37 سال ل سەر کۆچا داوییا یلماز گونەی دەرباس بوون

37 سال ل سەر کۆچا داوییا یلماز گونەی دەرباس بوون

 ئیرۆ 37ەمین سالڤەگەرا کۆچا داوییا سینەماکار، ھونەرمەند و شۆرەشگەرێ کورد یلماز گونەیە. گونەی ژ بەر کۆدەتایا 1980یێ یا ترکیا ژ ھەموەلاتی بوونا ترکیا ھاتبوو دەرخستن و ئەو کۆچبەری پایتەختا فرانسا باژێرێ پاریس بووبوو و ل وێ دەرێ کۆچا داوی کربوو و جەنازەیێ وی ل وێرێ بۆ ئاخێ ھاتیە سپارتن.

یلماز گونەی د سالا 1937ێ دا ل گوندێ یەنیجە یێ باژێرێ ئەدەنێ ژ دایک بوویە. ئەو یەک ژ 7 زارۆکێن مالباتەکا کارکەرە، ب ئەسلێ خوە کوردە.

گونەی قۆتابخانا سەرەتایی و یا ناڤین ل ئەدەنەیێ خواندیە. ئەو ھێژ د 9 سالیا خوە دا دبیتە کارکەر و دەست ب کارێ کۆمکرنا پەمبۆ دکەت. لێ دەست ژ خواندنێ ژی بەرنادەت. ل ئەنقەرێ زانینگەھا یاسایێ دخوینیت و ل ستەنبۆلێ ژی بەشا ئابۆری.

د سالێن خواندنێ دا چیرۆکان و سەناریۆیان دنڤیسیت. ئەو ل سەر تراژەدی و دراما گەلێ خوە رادوەستیت. د دەما خواندنا خوە دا سەناریستێ ترک ئاتف یلماز ناس دکەت.

د سالا 1957ێ دا دادگەھێ ژ بەر کارێن سیاسی دەربارێ وی دا 7 سال و نیڤ جەزایێ زیندانێ و 2 سال و نیڤ ژی جەزایێ مشەختێ بری. دادگەھا تەمییزێ بریارێ ھلدوەشینە دکەتە سال و نیڤەک زیندان و 6 مەھ ژی سزایێ مشەختێ.

یلماز گونەی ژ بەر ڤێ سەدەمێ قۆتابخانێ ب دوماهێ نائینیت. گونەی دبێژیت “قۆتابخانا من پەرتووکن، سینەمایە، گرتیگەھە، یاسایێن ژیانێ یێن توندن، زەختێن جڤاکی نە، خایینتییە و مێرخاسییە. مامۆستەیێ من ژی ژیانە.”

وی د ناڤبەرا سالێن 1957 و 1982یێ ب دەھان فیلم ئامادەکرن و د دەھان فیلمان دا ژی بەشداری کر.

ئەو، د سالا 1972یێ دا جارەکە دی ب سەدەما کو تەڤلی بوویەرێن سییاسی بوویە دهێتە گرتن و 2 سالان ل گرتیگەھێ دمینیت و پاشێ سەربەست دهێتە بەردان.

یلماز گونەی، د 9 ئیلۆنا 1984ێ دا، ھێژ 47 سالی، ل فرانسایێ کۆچا داوی کر.

دەرھێنەر و سینەماکارێ کورد د ژیانا خوەیا ھونەرێ دا گەلەک بەرھەمێن گرانبەھا ل دوو خوە ھشتن. وی د فیلمێن خوە دا، بال کشاند سەر تەنگەزاریێن ژیانا گەلێ کورد.

فیلما یلماز گونەی یا ب ناڤێ یۆل (رێ) ژی یەک ژ ڤان بەرھەمایە. رێ، د سالا 1982یێ دا، لگەل فیلما “وەندا”یا رەژیسۆرێ یوونانی گۆستا گاڤراس، خەلاتا پالمیەیا زێرین پارڤەکربوو.

یلماز گونەی، بەری مرنا خوە د ئاخافتنەکا خوە دە ل سەر رەوشا کوردان و کوردستانێ وھا گۆتبوو: “ئەم ڤێ قەدەرێ رەد دکەین! ئەم ناخوازین ببینە زارۆکێن وەلاتەکی بندەستێ کو ژ چار لایان ڤە ھاتیە داگیرکرن؛ ئەم دخوازین ببینە زارۆکێن وەلاتەکی ئازاد، سەربخوە و یەکگرتی. ئەم دخوازین ل سەر ئاخا خوە، ب زمانێ خوە سترانێن ئەڤینێ و ئازادییێ ببێژن. و ئەم دخوازین ل وارێ خوە، ل بن ئالایا خوە، ئازاد و سەربخوە بژین.”

پوستێن ھەمان بەش