مام فەرھاد ل گوندەکێ مەزنیێ کوردستانێ ل گەل مالباتا خوە دژیا، مرۆڤەک چیرۆکزان و رەوانبێژ و رووخوەش بوو، ھەموو کەسان ژێ حەزدکر، تا رادەیەکێ کاری بوو ب کوردی بنڤیسیت و بخوینیت.
مام فەرھاد د زارۆکینیا خوە دا ھۆگری چیرۆکان ب بوو، ژ داپیر و باپیر و ژن و زەلامێن گوندێ خوە و گوندێن نێزیکی گوندێ خوە ب دەھان سەرپێهاتی و چیرۆکێن فلکلۆری و مللی یێن رەسەن ژ وان وەرگرت بوون، گەلەک جاران ئەو چیرۆک ژبۆ زارۆکێن گوندێ خوە دگۆتن و خوەشی دخستە دلێ وان.
مام فەرھاد و مەتا گولچین یا خێزانا وی، کەچ و کورەکێن جوان و زیرەک ھەبوون، ل قوتابخانا گوندێ خوە قۆناغا خوەندنێ یا سەرەتایی خواندبوو. لێ قوتابخا ناڤەندی ل گوندێ وان نەبوو، و ژبۆ کو کەچ و کورێن خوە ب خواندن بدەن، چێل، بزن و مھێن خوە فرۆشتن و ل باژارێ سلێمانیێ خانی کرێ کرن و ل سلێمانیێ نیشتەجی بوون.
کەچ و کورێن خوە ل قوتابخانا ناڤەندی تۆمارکرن و خوەندنا خوە بەردەوام کر.
مام فەرھاد ماوەیەکێ ب دووڤ کارەکێ دا گەریا، لێ ھیچ کارەک ب دەست نەکەت، هزرکر کو پێدڤیە کارەکێ بکەت بۆ دابینکرنا پێدڤیێن ژیانا خێزانا خوە.
مەتا گولچین: زەلامێ مالێ، خەرجیێن مە بەرەڤ تەمامبوونێ ڤە دچن.
پێویستە تو کارەکێ ببینی.
مام فەرھاد: کارەک د هزرا من دا ھەیە … ئەز ب نیازم سبەھی تاقی بکەم.
مەتا گولچین: چ کار د هزرا تە دایە؟
مام فەرھاد: د هزرا من دایە ئەز رۆژێ چەند چیرۆکان ژ چیرۆکێن خوە بفرشم.
مەتا گولچین: ب کەنی ڤە چیرۆکان دێ فرشی؟! ئەڤجا کی دێ چیرۆکان ژ تە وەرگریت و کریت؟
مام فەرھاد: زارۆکێن تاخێن باژاری، ئەز دێ فرۆشمە وان.
رۆژا دی پشتی نیڤرۆ مام فەرھاد چوو کۆلانەکا قەلەبالغ ل تاخەکێ سلێمانیێ. زارۆک گەلەک ژ دەرڤە بوون، و چەند ژن ل بەر دەرێ دەریان بوون.
مام فەرھاد: ب دەنگەکێ بلند: چیرۆک …چیرۆک …
ژنەک: مام تو تیرۆکا دفرۆشی؟ ێ کانێ تیرۆکێن تە!
مام فەرھاد: نە خووشکا من، نە تیرۆک … چیرۆک و حیکایەتان دفرۆشم.
زارۆک لێ کۆم بوون: مامە گیان، کانی چیرۆکێن تە؟!
مام فەرھاد: دەستێ خوە بەر ب لایێ سەرێ خوە بر و گۆت:
زارۆکنۆ، چیرۆک د ڤێرەدا نە. زارۆک پێ ژ کەنا فەتسین. بەری نها تشتێن ووسا ب بەر گوھێ وان نەکەت بوو.
مام فەرھاد: ئەگەر ھەر یەک ژ وە بچیتە جەم دایکا خوە و ھندەک پارا بینیت، دێ چیرۆکەکێ وەرگریت. زارۆک پێتر پێ دکەنن. زارۆک چوون جەم دایکێن خوە پارە ھێنان و دانە مام فەرھاد و ل دۆرا وی روونشتن و ب جوانی گوھداریا وی کر.
مام فەرھاد: چیرۆکەکا کۆمێدی یا خوەش ژ بۆ وان گۆت، زارۆک گەلەک پێ کەیفخوەش بوون و کر کەنی.
زارۆک: مامێ چیرۆکفرۆش، سبەهی ژی وەرە. ئەم دێ چیرۆکەکا دی ژ تە کرین.
مام فەرھاد وێ رۆژێ ل سێ کۆلانێن وی تاخی، سێ چیرۆک فرۆتنە زارۆکان، و پارەیەکێ باش ب دەست کەت، ژ وێ رۆژێ وێڤە زارۆکان ب مامێ چیرۆکفرۆش گازی وی کر و ووسا ھاتە ناسکرن.
مامێ چیرۆکفرۆش ھاتە مالێ و پارە دانە مەتا گولچین و گۆت: گولچین خان ڤان پارا وەربگرە، سبەهی ئەز دێ بازارەکێ باش کەم.
مەتا گولچین: فەرھاد گیان، ئەڤ پارە تە ل کووڤە هینان؟
مام فەرھاد: ما من نەگۆت ئەز چیرۆکێن خوە دفرۆشم. ئەڤە پارێ فرۆشتنا سێ چیرۆکێن منن.
ژ وێ رۆژێ دا، مام فەرھاد دەما کو چووبایە هەر کۆلانەکێ، زارۆکان ب کەیفخوەشی گازی دکرێ: وەرە … وەرە مامێ چیرۆکفرۆش. ئەم دێ چیرۆکان ژ تە کرین.
د دەما سالەکێ دا، مام فەرھاد پارەیێن باش ب دەست خوە خستن، پەرتووکخانەیەک ڤەکر، ل گەل چاپخانەیەکێ ژی رێکەفت، ھەر جارێ چەند چیرۆک ژ چیرۆکێن خوە چاپدکرن و بەلاڤ دکرن، د ماوەیەکێ کێم دا ئەو دفرۆشتن. پەرتووکخانە ژی فرەھتر کر.
بکرێن پەرتووکا گەلەک زیدە بوون. کەچ و کورێن وی ژی ل زانکۆیا سلێمانیێ ھاتنە قەبوول کرن.
