ھێژا بەکر
مالپەرا “شار پرێس” گۆتارەکا کەسەکێ ب ناڤێ سەلاح خدر بەلاڤ کریە.
بەریا کو ئەم بچینە سەر ناڤەرۆکا وێ نڤیسا کو نیشان ددەت خوەدیێ وێ چەند ھای ژ دیرۆکا تەڤگەرا رزگاریخوازیا کوردستانێ نینە، ئەم دێ دو سێ تشتان ئینین بیرا وی کەسی.
د سەری دا، ئەو دانە بەر ھەڤا کو وی کەسی گۆتارۆکا خوە ل سەر ئاڤا کری، گەلەک بێسەرووبەر و بێ واتەیە، کو ئالیێن ئاسمان و رێسمان دایە بەر ھەڤ.
جھێ پرسێیە، کو گەلۆ ئەڤ ئێرشێن پەکەکێ و کالکان د ڤێ دەما ھان دا، چەند گرێدایی نە ب ڤان بوویەرێن کو نھا ل وێ دەرێ چێدبن و دخوازن چ پەیامەکێ ژ بۆ کیژان ئالی بشینن؟
خوەدیێ نڤیسێ پشتراستە کو کالکان ژ بۆ خوە ب ڤێ ئێرشا وی رازییە، نە ژ خوە ڤە، ژ ترسان؟ ئەو یەک ژی بازدانە ب سەر یەک ژ پرەنسیپێن سەرەکی یێن “پەکەکێ” کو ژ رۆژا یەکێ دا دانە پێشیا خوە و دبێژن، هیچ کەسەک نەتشتکە ژبلی رێبرێ وان، و ھەر کەسەک ژ ڤێ پرەنسیپێ دوور بکەڤیت، دێ 3 رێ ل پێشیا وی ھەبن: رەخنەکرنا شەخسێ خوە ھەیا ئاستا کو خوە پێ پیس بکەت. دەرکرنا ژ پەکەکێ ھەیا وێ ئاستێ کو خوە ژدەست بدەت. یان ژی رێیا کوشتنا ب تۆمەتا خیانەتا ل رێبەرێ خوە، ل پێشیا وییە. ژ بۆ ڤان ھەرسێ ریان ژی ب سەدان و ب ھەزاران میناکێن زندی ھەنە. ل ڤێرە ئەم دێ تەنێ میناکەکێ ئینین ژ بۆ وی نڤیسکارێ قۆرمیشکری یێ کو ھایا وی ژ دیرۆکێ نینە: سەرکردەیێ بەرێ یێ پەکەکێ و نڤیسکار و رەوشەنبیرێ شۆرەشگێرێ کوردستانا ترکیێ محەمەد سەلیم چوروککایا د پرتووکا “ئایەتێن ئاپۆ” دا بەحسا بوویەرەکێ دکەت، کو وی دەمی چوروککایا ل ئەورووپا هێژان سەرنڤیسەرێ بەلاڤۆکەکا پەکەکێ بوو.. خویایە یەک ژ وان ب سەدان رەوشەنبیران یێن ئازادێن کوردە کو ل دژی دیکتاتۆریا ناڤا پەکەکێ دا دەست ژێ بەردانە و د پرتووکەکێ دا کو ل ئەورووپا ھاتیە بەلاڤکرن ب شێوەیەکی ئەرێنی و پۆزەتیڤ بەحسا چوروکککایا و مستەفا قەرسوو دکەت (مستەفا قەرسوو سەرکردەیێ پەکەکێ یە و ھەڤالێ کالکانە)، چوروکایا دبێژیت: “رۆژەکێ تەلەفۆنا من لێدا، من دیت قەرسوویە، من ژێ گۆتێ کەرەم بکە. وی ژی گۆت، محەمەد سەلیم ئەز و تو تێدا چووین! من ژێ پرسی، بۆچی؟ وی ژی گۆت: فلان کەسی د پرتووکا خوە دا ب خرابی بەحسا سەرۆکاتیێ کریە و ب باشی بەحسا من و تە کریە!!”
نها ھەڤال ئەڤ راستیا رەوشێیە و ئەڤە حالێ وی کالکانی یە کو تو ناڤێ وی دکەیە شۆرەشگێرێ ئازاد و ئەڤە حالێ سەرکردەیێن پەکەکێ یە. ئازادیا چ و حالێ چ!!
نڤیسکار، د ئێرشەکا دی دا، دکەڤیتە د بەرەڤاژی گۆتنێن خوە، ژ ئالیەکی ڤە دبێژیت، سەرکردەیێن پەدەکێ نزانن کالکان ترکە و ب باوەریا وان کوردە لەوما مافێ وی نینە ب ناڤێ کوردان باخڤیت، ژ ئالیەکێ دی ڤە خوەدێ گراڤی دبێژیت، سالا 1983یێ کالکان رێبەراتیا گەریلا کریە، د ئۆپەراسیۆنەکا ھەڤبەشا پێشمەرگە و گەریلا دا ل دژی ئارتێشا ئیراقێ ل ناڤچەیا حەفتەنینێ!! باشە چاوا پەدەکە لگەل کەسەکێ ئۆپەراسیۆنەکا ھەڤبەش ئەنجام بدەت و پەدەکە نەزانیت کا ئەو کەس کوردە یان ترکە؟ ژبلی کو ئەو گۆتن نەراست و بێبەختییە، ژ خوە وی دەمی نە ئارتێشا ئیراقێ قەت ل حەفتەنینێ بوو و نە ژی پێشمەرگەیێن پەدەکێ ئۆپەراسیۆنەکا ھەڤبەش لگەل گەریلایێن پەکەکێ ئەنجام دایە.
نڤیسکار ھاتیە بەرگیریێ ل کالکان و پەکەکێ بکەت، لێ بێ کو بزانیت گەلەک درەوان تێخیت پال وان، کو بێگومان ئەو پێرازی نابن. کالکان و ھەڤالێن وی، سەرکردەیێن پەکەکێ و قەندیلێ، دەست ژ کوردایەتی و ناڤێ کورد و کوردستانێ بەردانە و نەفرەتێ ل خەباتا نەتەوی و نەتەوخوازیێ دکەن، کو ئەڤ یەک ژی د ئەدەبیاتا پەکەکێ و رێبەرتی و بالێن وێ دا خویایە و ئەو ب خوە دانپیدانێ ب ڤێ یەکێ دکەن و شانازیێ ژی پێ دکەن.
د داویێ دا، ھەموو ئەو بێبەختیێن کو نڤیسکار دبێژیت د ڤێ نڤیسا خوەیا بێسەرووبەر و جھێ گومانێ دا، نەھێژا نە کو ئەم بەرسڤا وان بدەین و ئەو گۆتنێن وی نکارن وان پرسیارێن سەرەکی یێن د ھزرا خەلکێ کوردستانێ دا و د ھزرا ب سەدان جوانێن کوردێن کو ب نییەتا کوردایەتیێ ل دووڤ پەکەکێ کەتنە، بەرسڤ بدەن. ئەو پرس ژی ئەڤەنە: پەکەکە ژ بەر چ ژ ئاخا خوە رەڤیایە و ل ھەرێما کوردستانێ چ دکەت؟ بۆچی شەرێ پێشمەرگە و دەزگەھێن فەرمی یێن حکوومەتا ھەرێما کوردستانێ کریە تاکە ئەرکێ خوە؟
