مللەتەک کو ئازادیێ بخوازیت دڤێت نرخا وێ ئازادیێ ژی بدەت.
چ مللەتەک بێی زەحمەت و تەکۆشین، بێی گۆریکرنا خۆرتێن خوە یێن عەگید نەگه‌هشتییە ئازادیێ.
گەلێ کورد و پارتییا مە ژی کو پێشەنگێ خەباتا گەلێ کوردە، ژ مێژیە ڤێ چەندێ دزانن کو ئازادی خوە گۆریکرنێ دخوازیت، خوە بەختکرنێ دخوازیت.
کاروانێ شەهیدێن مە درێژە، لێ رەنگە ژ ڤێ هندێ ژی درێژتر بیت.
د رۆژا شەهیدبوونا شەهیدێن خوە دا، د بیرانینا شەهیدێن خوە دا، ژ مێژیە مە بریار دایە ئەم قەت نەگرین.
ژ مێژیە مە بریار دایە تەنێ و تەنێ ڤی کارێ کو ئەم دشێین بکه‌ین و ل بەر چاڤێن شەهیدێن خوە شەرمەزار نەبین، ئەڤه‌یه کو ئەم رێیا وان بەرنەده‌ین و وەکی وان هەتا سەری ڤێ رێكێ بپیڤن، ژ چ تەنگاسی و ئاستەنگەکێ نەترسین، ژ چ دژوارییەکێ نەڤەکێشن.
خەباتا مە خەباتەکا بەرحەقە، خەبات ژ بۆ ئازادییا مللەتەکی یە، خەبات بۆ پێشەرۆژا زارۆکان و نڤشێن دنیایێ یه.
هەکه ئەم وەکی نڤشا نها «نەسلا شەهیدان» ئەرکێن خوە ب باشی ئەنجام بده‌ین، ئەم دێ شێین هێڤیدار بین کو نڤشا پشتی مە شەهید نه‌بن.
هەروه‌سا هەکه نڤشا رابووری، یان ژی نڤشێن رابووری ب باشی ئەرکێن خوە جیبجی کربان، رەنگە
ڤێ نڤشا مە شەهید نه‌بان.
لەوما بیرانینێن شەهیدێن مە جارەکا دی مە دئیننه سەر ڤێ باوەرێ کو ب بیر و باوەرییه‌كا قاییم، ب دلەکێ پر ژ شۆرەش و ب هێڤیەکا ساف ڤە، ئەم خەباتا خوە به‌رده‌وام بكه‌ین.
ئەنجاما ڤێ خەباتێ دبیته دوو تشت: هەم روحا شەهیدێن مە شاهـ دکەت، هەم ژی گەلێ مە رزگار دکەت دا کو د پێشەرۆژێ دا مە شەهید نه‌بن.
«خەلاتا هەری باش بۆ شەهیدان به‌رده‌وام كرنا رێیا وانه».
