بالیۆزخانەیا ئه‌مه‌ریكا ل سووریێ ژ بەر راپۆرتێن بەحسا کوشتنا ئەمین عیسا د گرتیگەھێن ھێزێن سووریا دەمۆکراتیک هه‌سه‌دێ دا دکه‌ن دلگرانە و داخوازا لێکۆلینەکا بله‌ز و زەلال دکەت.
بالیۆزخانەیا ئه‌مه‌ریكا ل سووریێ ل تویته‌را خوە بەلاڤ کر، ئه‌مه‌ریكا ژ راپۆرتێن کو بەحسا مرنا ئەمین عیسا عەلی د گرتیگەھێن ھێزێن سووریا دەمۆکراتیک دا نیگەرانە، ئەم داخوازا دەستپێکرنا لێکۆلینەکا بله‌ز و زەلال دکه‌ین، ھەر کەسێ د ب ڤێ دەستدرێژی یان سەرەدەرییا خراب دگه‌ل گرتییان بەرپرس بیت، دڤێت بهێته سزادان.
ئەمین عیسا عەلی ژ 22ێ گولانا بۆری ژ ئالیێ ئاساییشا په‌یه‌دێ ڤە ھاتبوو گرتن و پشتی 27 رۆژان تەرمێ وی رادەستی مالباتا وی ھاتبوو کرن، مالباتا وی و راپۆرا بزیشکی دبێژن کو ئەمین د بن ئه‌شكه‌نجه‌یه‌كا توند دا ھاتییە کوشتن.
ئەمین عیسا عەلی ئەندامەکی پارتییا دەمۆکراتا کوردستانێ – سووریە (PDK-S)ێ یە، په‌ده‌كه‌سێ ب داخویانیەکێ کوشتنا ئەمین عیسا ب توندی شەرمەزار کر و گۆت: ئەمین عیسا د گرتیگەھێن په‌یه‌دێ ڤه راستی ئەشکەنجەیێن ھۆڤانە ھات و د بن ئەشکەنجەیێ دا ھات شەھید کرن.
ھەروه‌ھا په‌ده‌كه‌سێ داخواز ژ رێخستنێن ناڤدەولەتی یێن مافێن مرۆڤان کر دەستێوەردان و لێکۆلینێ د ڤێ تاوانێ دا بکه‌ن و تاوانبار و کوژەرێن ئەمین بده‌نه دادگەھەکا ئاشکەرە و ب چاڤدێرییا ناڤدەولەتی.
