پشتی ھێزێن ناتۆیێ یێن د بن سەرپەرەشتیا ئامەریکایێ دا ژ ناڤ ئاخا ئەفغانستانێ ڤەکێشیایی، تالیبانێ راگھاند کو ھەر ھێزا بیانی ل ئافغانستانێ بمینیت، بۆ وان داگیرکەرە و دێ سەرەدەریا داگیرکەران گەل وان کەت.
ترکیا لگەل ئامەریکایێ دا رێکەفتن کربوو کو ئەولەھیا بالافرگەھا کابوولێ یا ب ناڤێ حەمید کارزای بکەت، لێ ل گۆر بەیانا تالیبانێ؛ مایینا لەشکەرێن ترکیا ل بالافرگەھێ وەکو تەھدید دهێتە دیتن و دخوازن ترکیا هێزێن خوە ژ ئەفغانستانێ ڤەکێشن.
پشتی هەموو وەلاتان پلان کری دا ھێزێن خوە ژ ئەفغانستانێ ڤەکێشن، ھاتبوو گۆتن کو ترکیا قەبوول کریە ب بھایێ 130 ملیۆن دۆلاران ل کابوولێ بمینیت.
تالیبانێ بۆ بی بی سی راگھاندبوو کو پشتی ئێلۆنێ ھەر لەشکەرەکێ بیانی ل ئەفغانستانێ بمینیت، دێ سەرەدەریا داگیرکەریێ لگەلدا کەن.
بەردەڤکێ تالیبانێ سوھەیل شاھین وەھا گۆتبوو:”هەموو ھێزێن بیانی، سۆزدایی، شێورمەند، پەروەردەکار دڤێت ژ ئەفغانستانێ ڤەکێشن ژ بەر کو ئەو هێز ھەموو پارچەیەکن ژ داگیرکەریێ”.
