سەرۆک ئەرکانێ وەزارەتا پێشمەرگە راگھاند، ئەو و ئارتێشا ئیراقێ دو ھێزێن ھەڤبەش پێک تینن.
ئیرۆ شاندەکا وەزارەتا بەرەڤانیا ئیراقێ گھشتە ھەولێرێ ب مەبەستا گۆتووبێژکرنا لگەل وەزارەتا پێشمەرگە ل سەر پێکئانینا دو لیوایێن ھەڤبەش د ناڤبەرا ھەر دو ئالیان دا.
سەرۆک ئەرکانێ پێشمەرگە جەمال ئێمنکی د جڤینەکا چاپەمەنیێ دا راگھاند؛ وەزارەتا پێشمەرگە یا ھەرێما کوردستانێ لگەل شاندەکێ وەزارەتا بەرەڤانیا ئیراقێ ل سەر پێکئانینا ناڤەندەکا ھەڤبەش ل دیالا، رۆژئاڤایێ نەینەوا، مەخموور، کەرکووک و خانەقینێ جڤیا.
جەمال ئێمنکی ئاشکەرا کر کو دامەزراندنا دو لیوایێن ھەڤبەش د ناڤبەرا حکوومەتا ھەرێما کوردستانێ و حکوومەتا فەدەرالی دا ل سەر خەتا تەماسا ناڤبەرا ھێزێن پێشمەرگەیێن کوردستانێ و ھێزێن ئیراقێ، مژارەکا دی یا جڤینێ بوو، ھەر دو ئالی و ھەڤپەیمانان کەیفخوەشن کو ئەو لیوا بهێنە پێکئانین.
سەرۆک ئەرکانێ پێشمەرگە دەستنیشان کر کو لگەل وەزارەتا بەرەڤانیا ئیراقێ ل سەر ھەماھەنگیا دانووستاندنا زانیاریێن ئیستخباراتێ، رێکەفتینە.
ئێمنکی ئاشکەرا کر کو شاندا حکوومەتا ئیراقێ پشتی ڤەگەرنە بەغدایێ، دێ لگەل سەرۆکوەزیرێ ئیراقێ گۆتووبێژێ کەن و پشترا رزامەندیێ وەرگرن و جارەکا دی ڤەگەرن و رێکەفتنێ کەن.
