دادگەھا دەستوورا بنگەھینا ترکیێ ئیرۆ دەربارێ داخوازا ھەدەپێ دا بریارا خوا ئاشکەرا کر.
دادگەھا دەستووری یا بنگەھین داخوازا ھەدەپێ یا ژ بۆ پاراستنێ یا د دۆزا ژ بۆ بەشداربوونا ھەدەپێ دا ھاتیە ڤەکرن، قەبوول کر و 30 رۆژ دەم دا وێ.
پارتیا دەمۆکراتیکا گەلان (ھەدەپە) دەربارێ دۆزا گرتنا خوە دا ژ بۆ کو پاراستنا خوە بکەت، رۆژا 16ێ تەباخێ داخوازا دەما زێدە کربوو و ئەڤ داخوازا خوە پێشکێشی دادگەھا دەستوورا بنگەھین یا ترکیێ کربوو.
دادگەھا دەستوورا بنگەھین د 21ێ خزیرانا ئیسال دا ئیدیعانامەیا سەردۆزگەریا کۆمارێ یا ژ بۆ گرتنا ھەدەپێ قەبوول کر. ب قەبوولکرنا یەکدەنگییا ئیدیعانامەیێ، پێڤاژۆیا گرتنا ھەدەپێ کو د 15ێ جۆتمەھا 2012ێ دا ھاتبوو دامەزراندن، ب ئاوایەکی فەرمی دەست پێ کر.
ل گۆر قانوونێ، پشتی قەبوولکرنا ئیدیعانامەیا گرتنا ھەدەپێ، 60 رۆژ دەم ل پێشیا ھەدەپێ ھەبوو کو پاراستنا خوە بکەت، کو وێ پارتیا داخوازا درێژکرنا دەمی کربوو.
دادگەھا دەستوورا بنگەھینا ترکیێ ھەر ئیسال د دەما بۆری دا 2 جاران دۆزا گرتنا ھەدەپێ رەد کربوو. ئەنجوومەنا گشتی یا دادگەھا دەستووری یا ترکیێ رۆژا 31ێ ئادارا 2021 و 16ێ نیسانا 2021ێ ژ بۆ گۆتووبێژکرنا دۆزا گرتنا ھەدەپێ جڤیابوو. د ھەردو جڤینان دا ھندەک کێماسیێن د ئیدیعانەمەیێ دا ھاتن دیارکرن و بۆ سەڕاستکرنا وان، ئیدیعانامە ھاتە رەدکرن و ل سەردۆزگەریا گشتی ھاتە ڤەگەراندن.
