھەڤکاریا خوە یا د ئێرشێن داگیرکەریا ترکیا بەردەت.”(!)
لێ دەڤێ وان ناگریت کو بێژنە پەکەکێ؛ ” ئێدی بەسە کوردکوژی، کوردوێرانی”!
ما ل باشوورێ رۆئاڤایێ کوردستانێ پەدەکە ھەبوو، کو ترک کەتنە وێرێ و مالا کوردان وێران بوو؟
ما پەدەکە ئێریشان تینە سەر “گەریلایێن پەکەکێ و ھەر دکوژیت” کو ھوون دبێژن؛
“شەرێ ناڤخوەیی ژ ئێرشێن ترکیا خەتەرترە و دژمن ھەول ددەت ڤێ سیاسەتێ بدەتە مەشاندن. دڤێت پەدەکە نە ل کێلەکا دژمن بیت و ژ بۆ یەکتیا کوردی ئامادە بیت.” (!) د ڤێرە دا ژی ب مەبەستا، “پەدەکە ل کێلەکا دژمنی یە”(!) ھوون کار و کریارێن پەکەکێ ڤەدشێرن. ھوون نە دوروستن. یێن کو تێنە جانگۆری کرن پێشمەرگێن کوردستانێ نە و یێن کو دکوژن ژی پەکەکە نە. چما ھوون راستییێ سەر و بن دکەن؟
ب دژمناتییا باشوورێ کوردستانێ، ب کوشتنا پارێزڤانێن کوردستانێ و ب تەھدیدا سەر ئاخا ئازاد و حکوومەتا مەشرووع یا ھەرێما کوردستانێ پەکەکە، تێکچوونا خوە، د ویژدانا کوردان دا ھێدی ھێدی ئاڤا دکەت!
