هێرشێن ل سەر کوردێن باژێرێن مه‌زن یێن ترکان

هێرشێن ل سەر کوردێن باژێرێن مه‌زن یێن ترکان
  • فوئاد ئونه‌ن

هەتا به‌ری 15 سالان ژی چ ل باکورێ کوردستانێ و چ ل ئاناتۆل و ترکیێ ب گشتی، ترکان حەفزا خوە ژ کوردان دکرن، لێ ژ سالا 2007ێ پێڤاژۆیەکا نوو دەست پێ کر، میتینگێن جومهوورییەتێ، میتینگێن ئالایان دەستپێکەکا نوو بوو، ل مێرسین، ئیزمیر، بۆرسا، ستەنبۆلێ کورد هاتن تەنگاڤ کرن، هێزێن میلیتەر ل پاش و هێزێن پارا- میلیتەر ل پێش لێ ب هه‌ماهه‌نگی بەرێ خوە دان کوردێن باژێرێن مه‌زن.

هێرشی کارکەرێن دەمسالی، دەزگەهێن کوردی کرن، ترسا کوردان ژ سەر خوە راکرن، کوردێن بێ رێخستنێن نەتەوەیی ژ نوو گاڤ هاڤێتن، د کۆنترۆلا دەولەتێ دا ڤان هێرشێن نه‌ژادپەرست کوردێن باژێران سل کرن، ئێدی حه‌سابا کوردان د ناڤ جڤاتا ترکان دا نەما، ئەڤه‌ رەوشەکا ب ترسه‌ و دڤێت هەر کورده‌كێ ب غیرەت ب ڤێ یەکێ ب ئێشیت و سیاسەتا کوردان ل چارەیان بگەریت.

ئه‌ڤ هێرشه‌ ژ ناڤه‌نده‌كێ دهێنه‌ گه‌رم كرن و سار كرن

پشتی هەر هێرشه‌كێ رایەدارێن دەولەتێ دبێژن: ئەڤه‌ بوویەرێن تاکەکەسی نە و چ په‌یوه‌ندییا ڤان بوویەران ب دژمناتییا کورد و ترکان ڤه‌ نینە، لێ ئەم دزانین کو ل باژێرێن مه‌زن یێن ترکیێ ژی ل هەمبەر کوردان شەرەکی ب کۆنترۆل دهێته‌ مەشاندن، ژ ناڤەندەکێ دهێته‌ گەرم کرن و سار کرن.

داگیرکەر ژ بۆ كو جینۆسایدان به‌رده‌وام ئەنجام بدەن حه‌سابا هەر تشتی دکەت و د ئامادەباشیێ دا یە، یێن كو کارێ خوە ناکه‌ن ئەمین. پێویستە رۆژەک بەری رۆژەکێ ئالیێن سیاسی یێن کورد و کوردستانی ڤێ مژارێ بێخنه‌ رۆژەڤا خوە دا و نەخشەرێیەکە جددی بۆ ب ئافرینن.

دەم دەما غیرەتێ یە!

دڤێت نه‌هێته‌ ژبیر کرن کو د ڤی سەردەمی دا پێڤاژۆیێن “ئاشتی، چارەسەریێ” ژی دهاتنە مەشاندن، ئەڤ هەر دوو کار ب هەڤ را دهاتنە کرن، گۆتارا ئاشتی و براتیێ ژی کورد د وارێ فکری دا بێ چه‌ك هێلان.

ئەم د قۆناغەکا نوو دانە و دڤێت د ڤێ مژارێ دا ئەم خوه‌ گیرۆ نه‌كه‌ین، ژ دەما میتینگێن جمهوورییەتێ ئەم کۆمیتەیێن پاراستنێ یێن هەڤپار پێشنیاز دكه‌ین و ب یا مە دڤێت ئەم ب جددییەت ڤێ پێشنییازێ رۆژانە بکه‌ین.

دەم دەما غیرەتێ یە!!!