چما بەرێ مووشەک، TNT و درۆنان ل  ھەولێرێ یە؟

erbil-kurdistan

11ێ ڤێ مەھێ دیسا ئێرشەکا تەرۆریستی ب فرۆکەیێن بێ فرۆکڤان (درۆنە) ل دژی ھەولێرێ ھات کرن. خۆشبەختانە ئەو ئێرش ھاتە پووچکرن. نە زیانێن وێ ھەبوون نە ژی کاری بگەھن ئارمانجا خوە. ئەڤا دبیت ھەفتەمین ئێرشا مووشەکی ل دژی ھەولێرێ یە کو د ھەیاما سالەکی دا ھاتنە کرن. چەند رۆژ بەرێ ژی ئەنجومەنا ئاسایشا ھەرێما کوردستانێ د داخویانیەکا ڤیدیۆیی دا دانپیدانێن گرۆپەکێ گرتیێن داعشێ بەلاڤ کر کو دخواستن د ناڤ ھەولێرێ دا ئێرشێن تەرۆریستی بکەن.

دەمەکێ بەریا نھا ژی ئەنجومەنا ئاسایشا ھەرێما کوردستانێ ب ھەمان رەنگی د داخویانیەکا ڤیدیۆیی دا گرتنا کۆمەکا دی یا تەرۆریستێن داعشێ راگھاند کو ژ ئالیێ ھێزێن دژەتەرۆرا ھەرێما کوردستانێ ڤە ھاتبوون گرتن. د ناڤ وێ داخویانیێ دا دانپیدانێن وان تەرۆریستان ژی ھەبوو کو دخواستن بەریا جەژنا قوربانێ چەند چالاکیێن تەرۆریستی ل ناڤ ھەولێرێ بکەن.

خالا ھەڤبەش یا وان نووچەیان باژارێ ھەولێرێ یە. ئەوا کو بالا من کشاندی پێداگریا سەرکردەیێن بلند و ئەولەھیێ یێن داعشێ بوو ل سەر وێ یەکێ کو دڤێت ل ھەولێرێ ئێرشێن تەرۆریستی بێن کرن. ژ وێ سەیرتر ئەوە کو تەڤاھیا ئێرشان ب درۆنان یان ژی مووشەکان ژ ئالیێ میلیشیایێن تەرۆریستی ڤە تێنە کرن. ھەموو ل دژی ھەولێرێ نە. پرسا گرنگ ئەڤەیە: بۆچی ھەموو دژمنێن کوردستانێ ب تایبەت دخوازن ئێرشی ھەولێرێ بکەن؟! ئەز جارێ بەحسا دیرۆکا کەڤنار و پر ب چیرۆک یا ب ھەزار سالان یا ھەولێرێ ناکەم، تەنێ بەحسا دیرۆکا پشتی سەرھلدانا 1991ێ یا ڤی باژاری دکەم ھەتا نھا.

ھەولێر ژ دەما کو ب بریارا سیاسی یا سەرکرداتیا کوردستانێ و ب یاسا و دەستووری بوویە پایتەختا ھەرێما کوردستانێ، ئێدی ژ وێ یەکێ دەرکەتیە کو باژارەکی نۆرمال بیت، ئێدی پایتەختەکا نۆرمال ژی نینە بەلکی ئەڤ باژارە پایتەختا شکۆ و ھەیبەت و ھەبوون و ئیرادەیا نە تەنێ کوردێن باشوور بەلکو نێزیکی پێنجی ملیۆن کوردایە، پایتەختا شکۆیا ھەموو کوردستانیانە ب ھەموو پێکھاتەیێن خوەیێن ئەتنیکی، ئایینی و مەزھەبی ڤە. ھەولێر پایتەختا بەرەڤانی ل ڤەمانا ستاتوویا سیاسی و دەستووری یا ھەرێما کوردستانێ یە، ھەولێر پایتەختا بریارا سیاسی یا کوردستانێ یە.

ئەو پارتیا کو وەک پارتیا یەکەم یا ھلبژارتنان ب شریکاتیا پارتیێن دی حکوومەتا کوردستانێ پێک ئانیە و حوکمێ ھەولێر و ھەرێما کوردستانێ دکەت، تو ژێ حەز بکەی یان حەز نەکەی، لایەنگرێ وێ بی یان نەیارێ وێ بی، دەنگێ خوە بدەیێ یان نەدەیێ، ئەڤ راستی قەت ناهێت گوھەراتن کو شکۆیا ھەولێرێ شکۆیا تەیە.

کورت و کورمانجی، کوردستان ب ھەموو باژار و باژارۆک و گوندێن خوە ڤە شکۆیا مە ھەمیانە، پاراستنا ھەولێرێ ژی کو پایتەختا بریار و ئیرادەیا ڤێ کوردستانێ یە، یانێ پاراستنا شکۆیا مە ھەمیان و ھەموو کوردستانێ. ئەڤێ پێوەندی ب وێ یەکێ ڤە نینە کو کیژان پارتی ل ھەولێرێ پرانییە و خوەدان دەستھلاتە. خوەدێ نەکە ئەگەر ھەولێرێ بکەڤیت، ھێڤیا ئازادی و سەربەستیێ ل ھەر چار پارچەیێن کوردستانێ دکەڤیت و ژ دەست دچیت. ئێدی دەمەک درێژ پێویستە دا کو دیسا شین ببیت. بەرۆڤاژی ڤێ یەکێ ژی راستە؛ ھەر بریارەکا سیاسی یا گرنگ د بەرژەوەندیا کوردستانێ دا بهێتە دایین، دڤێت دیسا ل ھەولێرێ ئەو بریار بهێتە دایین.

ئەڤا کو ئەز بەحس دکەم، کێمکرنا پێگەھا چ باژارەکێ کوردستانێ نینە، خوەدێ ھەموو باژار و باژارۆک و گوندێن کوردستانێ ژ شەر و بەلایان دوور بگریت. ھەر باژارەک و دەڤەرەکێ گرنگیا خوە ھەیە و خەلکێ وان باژار و دەڤەران تێرا خوە راستی زلم و زۆرداریێ و سەرکوتکرنا دژمن و داگیرکەرێن کوردستانێ ھاتنە. ھەموویان ژی ب ھەڤ را خەبات کرنە بۆ ئازادیێ و قوربانیێن مەزن دانە. پێشمەرگە و زارۆکێن ب وەفا و جان فیدا ل ھەموو دەڤەرەکا کوردستانێ ھەبوونە و ھەنە و داھێنەر ژی ل ھەموو دەڤەران ھەبوونە و ھەنە.

مرۆڤێن دلسۆز ل ھەموو جھەکێ کوردستانێ ھەنە و کەسێن نا پاک ژی کو کەمینە نە، ل ھەر دەری ھەنە. پاراستنا تەڤاھیا گوند، باژار و باژارۆکێن کوردستانێ ژی ب قاسی ھەڤ گرنگن. لێ ئەز بەحسا پێگەھا سیاسی یا ھەولێرێ دکەم، ژ بەر کو پێگەھەکا گەلەک ب نرخ و ھەستیارە.  ژ بەر وێ ژ دەما نەیارێن کورد و کوردستانێ دخوازن دەربەکێ ل کوردستانێ و ھەبوونا کورد و پێگەھا کورد و کوردستانێ بدەن، دخوازن دەربەکێ ل ھەولێرێ بدەن.

وە دیت د دەما شەرێ ناڤخوە دا چاوا دەولەتێن داگیرکەر دخواستن شەر ل ھەموو کوچە و کۆلانێن ھەولێرێ بەلاڤ ببیت. وە دیت دەما ل ناڤ پارلەمەنتۆیێ دا رێکەفتنا ئاشتیێ د ناڤبەرا پەدەکێ و یەنەکێ دا ھاتیە ئیمزاکرن، چاوا شەرێ براکوژیێ ھاتە حەرامکرن و رەدکرن. وە دیت رێخستنێن تەرۆریستی یێن مینا قایدە، ئەنسار سونە، ئەنسارولئیسلام و دووڤکێن وان، پرانیا ئێرشێن تەرۆریستی و خوەکوژیێن خوە ل دژی ھەولێرێ ئۆرگانیزە کربوون. وە دیت داعشێ گەلەک ھەول دان ھەولێرێ داگیر بکەن لێ پێشمەرگەیێن قەھرەمان دفنا وان شکاندن.

وە دیت پشتی خیانەتا ١٦ ئۆکتۆبەرا (2017) چاوا حەشدا شەعبی و دووڤکێن وێ ھەول دان ھەولێرێ داگیر بکەن لێ پێشمەرگە کاری دفنا وان بشکێنیت. نھا ژی ھوون دبینن ئێرشێن مووشەکی و درۆنی و تی ئێن تی میلیشایێن تەرۆریستی ھەر ل دژی ھەولێرێ یە، پلانێن گەمار یێن داعشێ ژی دیسا بۆ وێ یەکێ نە کو زیانێ بگەھینن هەولێرێ.

ھەولێر ژ بلی وێ یەکێ کو باژارەکی کەڤنار و تژی دیرۆک و چیرۆکێن کوردستانێ یە، ژ بلی وێ یەکێ کو پایتەختە و دەزگەھێن مینا سەرۆکاتیا ھەرێما کوردستانێ، سەرۆکاتیا پارلەمەنتۆیا کوردستانێ و سەرۆکاتیا ئەنجومەنا وەزیران ل خوە دگریت، ژ بلی وێ یەکێ کو باژارێ کۆنسولخانە و نوونەراتیێن دیپلۆماتیک یێن دەولەتانە، ژ بلی وێ یەکێ کو باژارەکی مەزن و پێشکەتی و جوان و گەش یێ کوردستانێ یە، ژ بلی وێ یەکێ کو جانترین و پێشکەتیترین باژار ھەولێرە د وارێ ئاڤەدانیێ دا، ژ بلی وێ یەکێ کو یەک ژ باژارێن پێشکەتی یێن دەڤەرێ یە، ژ بلی وێ یەکێ کو باژارێ ھەمیانە و پایتەختا کوردستانیانە و رووگەھا تووریستانە و ھەمبێزا پر ب دلۆڤانی و حورمەتا میڤانانە، ژ بلی وێ یەکێ کو باژارێ فەرشا سۆر و پێشوازی ل سەرکردەیێن مەزن یێن جیھانێ یە، باژارێ ئیرادە و بریارێ یە، باژارێ بەرەڤانی ل ستاتوویا ھەرێما کوردستانێ یە، ژ بەر وێ ژی ھەر دەم ئارمانجا یەکەمیا دژمن و نەیار و داگیرکەرانە.

ئەوا کو داعش ل دژی ھەولێرێ دکەت، ئەوا کو میلیشیایێن ناڤ حەشدا شەعبی ل دژی ھەولێرێ دکەن، ئەو کۆمپلۆیێن ھەرێمی یێن کو ھاتنە کرن و تێنە کرن و گەلەکێن دی ژی د رۆژەڤێ دا نە، ئەو دەزگەھێن مەدیایی یێن عەرەبی، تورکی و فارسی یێن کو ل دژی ھەولێرێ تێنە خەبتاندن، ئەو ماکینا مەدیایی یا کوردی یا کو ب سالانە ب دراڤێ خەلکێ کوردستانێ ژ ئالیێ ھندەک پارتیێن ئیسلامی و ب ناڤ ئۆپۆزیسیۆن و پۆپۆلیستی ڤە ل دژی ھەولێرێ تێنە بکارئانین، ئەوا کو ب سالان کۆمەک پارلەمەنتەرێن کورد یێن خوەفرۆش ل بەغدایێ ل دژی پێگەھا ھەولێرێ دبێژن و دکەن، ل دژی پارتیەکا دیارکری نینە بەلکی ئەو دخوازن ھەولێرێ بێخن و بدەنە تەسلیمکرن و سەرێ وێ بدەنە چەماندن. ھەلبەت ئەڤە ژی خەونا گەمار یا ھەموو دژمن و داگیرکەرێن کوردستانێ یە، ژ بەر وێ ژی ئەو ھێز و پارتیا کو بەرەڤانیێ ل شکۆیا ھەولێرا پایتەخت دکەت بەرەڤانیێ ل شکۆیا ھەموو کورد و کوردستانێ دکەت.

کەرکووک، سلێمانی، ھەولێر، ھەلەبجە و دوھۆک ھەموو ب قاسی ھەڤ ھێژا و خۆشدڤی نە لێ دژمن و نەیارێن کورد و کوردستانێ دخوازن ب شکاندنا شکۆیا ھەولێرێ شکۆیا ھەموو باژارێن کوردستانا باشوور بشکێنن، لۆما ئەگەر ھەولێر یا پاراستی بیت کوردستان دێ یا پاراستی بیت.

پوستێن ھەمان بەش